Niemaia 4:1-23
4 Ni rogoca ga o Sainivalati+ ni keimami tara tale tiko na bai, e cudru qai rarawa vakalevu, e mani vakalialiai ira tiko ga na Jiu.
2 E tukuna sara vei ira na tacina kei ira na mataivalu ni Samaria: “Na cava era cakava tiko na Jiu gogo qo? Era na cakava ga vakataki ira na ka qo? Era na vakacaboisoro? Era na vakaotia ena dua ga na siga? Era na vakavinakataka tale na vatu qesa mai na ibinibini benu sa rusa?”+
3 Ia e kaya yani o Topaia+ na Amoni+ e tucake tu e yasana: “Ke kabata mada ga e dua na fokisi na ka era tara tiko, ena vakabalea na nodra baivatu.”
4 Moni rogoca mada na neimami Kalou ni keimami vosabeci,+ moni vakalesuya na nodra veivakalialiai me tau e uludra,+ moni soli ira tale ga mera vaka na itokinivalu nira kau vakavesu ina dua tale na vanua.
5 Moni kua sara ni buluta na nodra cala se bokoca na nodra ivalavala ca e matamuni,+ nira vosabeci ira na dautara bai.
6 O koya gona keimami tara tiko ga na bai, e sema vinaka na bai taucoko, e tara cake tale me yacova na veimama ni kena cere, ni lomadra tiko ga na lewenivanua mera cakacaka.
7 Ni rogoca ga o Sainivalati, o Topaia,+ o ira na kai Arapea,+ o ira na Amoni, kei ira na kai Asoto+ ni sa toso tiko na vakavinakataki ni bai, ni sa botani tale ga na qaraqara, era cudru vakalevu.
8 Era qai bukia vata na vere mera lako yani mera valuti Jerusalemi, mera vakavuna na ue.
9 Ia keimami masu vua na neimami Kalou, keimami lesia tale ga e dua me yadravi ira ena siga kei na bogi.
10 Ia era kaya na lewe i Juta: “Sa oti na nodra kaukaua na tamata cakacaka,* sa rui levu na irusarusa, keimami na sega ni tara rawa na bai.”
11 Era kaya tiko ga na keimami meca: “Era na sega ni kila, era na sega ni raica nida sa tu ena kedra maliwa meda vakamatei ira da qai tarova na cakacaka.”
12 Nira dau lako mai na Jiu era tiko volekati ira, era tukuna wasoma* vei keimami: “Era na valuti keda mai na veiyasana kece.”
13 Au mani lesi ira tiko ga na tamata mera tiko ena vanua lolovira ena dakunibai qai laurai levu, au lesi ira kei na nodra vuvale mera vakaiseleiwau, mera vakamoto, mera vakadakaititi.
14 Niu raica nira rere, e totolo ga niu duri meu tukuna vei ira na turaga+ kei ira na ivukevuke ni turaga, kei ira na vo ni lewenivanua: “Moni kua ni rerevaki ira.+ Moni nanumi Jiova ni cecere qai vakatubuqoroqoro.+ Moni vala ena vukudra na tacimuni, na luvemuni tagane, na luvemuni yalewa, na watimuni kei na nomuni vale.”
15 Nira rogoca na keimami meca ni keimami sa kila na ka era cakava tiko, ni vakaseva tale ga na Kalou dina na nodra inaki, keimami suka kece me keimami cakacaka ena bai.
16 Me tekivu mai na siga qori era cakacaka+ tiko e veimama ni noqu tamata, e dua tale na veimama era tauri moto, era vakaisasabai, era vakadakaititi, era vakaisulunivalu. Ia o ira na turaga,+ era duri e dakudra na vuvale taucoko ni Juta
17 era tara bai tiko. O ira na daucolacola era cakacaka ena dua na ligadra, e dua tale na ligadra e taura tiko na iyaragi.
18 O ira na dautara bai e vesu yadua e dibidra na nodra iseleiwau nira cakacaka tiko, ia o koya me uvuca na davui*+ e duri tu e yasaqu.
19 Au qai tukuna vei ira na turaga kei ira na ivukevuke ni turaga, kei ira na vo ni lewenivanua: “Se levu sara tu na cakacaka qai vakaitamera, eda dui tutu ena bai, eda veiyawaki.
20 Ni oni rogoca ga na rorogo ni davui, moni soqoni mai ena vanua keitou tiko kina. Na noda Kalou ena vala ena vukuda.”+
21 Ia keimami cakacaka tiko ga nira tauri moto tiko e dua tale na kena veimama mai na kida ni mataka me yacova ni cila na kalokalo.
22 Au kaya vei ira na lewenivanua ena gauna oya: “Me moce na tamata yadua kei na nona dauveiqaravi e Jerusalemi, era na yadravi keda ena bogi ra qai cakacaka ena siga.”
23 O yau, o ira na taciqu, o ira na noqu dauveiqaravi,+ kei ira na yadra era muri au, keimami sega ni bau luvata na neimami isulu, keimami dui taura tiko ga na neimami iyaragi e liga i keimami imatau.
