Malakai 2:1-17
2 “Na ivakaro qo e baleti kemuni na bete.+
2 Ke oni sega ni rogoca, oni sega ni tugana e lomamuni moni vakalagilagia na yacaqu,” e kaya o Jiova ni lewe vuqa,* “Au na cudruvi+ kemuni, au na veisautaka me ca na ka oni vakalougatataki kina.+ Io au sa vakacacana na veivakalougatataki, ni oni sega ni tugana e lomamuni.”
3 “Raica! Au na vakacacana* na sorenikau o kaburaka,+ au na kaburaka e matamuni na denimanumanu, na denimanumanu ni nomuni soqo, oni na kau kina.*
4 Oni na qai kila niu vakaroti kemuni ena ivakaro qo me dei tiko ga kina na noqu veiyalayalati kei Livai,”+ e kaya o Jiova ni lewe vuqa.
5 “Na noqu veiyalayalati kei koya e baleta na bula kei na vakacegu au solia vua kei na vakarokoroko. E rokovi au o koya, io e doka na yacaqu.
6 E tiko e gusuna na lawa* ni dina,+ e sega sara ni laurai e tebenigusuna e dua na ka tawadodonu. E lako vata kei au o koya ena vakacegu kei na yalododonu,+ e saumaka e levu mai na nodra cakacala.
7 E dodonu me taqomaka na kilaka na tebenigusuna na bete, o ira na lewenivanua mera qara mai gusuna na lawa,*+ ni o koya na italai nei Jiova ni lewe vuqa.
8 “Ia o kemuni oni sa gole tani mai na sala. Oni vakavuna mera tarabe e levu ena lawa.*+ Oni vakacacana na veiyalayalati i Livai,”+ e kaya o Jiova ni lewe vuqa.
9 “O koya gona au na cakava moni beci, moni lolovira vei ira na lewenivanua kece ni oni sega ni muria na noqu ivalavala, ia oni veivakaduiduitaki ena kena muri na lawa.”+
10 “E sega ni dua ga na tamada kece?+ E sega ni dua ga na Kalou e buli keda? Na cava ga eda veivakaisini tiko kina vakataki keda,+ nida vakacacana na nodra veiyalayalati na tukada?
11 E veivakaisini o Juta, sa vakayacori na ka vakasisila e Isireli kei Jerusalemi. E beca o Juta na savasava* i Jiova,+ na ka e dau taleitaka, e kauta me watina na luvena yalewa na kalou tani.+
12 O Jiova ena muduka mai na valelaca nei Jekope e dua e vakayacora qori, se mani o cei* e vakacaboisoro vei Jiova ni lewe vuqa.”+
13 “Qo e dua tale* na ka oni vakayacora, e tini robota kina na icabocabonisoro i Jiova na wainimata, na tagi kei na rarawa, e mani sega ni kauaitaka o koya na nomuni isoro, se vakadonuya e dua na ka mai ligamuni.+
14 Oni kaya, ‘Ena vuku ni cava?’ Ni o Jiova ga e ivakadinadina vei iko kei na watimu o vakawatitaka ni o se cauravou, o koya o vakaisina, ia na kemu isa o koya, e watimu ni veiyalayalati.*+
15 Ia e dua ga e sega ni cakava, ni se vo tiko vua na yalo ni Kalou. Na cava a vaqara tiko o koya? Na luve ni Kalou. Ia moni qarauna na lomamuni, me kua ni dua e vakaisina na watina e vakawatitaka ni se cauravou.
16 Niu cata na veisere,”+ e kaya o Jiova na Kalou ni Isireli, “kei koya e ubia na nona isulu ena itovo voravora,”* e kaya o Jiova ni lewe vuqa. “Moni qarauna na lomamuni, moni kua ni veivakaisini.+
17 “Oni vakaocai Jiova ena ka oni tukuna.+ Ia oni kaya, ‘Keimami vakaocai koya vakacava?’ Oni kaya, ‘E vinaka ena mata i Jiova o ira kece era caka ca tiko, e taleitaki ira o koya,’+ se oni kaya, ‘I vei na Kalou ni lewadodonu?’”
iVakamacala e ra
^ Qo na mataivalu vakalomalagi.
^ Ipe., “cudruva.”
^ Oya na vanua e biu kina na denimanumanu ni nodra isoro.
^ Se “ivakavuvuli.”
^ Se “ivakavuvuli.”
^ Se rawa ni, “nomuni ivakavuvuli.”
^ Se rawa ni, “tikina tabu.”
^ Ipe., “o koya e yadra kei koya e rogoca.”
^ Ipe., “na ikarua ni.”
^ Se “watimu ni vakamau.”
^ Se “kei koya e voravora na nona ivalavala.”
