Vei Ira mai Roma 5:1-21
5 Ia qo nida sa okati meda yalododonu ena vuku ni vakabauta,+ meda saga sara meda veiyaloni tiko ga kei na Kalou ena vuku ni noda Turaga o Jisu Karisito.+
2 Na noda vakabauti koya tale ga eda rawa ni torova kina na Kalou me sobuti keda na nona loloma soli wale eda sa mai vakila tiko ena gauna qo,+ eda marau tale ga nida nuitaka meda taukena na lagilagi ni Kalou.
3 E sega ni o koya ga ya, meda marau tale ga nida vakararawataki,+ nida kila ni na vulici na vosota ena ka rarawa e sotavi,+
4 ia na vosota ena qai rawati kina na veivakadonui,+ na veivakadonui ena rawati kina na inuinui,+
5 ia na inuinui ena sega ni veivakamaduataki,+ ni sa solia vei keda na Kalou na yalona tabu me vakasinaita na lomada ena nona loloma.+
6 Nida se malumalumu tu,+ sa mai mate na Karisito ena kena gauna lokuci ena vuku ni tamata ivalavala ca.
7 De na bolea cake e dua me mate ena vuku ni tamata vinaka, sega soti ena vukuna e dua e yalododonu.
8 Ia e vakaraitaka na Kalou na nona lomani keda ni mai mate na Karisito ena vukuda nida se ivalavala ca tu.+
9 O koya gona, nida sa vakadonui ena nona dra,+ eda sa vakabulai ena vukuna mai na cudru ni Kalou.+
10 Eda a veimecaki tu kei na Kalou, eda sa mai veiyaloni kei koya ena mate i Luvena.+ Ia qo nida sa veiyaloni kei na Kalou, eda sa rawa ni nuidei nida na vakabulai, ni sa bula tiko o koya.
11 Sega ni o koya ga ya, eda vakacaucautaka tale ga na Kalou ena vuku ni noda Turaga o Jisu Karisito nida mai veiyaloni tale kei na Kalou ena vukuna.+
12 O koya gona, ena vuku ni dua ga na tamata e curu kina i vuravura na ivalavala ca, kei na mate ena vuku ni ivalavala ca,+ mani dewa na mate vei ira na tamata kece ga ni sa valavala ca na tamata kece ga+—.
13 Sa tu e vuravura na ivalavala ca ni bera na Lawa, ia a sega ni vakacalai e dua me ivalavala ca ni a sega na lawa.+
14 Ia e veiliutaki voli o mate me vaka na tui me tekivu vei Atama me yaco vei Mosese, vei ira sara mada ga era a sega ni valavala ca me vaka na ivalavala ca i Atama. Ena so na sala e tautauvata kina o Atama kei koya ena lako mai.+
15 Ia na iloloma e duatani mai na ivalavala ca. Baleta na nona ivalavala ca e le dua era mate kina e levu, ia na loloma soli wale ni Kalou kei na nona iloloma, vaka tale ga kina na nona loloma soli wale e le dua na tamata+ o Jisu Karisito, e sega ni tukuni rawa na kena yaga vei ira e levu!+
16 E duidui tale ga na ka e yaco ena iloloma mai na ka e yaco ena nona ivalavala ca e le dua.+ Na lewa e tau ena nona ivalavala ca e le dua era tini cudruvi kina e le levu,+ ia na iloloma e vakarautaki me baleta na nodra ivalavala ca e le levu era tini okati kina e le levu mera yalododonu.+
17 Ke sa rawa ni veiliutaki me vaka na tui o mate ena vuku ni nona ivalavala ca e le dua ga na tamata,+ me qai dredre vakacava nira bula ra qai veiliutaki vakatui+ e le levu ena vuku ni le dua ga, o Jisu Karisito,+ me salavata kei na levu ni nona yalololoma na Kalou kei na yalododonu e soli wale!+
18 O koya gona, e cudruvi na mataqali tamata kece ena vuku ni dua ga na cala,+ ena dua tale ga na ivalavala dodonu e vakadonui kina me bula+ na mataqali tamata kece.+
19 Ena nona talaidredre gona e dua ga na tamata e okati kina e levu mera ivalavala ca,+ ia na nona talairawarawa e dua ga na tamata era na okati kina e levu mera yalododonu.+
20 Ni curu mai na Lawa e vakavotuya e levu na ivalavala ca.+ Ia ni sa levu na ivalavala ca, sa qai levu sara na loloma soli wale.
21 Cava na kena inaki? Me vaka na nona veiliutaki voli vakatui o ivalavala ca kei mate,+ ena veiliutaki tale ga vakatui ena yalododonu na loloma soli wale, me rawati kina na bula tawamudu ena vuku i Jisu Karisito na noda Turaga.+
