Niemaia 2:1-20
2 Ena vula o Naisani* ena ika20 ni yabaki+ i Tui Atakisekise+ e vakarautaki tu na waini e matana, me vaka ga au dau cakava au kauta cake na waini meu solia vua na tui.+ Ia au se sega vakadua ni matararawa e matana.
2 E mani kaya vei au na tui: “Na cava o matararawa kina ni o sega ni tauvimate? Sega tale ni dua na ka qo, e rarawa tiko na lomamu.” Au rere vakalevu niu rogoca qori.
3 Au qai kaya vua na tui: “Moni bula balavu na tui! Na cava meu kua ni matararawa kina ni sa rusa tu na koro era bulu tu kina na tukaqu, sa yameca tale ga na bukawaqa na kena matamata?”+
4 E kaya vei au na tui: “Na cava o vinakata?” Sega ni bera niu masu vua na Kalou ni lomalagi.+
5 Au kaya sara vua na tui: “Ke vinaka vei kemuni na tui, ke oni lomani au na nomuni tamata, moni talai au i Juta ina koro era bulu tu kina na tukaqu meu lai tara tale mada.”+
6 E qai kaya vei au na tui ni dabe tiko e yasana na watina:* “Ena vakacava na dede ni nomu lako, o na lesu mai ninaica?” E vinaka gona vua na tui me talai au,+ au mani tukuna vua na gauna lokuci.+
7 Au kaya sara vua na tui: “Ke vinaka vua na tui, me soli mada ga vei au na ivola vei ira na kovana ena yasayasa ni Tai ni Uciwai,*+ me vakadonui na noqu ilakolako meu yaco sara i Juta,
8 me dua tale ga na ivola vei Esafa e dau vakatawa na nona Basenikau na Tui,* me solia vei au na kau me duru ni matamata ena iVunivuni+ ni Vale,* kei na bai ni koro+ kei na vale au na lako kina.” E solia gona vei au na tui,+ ni tiko vei au na liga vinaka ni noqu Kalou.+
9 Au sa qai yaco vei ira na kovana ena yasayasa ni Tai ni Uciwai, au solia sara vei ira na nona ivola na tui. A talai ira tale ga na turaganivalu kei ira na dauvodo ose na tui mera tomani au.
10 Ni rau rogoca o Sainivalati+ na Oroneimi kei Topaia+ na vakailesilesi* ni Amonaiti,+ e ca sara ga vei rau ni lako mai e dua me cakava na ka mera vinaka kina na lewe i Isireli.
11 Sa dede toka au qai yaco i Jerusalemi, au tiko e kea me tolu na siga.
12 Au tucake ena bogi, o yau kei na vica tale na tagane, au sega ga ni tukuna vua e dua na ka sa biuta e lomaqu na noqu Kalou meu cakava me baleti Jerusalemi, e sega tale ga ni dua na manumanu e tu vei au, na manumanu ga au vodoka tiko.
13 Au curu yani ena bogi ena Matamata ni Buca,+ au donuya na Mataniwai na Gata Levu meu yaco ina Matamata ni iBenubenu,+ au qai vakaraica na bai kei Jerusalemi sa basuraki tu, sa yameca tale tu ga na bukawaqa na kena matamata.+
14 Au toso sara ina Matamata ni iKeliniwai+ kei na nona Tobu na Tui ia e qiqo na vanua me muria na manumanu au vodoka tiko.
15 Ia au lako cake tiko ina buca*+ ena bogi, au vakaraica tiko ga na bai, oti au lesu yani au curu ena Matamata ni Buca, au qai lesu.
16 Era sega ni kila na ivukevuke ni turaga+ na vanua au lako kina kei na ka au cakava tiko, niu sega ni tukuna e dua na ka vei ira na Jiu, o ira na bete, o ira na turaga, o ira na ivukevuke ni turaga, kei ira na vo ni tamata cakacaka.
17 Au qai kaya vei ira: “Oni sa raica na vakaloloma ni vanua eda yacova, ni sa rusa o Jerusalemi, sa kama tale ga na kena matamata. Moni lako mai, meda tara tale na bai kei Jerusalemi me kua nida rogo ca tiko.”
18 Au qai tukuna vei ira na vinaka ni liga ni Kalou vei au+ kei na ka e tukuna vei au na tui.+ Nira rogoca qori era kaya: “Meda tucake, meda tara na bai.” Era mani vakaukauataki ira* mera cakava na cakacaka vinaka.+
19 Ni rogoca o Sainivalati na Oroneimi, o Topaia+ na vakailesilesi* ni Amoni,+ kei Kesemi na kai Arapea,+ eratou vakalialiai keimami+ sara, eratou beci keimami tale ga, eratou kaya: “Na cava oni cakava tiko? Oni sa talaidredre vua na tui?”+
20 Ia au qai kaya: “Na Kalou ga ni lomalagi ena tokoni keimami,+ o keimami na nona tamata keimami na tucake me keimami tara na bai, ia dou na sega ni vakaitavi kina, se dua kina nomudou dodonu, se mo dou nanumi* kina e Jerusalemi.”+
iVakamacala e ra
^ Raica na iKuri B15.
^ Se “na nona ranadi.”
^ Se “Tai ni Uferetisi.”
^ Se “nona veikau na tui.”
^ Se “Valenisoro.”
^ Ipe., “dauveiqaravi.”
^ Se “waimaca.”
^ Ipe., “na ligadra.”
^ Ipe., “dauveiqaravi.”
^ Se “wili.”
