Ruci 2:1-23
2 E dua na wekai wati Neomai na yacana o Poasa+ ena vuvale nei Elimeleki, e turaga vutuniyau.
2 E qai kaya vei Neomai o Ruci na yalewa ni Moapi: “Au kerekere meu lako mada ina were meu tomika+ eso na sola ni varile niu vakamuri koya tiko ena lomani au.” E mani tukuna vua o Neomai: “Mo lako luvequ.”
3 E lako sara yani me tomitomi ena were ni muri ira tiko na dautatamusuki. E vakacalaka ga nona butuka yani na tikiniqele nei Poasa,+ ena vuvale i Elimeleki.+
4 E lesu mai Peceliema ena gauna qori o Poasa, e kaya vei ira na dautatamusuki: “Me tiko vata kei kemuni o Jiova.” Era qai tukuna vua: “Me vakalougatataki kemuni o Jiova.”
5 E kaya sara o Poasa vua na cauravou e liutaki ira tiko na dautatamusuki: “E lako mai vei na goneyalewa qo?”
6 E sauma yani na cauravou e liutaki ira tiko na dautatamusuki: “E goneyalewa ni Moapi,+ e lesu vata mai kei Neomai mai na vanua o Moapi.+
7 E kerea na yalewa, ‘Yalovinaka, meu tomitomi+ mada, meu kumukumuni ena maliwa ni sola* ni covuata sa musu oti era biuta tu mai na dautatamusuki?’ Ni yaco mai ena mataka nikua se tucake tiko ga me yacova qo, se qai dabe sara ga e vale me cegu vakalailai.”
8 E qai tukuna vei Ruci o Poasa: “Mo rogoci au mada, luvequ. Kua ni lai tomitomi ena dua tale na were se mo lako ina dua tale na vanua, mo volekati ira tiko ga na noqu goneyalewa.+
9 Mo raica tiko ga na were era tamusuka, mo lako vata kei ira. Au sa vakaroti ira na cauravou mera kua ni tarai* iko. Ni o viagunu mo lai gunu ena saqa wai, ena ka era takiva mai na cauravou.”
10 E mani tekiduru me cuva sobu ina qele qai kaya vua: “E rawa ni lomani au vakacava na matamuni moni kauaitaki au niu vulagi?”+
11 E tukuna vua o Poasa: “Sa tukuni taucoko vei au na ka kece o cakava vua na vugomu ni sa mate o watimu, vaka kina ni o biuti tamamu, o tinamu, kei na vanua era tiko kina na wekamu mo lako vei ira na tamata o sega mada ga ni kila e liu.+
12 Me vakaicovitaki iko mada ga o Jiova ena ka o cakava,+ me saumi* iko vakavinaka tale ga o Jiova na Kalou ni Isireli, o mai qara ivakaruru+ e ruku ni tabana.”
13 E mani kaya na yalewa: “Meu nanumi mada ga e matamuni noqu turaga, ni oni vakacegui au, oni vosa vakayalovinaka vua na nomuni dauveiqaravi, ia au sega mada ga ni dua vei ira na nomuni dauveiqaravi.”
14 E kaya vua o Poasa ena gauna ni kana: “Lako mai mo kania eso na madrai, mo tokoca na kemu ena viniqa.” E dabe sara o koya ena yasadra na dautatamusuki. E solia vua o Poasa eso na covuata tavu, e kania, e mamau, sa qai vo tu eso.
15 Ni tucake me tomitomi,+ e vakaroti ira na nona cauravou o Poasa: “Me tomitomi o koya ena maliwa ni sola ni covuata sa musu oti, ni kua ni vosataki koya.+
16 Moni nanuma tale ga moni dreta mai eso na sola ni covuata mai na ivau me nona, moni biuta tu mai me qai tomika, ni kua ni tukuna e dua na ka moni tarovi koya kina.”
17 E tomitomi tiko ga o koya ena were me lai yakavi.+ Ni samuta na ka e tomika, e rauta ni dua na efa* na varile.
18 E mani taura me lako ina koro, e raica o vugona na ka e tomika. E taura tale ga mai o Ruci na kakana e vakavoca+ ni sa mamau me solia vua.
19 E tukuna vua o vugona: “O tomitomi e vei nikua? O cakacaka e vei? Me vakalougatataki+ mada ga o koya e kauaitaki iko.” E qai tukuna vei vugona se o cei e cakacaka kina, e kaya: “Na yaca ni turaga au cakacaka kina nikua o Poasa.”
20 E kaya sara o Neomai vei vugona: “Me vakalougatataki koya mada ga o Jiova, ni dei tu ga nona lomani ira na bula kei ira na mate.”+ E tomana o Neomai: “E wekadaru+ na turaga qori. E dua vei ira na voli kedaru lesu.”*+
21 E qai kaya o Ruci na yalewa ni Moapi: “E tukuna tale ga vei au, ‘Mo volekati ira tiko ga na noqu gone mera tamusuka oti mada noqu varile taucoko.’”+
22 E kaya o Neomai vei Ruci na vugona: “Vinaka sara ga luvequ ni o lako vata kei ira nona goneyalewa, mera kua ni vakasagai iko o ira na tiko ena dua tale na were.”
23 E mani tomitomi volekati ira tiko ga na goneyalewa nei Poasa o koya me cava sara na tamusuki varile+ kei na tamusuki witi. E tiko voli ga kei vugona+ o koya.
iVakamacala e ra
^ Se rawa ni, “ivesu.”
^ Se “vakasosani.”
^ Se “isau taucoko.”
^ Se “dua vei ira na wekadaru e dodonu me veivoli lesu.”
