Niemaia 5:1-19
5 E mani dua na nodra kudru levu na tamata kei na watidra me baleti ira na tacidra Jiu.+
2 Era kaya eso: “Keimami sa lewe levu, o keimami kei ira na luvei keimami tagane kei ira na luvei keimami yalewa. Me keimami rawata na covuata me keimami kania me keimami bula tiko kina.”
3 Era kaya eso: “Keimami solia na neimami were kei na neimami loganivaini, kei na neimami vale me ivakadei me keimami rawata kina na covuata ena gauna ni leqa ni kakana.”
4 Era kaya tiko eso tale: “Keimami kere ilavo me saumi vua na tui na ivakacavacava ni neimami were kei na neimami loganivaini.+
5 Keimami lewe vata kei ira na taci keimami, keimami dra vata,* era tautauvata na luvei keimami kei na luvedra, ia keimami soli ira na luvei keimami tagane kei ira na luvei keimami yalewa mera bobula, eso na luvei keimami yalewa era sa bobula+ tu. E sega na neimami kaukaua me keimami tarova nira taukena eso tale na neimami were kei na loganivaini.”
6 Au cudru vakalevu niu rogoca na nodra kudru kei na vosa qo.
7 Au mani vakasamataka qo e lomaqu, au veivosakitaka kei ira na turaga kei ira na ivukevuke ni turaga, au kaya vei ira: “O kemuni yadua oni lavaka tiko na tubu vei ira na tacimuni.”+
Au tuvanaka tale ga mera kumuni mai na lewe levu ena vukudra.
8 Au kaya vei ira: “Keimami sasaga me keimami voli ira lesu mai na tacida Jiu era volitaki ina veimatanitu, ia qo oni na volitaki ira na tacimuni,+ mera volitaki tale vei keimami?” Nira rogoca qori era galu, e sega na ka mera tukuna rawa.
9 Au kaya tale vei ira: “E sega ni vinaka na ka oni cakava tiko. Vakacava, e dodonu moni doka* na Kalou+ mera kua kina ni vakalialiai keda o ira na lewe ni veimatanitu era keda meca?
10 O yau tale ga, o ira na taciqu, kei ira na noqu dauveiqaravi keimami solia vakadinau vei ira na ilavo kei na covuata. Yalovinaka, meda muduka na noda lavaka tiko na tubu.+
11 Au kerea moni vakasuka vei ira nikua na nodra were,+ na nodra loganivaini, na nodra veiolive, na nodra vale, na ikadrau* ni ilavo kei na covuata, na waini vou, kei na waiwai oni lavaka tiko vei ira me tubu.”
12 Era mani kaya: “Keimami na vakasuka na ka qo, keimami na sega ni taroga lesu e dua na ka. Keimami na vakayacora sara ga me vaka na ka o tukuna.” Au kacivi ira sara na bete mera bubuluitaka nira na vakayacora na vosa ni yalayala qo.
13 Au ceburaka tale ga na ilobi ni noqu isulu,* au kaya: “O ira kece na sega ni muria na vosa ni yalayala qo, me ceburaki ira va qo na Kalou dina mai na nona vale kei na ka e taukena, me ceburaka va qo me kua ni dua na ka e vo.” Era mani kaya na lewe ni ivavakoso taucoko: “Emeni!”* Era vakacaucautaki Jiova na lewenivanua, era vakayacora na ka era yalataka.
14 Tekivu tale ga ena siga e lesi au kina meu nodra kovana+ ena vanua o Juta, mai na ika20 ni yabaki+ ina ika32 ni yabaki+ i Tui Atakisekise,+ e 12 na yabaki, o yau kei ira na taciqu keimami sega ni kania na kakana e kena na kovana.+
15 Ia o ira na kovana era liu vei au era vakaicolacolataki ira na lewenivanua, era taura tiko ga mai vei ira e 40 na sikeli siliva* me ivoli ni madrai kei na waini e veisiga. Era vakasaurarataki ira tale ga na lewenivanua na nodra dauveiqaravi. Ia au sega ni vakayacora qori+ niu doka* na Kalou.+
16 Au veivuke tale ga ena tara ni bai qo, ia keimami sega ni rawata e dua na were.+ Era soqoni vata e kea na noqu dauveiqaravi mera cakacaka.
17 Era kana ena noqu teveli e 150 na Jiu kei ira na ivukevuke ni turaga, vaka kina o ira na lako mai vei keimami mai na veimatanitu.
18 Ena veisiga e vakarautaki vei au* e dua na bulumakau, e ono na sipi digitaki kei na manumanuvuka, qai vakarautaki vakadua ga ena loma ni tini na siga na veimataqali waini. Ia ena ka kece qo, au sega ni lavaka na kakana e kena na kovana, ni sa bibi rawa tu na nodra itavi na lewenivanua.
19 Moni nanumi au kemuni na noqu Kalou meu vinaka kina ena ka kece au vakayacora ena vukudra na tamata qo.+
iVakamacala e ra
^ Ipe., “na lewedra na taci keimami e vaka na lewei keimami.”
^ Ipe., “rerevaka.”
^ Se “dua na pasede,” ena veivula.
^ Se “Me yaco mada ga!”
^ Ipe., “ceburaka na lomaserequ.”
^ Dua na sikeli e tautauvata kei na 11.4 na karamu (0.367 na onisi). Raica na iKuri B14.
^ Ipe., “rerevaka.”
^ Se “au sauma.”
