Ruci 1:1-22
1 Ena gauna era lewa* kina na turaganilewa,+ e dausiga na vanua, e mani biubiu mai Peceliema+ e Juta e dua na turaga me lai tiko vulagi ena vanua* o Moapi,+ o koya, o watina, kei rau na luvena tagane.
2 Na yaca ni turaga qo o Elimeleki,* na yaca i watina o Neomai,* na yacadrau na luvena tagane o Maloni* kei Kilioni.* Eratou turaga ni Efiraca mai Peceliema e Juta. Eratou yaco sara ena vanua o Moapi, eratou tiko ga kina.
3 Oti toka e dua na gauna, e qai mate o Elimeleki na wati Neomai, sa qai vo ga o koya kei rau na luvena tagane.
4 Erau vakawatitaka sara na tagane qo e rua na yalewa ni Moapi, e dua vei rau na yacana o Oripa, e dua tale na yacana o Ruci.+ Eratou tiko ga e kea me rauta ni tini na yabaki.
5 Oti erau mate tale ga na tagane o Maloni kei Kilioni qai vo toka ga na marama qo, ni rau sa yali na luvena kei na watina.
6 E cavutu sara o koya kei rau na vugona me ratou biuta na vanua o Moapi, ni rogoca e Moapi ni kauaitaki ira na nona tamata o Jiova, ni solia vei ira na kakana.*
7 E biuta mai o koya na vanua a vakaitikotiko kina kei rau na vugona. Ni ratou taubale tiko e gaunisala me ratou lesu ina vanua o Juta,
8 e kaya sara o Neomai vei rau na vugona: “Drau lako, drau dui lesu ina vale i tinamudrau. Me dei mada ga nona lomani kemudrau+ o Jiova me vaka ga drau vakaraitaka vei rau na tagane sa mate, vei au tale ga.
9 Me solia* mada ga vei kemudrau o Jiova mo drau dui kunea na vakacegu* ena vale nei watimudrau.”+ E reguci rau sara, eratou veitagicaki ena domolevu.
10 Erau kaya tiko ga vua: “Me kua, keirau na lesu vata kei iko vei ira na kainomu.”
11 Ia e kaya o Neomai: “Drau lesu na luvequ. Na cava me datou lako vata kina? Au se rawa ni vakasucuma e rua na luvequ tagane me rau watimudrau?+
12 Drau lesu na luvequ. Drau lako, niu sa rui qase meu vakawati tale. Keu vakanuinui mada ga meu vakawati tale ena bogi nikua, meu vakasucuma tale ga e rua na luvequ tagane,
13 drau na waraki rau tiko ga me rau cauravou? Vakacava, drau na sega ni vakawati ena vukudrau? Me kua kemudrau na luvequ, au sa rarawa vakalevu ena vukumudrau ni totogitaki au+ na liga i Jiova.”
14 Eratou veitagicaki tale ena domolevu, oti e reguci vugona o Oripa mani gole yani. Ia o Ruci e kabiti koya tiko ga.
15 E kaya sara o Neomai: “Raica! O karuamu yada, sa lesu vei ira na kainona kei ira na nona kalou. Mo lesu vata kei karuamu.”
16 Ia e kaya o Ruci: “Mo kua ni cikevi au meu biuti iko, meu kua ni tomani iko, na vanua o lako kina au na lako kina, na vanua o tiko kina ena bogi au na tiko kina. Na kainomu era na kainoqu, na nomu Kalou ena noqu Kalou.+
17 Na vanua o mate kina au na mate kina, au na bulu tale ga kina. Me vakayacora mada ga vei au o Jiova me kuria tale ga, ke dua na ka me tawasei kedaru, o mate duadua ga.”
18 Ni raica o Neomai ni cike tiko ga o Ruci me tomani koya, sa qai cegu ni vakamasuti koya.
19 Erau tomana tiko nodrau ilakolako me yaco i Peceliema.+ Ni rau yaco ga i Peceliema, era veitalanoataki rau sara na lewenikoro taucoko, era kaya na yalewa: “O Neomai qo?”
20 E kaya o koya vei ira na yalewa: “Ni kua ni kacivi au Neomai.* Ni kacivi au ga Mara,* ni vakararawataka vakalevu na noqu bula+ o koya e Kaukaua Duadua.
21 Au sinai tu niu gole yani, ia niu sa ligalala e qai vakalesui au mai o Jiova. Na cava moni kacivi au kina Neomai, ni saqati au o Jiova qai vakararawataki au+ o koya e Kaukaua Duadua?”
22 Qo gona na ilakolako nei Neomai ni biuta mai na vanua o Moapi+ kei na vugona o Ruci na yalewa ni Moapi. Erau yaco i Peceliema ni sa tekivu tamusuki na varile.+
iVakamacala e ra
^ Ipe., “veiliutaki.”
^ Se “yasayasa.”
^ Kena ibalebale “E Tui na Noqu Kalou.”
^ Kena ibalebale “Au Marau.”
^ Rairai yavutaki ena vosa vakaIperiu e kena ibalebale “malumalumu, tautauvimate.”
^ Kena ibalebale “Malumalumu, Voleka ni Mate.”
^ Ipe., “madrai.”
^ Ipe., “na ivakavakacegu.”
^ Se “lolomataka.”
^ Kena ibalebale “Au Marau.”
^ Kena ibalebale “Rarawa.”
