Vei Ira mai Roma 14:1-23
14 Ke dua e malumalumu nona vakabauta,+ ciqomi koya ga, kua ni vakalewa na duidui ni rai.*
2 O koya e vakabauta e kania na ka kece ga, ia o koya e malumalumu e kania ga na kakanadraudrau.
3 O koya e kana, me kua ni beci koya e sega ni kana, o koya tale ga e sega ni kana me kua ni vakalewai koya e kana,+ ni ciqomi koya qori na Kalou.
4 O cei o iko mo vakalewa na nona dauveiqaravi e dua tale?+ Nona ciqomi se sega e vakatau sara ga vua na nona turaga.+ Ena rawa ni ciqomi dina o koya ena veivuke i Jiova.*
5 E dua na tamata e okata me bibi e dua na siga mai na vo ni siga,+ e dua tale e okata mera tautauvata kece ga na siga.+ Me vakadeitaka na tamata yadua na ka e nanuma.
6 O koya e rokova e dua na siga ni bibi vua, e rokova ena vuku i Jiova.* O koya tale ga e kana, e kana ena vuku i Jiova,* baleta ni vakavinavinaka vua na Kalou.+ O koya tale ga e sega ni kana e sega ni kana ena vuku i Jiova,* ia e vakavinavinaka vua na Kalou.+
7 Sega ni dua vei keda e bula ena vukuna ga,+ e sega tale ga ni dua e mate ena vukuna ga.
8 Ke da bula, eda bula ena vuku i Jiova,*+ ke da mate, eda mate ena vuku i Jiova.* O koya gona, se da bula se da mate, eda nei Jiova.*+
9 Oya sara ga na vuna e mate kina o Karisito qai bula tale, me rawa ni nodra Turaga na mate kei ira na bula.+
10 Na cava gona mo vakalewa kina na tacimu?+ Se cava o beca kina na tacimu? Nida na tu kece ena mata ni idabedabe ni veilewai ni Kalou,+
11 ni volai: “‘Me vaka ga niu bula tiko,’+ e kaya o Jiova,* ‘ena tekiduru e mataqu na tamata kece, ena vakatusa tale ga na yame kece ni o yau na Kalou.’”+
12 Eda na dui saumitaro gona vua na Kalou.+
13 O koya gona, sa rauta mada na veivakalewai,+ qo ga na ka moni vakadeitaka, ni kua ni biuta e dua na ka me tarabe se bale kina na tacimuni.+
14 Au kila, au vakabauta tale ga ena veiuqeti ni Turaga o Jisu ni sega ni dua na ka e nakiti me dukadukali,+ ena dukadukali ga vei koya e nanuma ni dukadukali.
15 Ke o vakaleqa na tacimu ena vuku ni kakana, o sa sega ni lako tiko ena loloma.+ Kua ni vakalaiva na kemu kakana me vakavuna nona rusa* o koya a mate ena vukuna o Karisito.+
16 O koya gona, kua ni vakalaiva me vosavakacacataki na ka vinaka oni cakava.
17 Ni sega ni ka ni kana se gunu na Matanitu ni Kalou,+ e ka ga ni yalododonu, veiyaloni, kei na marau ena yalo tabu.
18 O koya e bobula i Karisito ena sala qo e vakadonui koya na Kalou, era taleitaki koya tale ga na tamata.
19 O koya gona, meda guta mada ga na bula veiyaloni+ kei na ka ena vakauqeti keda yadua.+
20 Ni kua ni talaraka sobu tiko na cakacaka ni Kalou ena vuku wale ga ni kakana.+ E dina ni savasava na ka kece, ia ena veivakaleqai ke dua e kana qai vakatarabetaka e dua tale.+
21 E vinaka mo kua ni kana lewe ni manumanu, se gunu waini, se cakava e dua tale na ka ena tarabe kina na tacimu.+
22 Me tiko ga vei iko na nomu vakabauta, qori e nomu ga kei na Kalou. E marau o koya e sega ni beitaki koya na lomana ena ka e sa lewa me cakava.
23 Ia ke lomalomarua, sa na cala ke kana, ni sega ni kana ena vakabauta. Io, e okati me ivalavala ca na ka kece e sega ni yavutaki ena vakabauta.
iVakamacala e ra
^ Se rawa ni, “lomatarotaro.”
^ Oya me vakarusai se vakaleqai na nodra vakabauta se inuinui me baleta nodra bula tawamudu mai muri.
