Vei Ira mai Roma 10:1-21
10 Raveitacini, au gadreva dina mai lomaqu kei na noqu masuta na Kalou ena vukudra na Isireli, oya mera bula.+
2 Niu kila nira yalogu dina ena nodra qarava na Kalou,+ ia e sega ni salavata kei na kilaka dodonu.
3 Nira sega ni kauaitaka na yalododonu ni Kalou,+ era via vakadonui ira ga vakataki ira,+ era sega ni vakamalumalumutaki ira ina yalododonu ni Kalou.+
4 Ni sa mai vakaotia na Lawa o Karisito,+ mera okati kina mera yalododonu o ira kece era vakabauta.+
5 E vola o Mosese na yalododonu e salavata kei na Lawa: “Na tamata ena vakayacora na ka qo ena bula kina.”+
6 Ia e kaya na vosa ni Kalou me baleta na yalododonu e vu mai ena vakabauta: “Kua ni kaya e lomamu,+ ‘O cei ena cabe i lomalagi?’+ oya me lai kauti Karisito sobu mai,
7 se ‘O cei ena siro sobu ina qara sega ni vakabotona?’+ ya me lai kauti Karisito cake mai na mate.”
8 Ia na cava e tukuna? E tukuna ni “voleka vei iko na vosa, e gusumu kei na lomamu,”+ ya “na vosa” ni vakabauta eda vunautaka tiko.
9 Ke o tukuna yani e gusumu ni Turaga o Jisu,+ o vakaraitaka tale ga na vakabauta e lomamu ni vakaturi koya mai na mate na Kalou, o na vakabulai.
10 Na nona okati e dua me yalododonu e vakatau ena ka e vakabauta e lomana, ia na nona vakabulai e vakatau ena ka e tusanaka raraba ena gusuna.+
11 Ni kaya na tikinivolatabu: “O koya e vakararavitaka vua na nona vakabauta ena sega ni rarawa.”+
12 Ni rau sega ni duidui na Jiu kei na kai Kirisi.+ E dua ga na Turaga vei keda kece, o koya e dau vakavutuniyautaki* ira kece era masuti koya.
13 “Nira na bula o ira kece era masuta na yaca i Jiova.”*+
14 Ia era na masuti koya vakacava ke ra sega ni vakabauti koya? Era na vakabauti koya vakacava ke ra sega ni rogoca? Era na rogoca vakacava ke sega ni dua e vunautaka vei ira?
15 Era na vunau vakacava ke ra sega ni talai?+ Me vaka e volai: “E totoka dina na yavadra era tukuna na itukutuku vinaka ni ka vinaka!”+
16 Ia era sega ni vakabauta kece na itukutuku vinaka. Ni kaya o Aisea: “I Jiova,* o cei me vakabauta na ka era rogoca vei kedaru?”+
17 O koya gona, ena vakabauti ga na ka ke rogoci na vosa.+ Kena ikuri, e rogoci ga na vosa ke baleti Karisito.
18 Ia meu taro mada, era a sega ni rogoca? Me sega vakacava? “Ni sa roboti vuravura na kedra irogorogo, e yacova yani na iyalayala kece kei vuravura na nodra itukutuku.”+
19 Ia meu taro mada, era a sega ni kila na Isireli?+ E tukuna e liu o Mosese: “Au na vakavuna moni vuvutaki koya e sega ni matanitu. Au na vakavuna moni cata matua na matanitu sesewa.”+
20 Ia e doudou sara o Aisea ni kaya: “Era kunei au o ira era sega ni vaqarai au,+ au vakatakilai au vei ira era a sega ni tarogi au.”+
21 Ia e kaya o koya me baleti Isireli: “Ena siga taucoko, au dodoka ruarua na ligaqu vei ira na matatamata talaidredre ra qai domoqa.”+
