Vei Ira mai Roma 12:1-21
12 O koya gona, au vakamasuti kemuni raveitacini, ena yalololoma ni Kalou, moni solia na yagomuni+ me isoro bula, e savasava,+ e vakadonuya na Kalou, oya me vakayagataki ena veiqaravi tabu na nomuni vakasama kei na yalomatua.+
2 Ni kua ni muria na ivakarau ni veika vakavuravura* qo, me veisautaki na nomuni itovo ni vakavoui na nomuni vakasama,+ moni vakadinata kina+ ni vinaka, e yaga, qai uasivi na loma ni Kalou.
3 Ena vuku ni nona loloma soli wale vei au, au tukuna kina vei kemuni me kua ni dua e sivia na ka e nanuma me baleti koya,+ me yalomatua ga, me qai salavata na ka e nanuma kei na ivakarau ni vakabauta e solia* vua na Kalou.+
4 Me vaka ga na yagoda, e levu na tikina,+ ia e duidui na nodra itavi,
5 e vaka kina o keda. Eda le levu, eda dua ga na yago nida duavata kei Karisito, da qai sema vata kece.+
6 O koya gona, e duidui na isolisoli e votai vei keda me salavata kei na loloma soli wale.+ Ke parofisai, meda parofisai sara me salavata kei na vakabauta e votai vei keda,
7 ke cakacaka vakaitalatala, meda gumatua sara ena noda cakacaka vakaitalatala, se o koya e veivakavulici, me gumatua sara ena nona veivakavulici,+
8 se o koya e veivakauqeti,* me gumatua ena nona veivakauqeti,*+ o koya e wasea na ka,* me wasea ena yalomarau,+ o koya e veidusimaki, me veidusimaki ena nona vinaka kece,+ o koya e yalololoma, me cakava ena marau.+
9 Me kua ni veivakaisini na nomuni loloma.+ Moni cata sara na ka ca,+ ni kabita na ka vinaka.
10 Ni veilomani ena veilomani ni veitacini. Ni dau liu ena nomuni veirokorokovi.+
11 Moni dau mamakutu,* ni kua ni vucesa.*+ Me uqeti kemuni ga na yalo tabu.+ Ni bobula i Jiova.*+
12 Ni marau ena vuku ni nomuni inuinui. Ni vosota na veivakacacani.+ Ni gumatua ena masu.+
13 Wasea vei ira na yalosavasava na ka era gadreva.+ Dau veikauaitaki.+
14 Masulaki ira tiko ga era vakacacani kemuni,+ vosa vinaka vei ira, kua ni vosavakacacataki ira.+
15 Marau vata kei ira era marau, tagi vata kei ira era tagi.
16 Me tautauvata na ivakarau ni nomuni raici kemuni kei na nomuni raici ira eso tale. Me kua ni qaciqacia na nomuni vakasama, moni yalomalumalumu ga.+ Ni kua ni nanuma ni oni sa vuku.+
17 Kua ni sauma na ca e caka vei kemuni.+ Vakasamataka na ka vinaka moni cakava vei ira na tamata kece.
18 Ke rawa, saga moni veiyaloni kei ira na tamata kece.+
19 Kemuni na taciqu lomani, ni kua ni sauma na ca e caka vei kemuni, ni laiva ga me qai sauma na Kalou,+ ni volai: “‘E noqu na veisausaumi, au na sauma,’ e kaya o Jiova.”*+
20 Ia “ke viakana na kemu meca, vakania, ke viagunu, vagunuva, ni o cakava qo o sa binia tiko na qilaiso waqa e uluna.”*+
21 Me kua ni rawai iko na ca, mo rawa tiko ga na ca ena vinaka.+
iVakamacala e ra
^ Se “ni itabagauna qo.” Raica na iVakamacala ni Vosa.
^ Se “wasea.”
^ Se “veivakadreti.”
^ Se “veivakadreti.”
^ Se “cau.”
^ Se “gugumatua.”
^ Se “ni kua ni mokusiga ena nomuni cakacaka.”
^ Oya me vakaotia nona yalokaukaua e dua, me yalomalumalumu.
