Vola o Marika 1:1-45
-
Vunau o Joni na Dauveipapitaisotaki (1-8)
-
Papitaiso o Jisu (9-11)
-
Vakatovolei Jisu o Setani (12, 13)
-
Tekivu vunau mai Kalili o Jisu (14, 15)
-
Rau kacivi na imatai ni tisaipeli (16-20)
-
Vakasavi na yalo velavela (21-28)
-
Vakabula e levu o Jisu mai Kapenaumi (29-34)
-
Masu ena vanua vagalala (35-39)
-
Vakabulai e dua e vukavuka (40-45)
1 Qo na itekivu ni itukutuku vinaka kei Jisu Karisito, na Luve ni Kalou:
2 Me vaka e vola na parofita o Aisea: “(Raica! Au sa tala yani na noqu italai me liu vei iko,* me vakarautaka na nomu sala.)+
3 E dua na domo e kacivaka voli ena vanua talasiga, ‘Ni vakarautaka na sala i Jiova,* vakadodonutaka na nona sala.’”+
4 E tiko ena vanua talasiga o Joni na Dauveipapitaisotaki, e vunautaka voli mera papitaiso o ira na veivutuni, me vosoti kina nodra ivalavala ca.+
5 Era qai tabili vua o ira kece ena vanua o Jutia kei ira kece na lewe i Jerusalemi me lai papitaisotaki* ira ena uciwai na Joritani, nira vakatusa na nodra ivalavala ca.+
6 E vakaisulu o Joni ena vuti ni kameli, qai vauca e tolona na beleti leca,+ e kena kakana na vodre kei na denioni ni veikau.+
7 E dau vunautaka: “O koya ena muri mai e kaukaua sara vei au, e sega mada ga ni ganiti au meu cuva sobu meu sereka na wa ni nona ivava.+
8 Au papitaisotaki kemuni ena wai, ia ena papitaisotaki kemuni o koya ena yalo tabu.”+
9 E biuti Nasareci e Kalili ena gauna ya o Jisu me lai papitaisotaki koya o Joni ena Joritani.+
10 Ni lamata ga mai wai e raica ni wase rua na lomalagi, mani lako sobu vua na yalo tabu me vaka na ruve.+
11 E qai rogo mai lomalagi e dua na domo e kaya: “O iko na Luvequ lomani; au vakadonui iko.”+
12 E uqeti koya sara na yalo tabu me lako ina vanua talasiga.
13 E tiko ena vanua talasiga me 40 na siga ni vakatovolei koya tiko o Setani.+ E tiko vata kei ira na manumanu kila, ia era vukei koya na agilosi.+
14 Ni sa vesu o Joni, sa qai lako i Kalili o Jisu+ me lai vunautaka na itukutuku vinaka ni Kalou+
15 e kaya: “Sa yaco mai na gauna lokuci, sa voleka na Matanitu ni Kalou. Ni veivutuni,+ ni vakabauta na itukutuku vinaka.”
16 Ni taubale voli ena baravi kei Kalili,* e raici rau sara na veitacini o Saimoni kei Adriu+ ni rau bala lawa tiko i wai,+ ni rau gonedau.+
17 E mani kaya vei rau o Jisu: “Drau muri au mai, au na lesi kemudrau mo drau gonedau ni tamata.”+
18 Sega ni bera ni rau biuta na nodrau lawa rau qai muri koya.+
19 Ni toso vakalailai i liu, e raici Jemesa na luvei Sepeti, kei Joni na tacina, ni rau vakavinakataka tiko na nodrau lawa e loma ni waqa,+
20 sega tale ni bera ni sa kacivi rau. Rau mani biuti Sepeti tu yani na tamadrau kei ira na tamata cakacaka me rau muri Jisu.
21 Eratou gole sara i Kapenaumi.
E curu ina valenilotu ena Siga ni Vakacecegu o Jisu, e tekivu veivakavulici sara.+
22 Era kurabui na rogoci koya ena nona veivakavulici ni vakavulici ira tiko me vaka e tu vua na lewa, e sega ni vakataki ira na vunivola.+
23 E tiko tale ga ena nodra valenilotu ena gauna ya e dua na tagane e curumi yalo velavela, e kailavaka mai:
24 “Me icavai vei keimami nomu lako mai, Jisu na kai Nasareci?+ O mai vakarusai keimami? Au kilai iko vinaka, o iko na Yalosavasava ni Kalou!”+
25 Ia e cudruva na timoni ya o Jisu, e kaya, “Galu, lako tani vua!”
26 E vakavuna na yalo velavela me cuquraki koya, e kaikaila ena domona taucoko, sa qai biuti koya.
27 Era kurabui na lewenivanua, ra qai veikayaka: “Na cava qo? Na ivakavuvuli vou? E vakaroti ira mada ga na yalo velavela ra qai talairawarawa vua.”
28 Sega ni bera sa robota na yasayasa taucoko o Kalili kei na vanua volekata na kena itukutuku.
29 Oti ya eratou biuta na valenilotu me ratou lako ina vale nei Saimoni kei Adriu, rau veitomani tale ga o Jemesa kei Joni.+
30 Eratou tukuna sara vua ni davo koto na tinai wati Saimoni+ ni katakata na yagona.
31 E lako yani vua o Jisu, taura na ligana me duri. E oti na nona katakata, mani vakarautaka sara na marama qo na ka eratou gadreva.
32 Ni sa yakavi, sa dromu tale ga na siga, era qai kau yani vua na tauvimate kei ira e curumi ira na timoni;+
33 era mai kumuni tu e matanivale na lewenikoro kece.
34 E vakabula e levu na tauvimate,+ e vakasava tale ga e levu na timoni, ia e sega ni vakatara mera vosa na timoni nira kilai koya ni Karisito.*
35 E duri ena matakacaca ni se buto o Jisu, qai curu i tuba me lai masu ena dua na vanua lala.+
36 Ia e qai vaqarai koya o Saimoni kei na so tale.
37 Ni ratou kunei koya, eratou kaya vua: “Era vaqarai kemuni na lewenikoro kece.”
38 E qai kaya vei ratou: “Tou lako ina dua tale na vanua, ina veikoro voleka meu lai vunau tale ga kina, qo na vu ni noqu lako mai.”+
39 E mani lako me vunau ena nodra valenilotu ena yasayasa taucoko o Kalili, e vakasavi ira tale ga na timoni.+
40 E lako tale ga mai e dua na vukavuka, e tekiduru sara qai vakamasuti koya: “Ke oni vinakata, ni vakasavasavataki au mada.”+
41 E tuburi Jisu na loloma, mani dodoka na ligana me tarai koya, qai kaya vua: “Au vinakata! Mo savasava mai.”+
42 E yali vakasauri na nona vukavuka, mai savasava yani.
43 E vakaroti koya matua qai vakatalai koya me lako,
44 e kaya vua: “Kua mada ni lai talanoa vua e dua, mo lai vakaraitaki iko ga vua na bete, mo qai cabora na ka e vakarota o Mosese mo vakasavasavataki kina,+ me ivakadinadina vei ira.”+
45 Ia ni nadaku ga na tagane, sa lai talanoataka wavoki na ka kece e yaco. E sega kina ni rawa vei Jisu me lako doudou yani ina koro, mani tiko voli ga ena ibili ena vanua e sega ni tawani vakalevu. Ia era tabili ga yani vua na lewenivanua mai na veiyasana kece.+
