Ruci 3:1-18
3 E kaya vua o Neomai na vugona: “Luvequ, vakacava meu qara e dua na nomu vale* e vinaka vei iko?+
2 E sega ni wekadaru+ o Poasa? O dau maliwai ira na nona goneyalewa. Ena bogi nikua ena kuretaki varile tiko ena rara ni butu covuata.
3 Mo lai sili, lumu ena waiwai boivinaka, mo vakaisulu* qai lako sobu ina rara ni butu covuata. Me kua sara ni kila o koya ni o tiko, me oti mada nona kana kei na gunu.
4 Ni lai davo, mo raica na vanua e davo kina, mo lai cereka na iubi ni yavana, mo davo. Ena qai tukuna vei iko na ka mo cakava.”
5 E mani kaya o Ruci: “Au na vakayacora na ka kece o tukuna vei au.”
6 E lako sobu sara ina rara ni butu covuata, e cakava na ka kece e vakaroti koya kina o vugona.
7 Ia o Poasa, e kana e gunu, e marau na lomana. E lai davo ena mua ni ibinibini covuata. Oti ya e lako lo yani o Ruci, e cereka na iubi ni yavana qai davo.
8 Ena lomalomanibogi e tekivu ninini na tagane, mani dabe qai raica ni davo volekata tiko na yavana e dua na yalewa.
9 E kaya yani: “O cei o iko?” E sauma na yalewa: “O yau o Ruci na nomuni dauveiqaravi. Moni tevuka mada na nomuni isulu* me ubi kina na nomuni dauveiqaravi, ni oni dauveivoli lesu.”+
10 E tukuna o koya: “Me vakalougatataki iko mada ga o Jiova, luvequ. O vakaraitaka ni dei vakalevu nomu loloma ena ka o cakava e muri qo ni vakatauvatani kei na ka o cakava e liu,+ ni o sega ni lakovi ira na cauravou dravudravua se vutuniyau.
11 Ia qo luvequ, mo kua ni rere. Na ka kece o tukuna au na vakayacora vei iko,+ nira kila kece na tiko ena koro* ni o dua na yalewa vinaka.
12 E dina niu dua na dauveivoli lesu,+ e tiko e dua na dauveivoli lesu dou veiwekani voleka sara, au yawa o yau.+
13 Mo moce eke ena bogi nikua, ke voli iko lesu ena mataka, e vinaka oya! Me voli iko lesu+ o koya. Ia ke sega ni via voli iko lesu, au na qai voli iko lesu, me vaka ga ni bula tiko o Jiova. Mo davo ga eke me yacova na mataka.”
14 E mani davo volekata toka na yavana me yacova na mataka qai duri ni se butobuto ni bera ni dua e laurai. E kaya o Poasa: “Mo kua ni tukuna vua e dua ni gole mai ena rara ni butu covuata e dua na yalewa.
15 E kaya tale ga: “Kauta mai na iovi o dara tiko mo tevuka.” E tevuka sara o Ruci, e biuta kina o Poasa e ono na ivakarau* varile, e biuta vua qai gole ina koro.
16 E gole yani o Ruci vei vugona, e kaya mai: “Vakacava* luvequ?” E tukuna vua na ka kece e cakava vua na turaga oya.
17 E kaya tale: “E solia vei au na ono na ivakarau varile qo qai kaya vei au, ‘Mo kua ni ligalala ni o lako vei vugomu.’”
18 E kaya o Neomai: “Dabe toka eke luvequ mo kila mada na ka ena yaco, ena qai vakacegu na turaga oya ni sa macala nikua e dua na ka.”
iVakamacala e ra
^ Ipe., “ivakavakacegu.”
^ Se “dara nomu isulu e sau.”
^ Se “bele ni nomu isulu.”
^ Ipe., “nodra matamata kece na noqu tamata.”
^ Ipe., “O cei qori?”
