Niemaia 6:1-19
6 Ia ni tukuni ga vei Sainivalati, vei Topaia,+ vei Kesemi na kai Arapea,+ kei ira na vo ni keimami meca niu sa tara tale na bai+ qai sega ni dua na qaraqara e vo (me yacova na gauna oya au se sega ni vakaduria na katuba ni matamata),+
2 e totolo ga ni talatala mai vei au o Sainivalati kei Kesemi: “Mo lako mai me datou lokuca e dua na gauna me datou sota kina ena dua na koro ena Vanua Bucabuca o Ono.”+ Ia erau nakita me rau vakaleqai au.
3 Au mani tala eso mera kaya vei rau: “E dua na cakacaka levu au qarava tiko, au na sega ni lako sobu rawa. Na cava me cegu kina na cakacaka niu biuta tu meu lako sobu vei kemudrau?”
4 Erau vakauta mai vakava vei au na itukutuku vata ga oya, e tautauvata ga na ka au tukuna vei rau.
5 E qai tala mai o Sainivalati na nona dauveiqaravi me mai tukuna vei au na vosa vata ga qori ena ikalima ni gauna, e taura tiko mai e ligana e dua na ivola e sega ni dregati tu.
6 E volai kina: “Era sa rogoca na lewe ni veimatanitu, e tukuna tale ga o Kesemi+ ni o iko kei ira na Jiu oni nakita tiko moni be.+ Qori na vuna oni tara tiko kina na bai, ia me vaka na itukutuku qo o sa nodra tui.
7 O lesi ira tale ga na parofita mera tukuni iko e Jerusalemi, ‘Sa tiko e Juta e dua na tui!’ Ena tukuni vua na tui na ka qo. Mo lako gona mai me datou veivosakitaka vata na ka qo.”
8 Ia au vakauta vua na itukutuku qo: “E sega ni yaco tiko na ka o tukuna tiko mai, qori ga na ka o bulia tiko ena nomu vakasama.”*
9 Nira via vakarerei keimami kece, era kaya: “Ena malumalumu na ligadra, era na sega ni vakaotia kina na cakacaka.”+ Ia au masulaka moni vakaukauataka na ligaqu.+
10 Au curu sara ina vale nei Semaia na luvei Tilaia na luvei Metapeli ni sogolati tu kina. E qai tukuna: “Me daru lokuca na gauna me daru sota kina ena vale ni Kalou dina ena loma ni valenisoro, me daru qai sogota na katuba ni valenisoro, nira na lako mai mera vakamatei iko. Era na lako mai mera vakamatei iko ena bogi.”
11 Ia au kaya: “Me dro e dua e vakataki au? Vakaevei, me curu ina valenisoro e dua e vakataki au me qai bula?+ Au na sega ni curu kina!”
12 Au qai kila ni sega ni talai koya mai na Kalou, ia erau saumi koya o Topaia kei Sainivalati+ me parofisaitaka na ka ca qo me baleti au.
13 E saumi o koya me vakarerei au meu valavala ca kina, me dua na yavu me rau vakarogorogocataki au kina, me rau qai beitaki au.
14 Kemuni na noqu Kalou, moni nanumi Topaia+ kei Sainivalati kei na ka erau vakayacora, vaka kina o Noataia na parofita yalewa, kei ira na vo ni parofita era saga tiko ga mera vakarerei au.
15 Sa qai vakaoti na bai ena ika25 ni siga ni Eluli,* e 52 na siga.
16 Nira rogoca kece ga qori na keimami meca, nira raica tale ga na lewe ni veimatanitu era voliti keimami, era madua vakalevu+ ra qai kila ni vakaoti ga na cakacaka qo ena veitokoni ni neimami Kalou.
17 Ena gauna oya e levu na ivola era vakauta na turaga+ ni Juta vei Topaia, e sauma tale ga vei ira o Topaia.
18 Levu e Juta era bubului mera tokoni koya, ni o koya ga na vugoi Sekanaia na luvei Era,+ o Jionanai na luvena a vakawatitaka na luvena yalewa o Mesulame+ na luvei Perekaia.
19 Era tukuna tiko ga vei au na ka vinaka me baleti koya, ra qai tukuna vua na ka au kaya. E dau vakauta mai vei au o Topaia na ivola me vakarerei au kina.+
