Malakai 1:1-14
1 Na itukutuku bibi:
Na vosa i Jiova vei Isireli ni vakayagataki Malakai:*
2 “Au vakaraitaka na noqu lomani kemuni,”+ e kaya o Jiova.
Ia oni kaya: “Oni vakaraitaka vakacava nomuni lomani keimami?”
“E tuakai Jekope o Iso?”+ e kaya o Jiova. “Ia au lomani Jekope,
3 au cati Iso,+ au vakalala na nona ulunivanua+ au qai biuta na nona ivotavota me nodra itikotiko na jakoli* ni vanua talasiga.”+
4 “E kaya o Itomi, ‘Keimami sa vorovorolaki, ia keimami na suka me keimami tara tale na vanua sa rusa tu,’ qo na ka e kaya o Jiova ni lewe vuqa,* ‘Era na tara ia au na talaraka sobu, era na vakatokai me “vanua ni ca” kei na “tamata e cudruva o Jiova me tawamudu.”+
5 Oni na raica e matamuni, oni na qai kaya: “Me vakacerecerei mada ga o Jiova ena vanua o Isireli.”’”
6 “‘E rokovi tamana na gone,+ e vaka kina na tamata vua na nona turaga. Ia keu tamamuni,+ o cei me vakarokorokotaki au?+ Keu turaga, o cei me dokai au?’ E kaya o Jiova ni lewe vuqa vei kemuni na bete oni beca tiko na yacaqu.+
“‘Ia oni kaya: “Keimami beca vakacava na yacamuni?”’
7 “‘Ni oni cabora tiko ena noqu icabocabonisoro na kakana* duka.’
“‘Oni kaya: “Keimami vakadukadukalitaki kemuni vakacava?”’
“‘Ni oni kaya tiko: “Me beci na teveli nei Jiova.”+
8 Ni oni kauta mai na manumanu mataboko me isoro, oni kaya: “Qo e sega ni ca.” Ni oni cabora na manumanu lokiloki se tauvimate, oni kaya: “Qo e sega ni ca.”’”+
“Moni cabora mada qori vua na nomuni kovana. Ena taleitaki kemuni o koya se vakadonui kemuni ena yalovinaka?” e kaya o Jiova ni lewe vuqa.
9 “Ia qo me kerei* mada na Kalou me lomani keda. Ena vakadonui kemuni o koya ena isoro va qori mai ligamuni?” e kaya o Jiova ni lewe vuqa.
10 “O cei vei kemuni ena via sogota na katuba?*+ Ni oni waqara mada ga na noqu icabocabonisoro oni vinakata me soli vei kemuni e dua na ka.+ Au sega ni taleitaki kemuni,” e kaya o Jiova ni lewe vuqa, “au sega ni taleitaka na isoro kece e cabora na ligamuni.”+
11 “Ena dokai na yacaqu vei ira na veimatanitu mai na icabecabe ni siga ina kena idromudromu.*+ Ena veivanua kece ena vakamai kina na isoro, ena cabori na isolisoli ena yacaqu, me isolisoli savasava, ni na dokai na yacaqu ena veimatanitu,”+ e kaya o Jiova ni lewe vuqa.
12 “Ia oni beca*+ tiko ni oni kaya, ‘E duka na teveli i Jiova, me beci na kena vuata kei na kena kakana.+’
13 Oni kaya tale ga, ‘Raica! Sa veivakaocai ga!’ oni qai vakidiucu kina,” e kaya o Jiova ni lewe vuqa. “Oni kauta mai na manumanu butakoci, e lokiloki, e tauvimate. Io oni kauta mai na veika qori me isolisoli! Vakacava, meu vakadonuya mai ligamuni?”+ e kaya o Jiova.
14 “Ena cudruvi o koya e veidabui, ni tu ena nona qelenimanumanu na manumanu tagane vinaka, ia e bubului qai cabora vei Jiova na kena e ca. Ni o yau na Tui levu,”+ e kaya o Jiova ni lewe vuqa, “ena dokai na yacaqu ena veimatanitu.”+
iVakamacala e ra
^ Kena ibalebale “Noqu iTalai.”
^ Dua na mataqali koli kila, e ucu momoto, vutivutia na buina, e vaka na irairai ni fokisi.
^ Qo na mataivalu vakalomalagi.
^ Ipe., “madrai.”
^ Se “vakamamasu e matana.”
^ Na katuba ni valenisoro, me nona itavi.
^ Se “mai na tokalau ina ra.”
^ Se rawa ni, “beci au.”
