Sakaraia 1:1-21
1 Ena ikawalu ni vula ena ikarua ni yabaki i Taraiasi,+ e vosa o Jiova vua na parofita o Sakaraia*+ na luvei Perekaia na luvei Ito, e kaya:
2 “E cudruvi ira vakalevu na tamamuni o Jiova.+
3 “Mo kaya vei ira, ‘Qo na ka e tukuna o Jiova ni lewe vuqa:* “‘Moni lesu mai vei au,’ e kaya o Jiova ni lewe vuqa, ‘au na qai lesuvi kemuni,’+ e kaya o Jiova ni lewe vuqa.”’
4 “‘Moni kua ni vakataki ira na tamamuni era vosa kina na parofita ena gauna e liu: “Qo na ka e tukuna o Jiova ni lewe vuqa, ‘Yalovinaka, moni biuta na nomuni itovo ca kei na nomuni ivakarau ca.’”’+
“‘Ia era sega ni rogoca, era sega ni vakarorogo vei au,’+ e kaya o Jiova.
5 “‘Era sa tu e vei na tamamuni ena gauna qo? Era bula tu ga na parofita?
6 Ia na noqu vosa kei na noqu ivakaro au vakaroti ira kina na noqu dauveiqaravi na parofita, e vauci ira tale ga na tamamuni se sega?’+ Era mani lesu mai vei au, era kaya: ‘Na ka e cakava vei keda o Jiova ni lewe vuqa e salavata kei na noda itovo kei na noda ivalavala, me vaka na ka e nanuma me cakava.’”+
7 Ena ika24 ni siga ena ika11 ni vula, oya na vula o Sipati,* ena ikarua ni yabaki i Taraiasi,+ e vosa o Jiova vua na parofita o Sakaraia na luvei Perekaia na luvei Ito, e kaya:
8 “Au raivotu ena bogi. E dua na tamata e vodoka tiko e dua na ose damu, e duri vakadua tu ena maliwa ni vunimateli ena qakilo, era tu mai dakuna na ose damu, na ose damu siawa, kei na ose vula.”
9 Au qai kaya: “O cei o ira qo noqu turaga?”
E kaya na agilosi keirau veivosaki tiko: “Au na vakaraitaka vei iko se o cei o ira qori.”
10 E qai kaya mai na tamata e duri tu vakadua ena maliwa ni vunimateli: “E talai ira mai qo o Jiova mera veilakoyaki e vuravura.”
11 Era kaya vua na agilosi i Jiova e duri tu ena maliwa ni vunimateli: “Keimami a veilakoyaki e vuravura, raica! e vakanomodi o vuravura taucoko, e sega ni yavalati.”+
12 E kaya yani na agilosi i Jiova: “Kemuni Jiova ni lewe vuqa, ena vakacava na dede ni nomuni sega ni yalololoma vei Jerusalemi kei na koro kece e Juta,+ oni cudruva tu me 70 na yabaki?”+
13 E vosa o Jiova vua na agilosi keirau a veivosaki tiko ena vosa vinaka e veivakacegui.
14 E kaya vei au na agilosi keirau a veivosaki tiko: “Mo kacivaka, ‘Qo na ka e tukuna o Jiova ni lewe vuqa: “Au vuvutaki Jerusalemi kei Saioni ena vuvu levu.+
15 Ena cudru levu au cudruvi ira kina na veimatanitu era tikovakacegu,+ niu cudru ga vakalailai+ era qai kuria na ca.”’+
16 “Ia qo na ka e tukuna o Jiova: ‘“Au na lesu i Jerusalemi ena yalololoma,+ ena tara tale kina na noqu vale,”+ e kaya o Jiova ni lewe vuqa, “ena dodoki e Jerusalemi e dua na wa ivakarau.”’+
17 “Mo kacivaka tale mo kaya, ‘Qo na ka e tukuna o Jiova ni lewe vuqa: “Ena vuabale tale ena noqu koro na ka vinaka, ena vakacegui Saioni tale+ o Jiova, ena digitaki Jerusalemi tale.”’”+
18 Au qai tacake au raica e va na ileu.+
19 Au mani taroga na agilosi keirau veivosaki tiko: “Na cava qo?” E kaya o koya: “Qo na ileu era vakasavi Juta,+ Isireli,+ kei Jerusalemi.”+
20 E vakaraitaka sara vei au o Jiova e va na matai.
21 Au taroga: “Na cava eratou mai cakava?”
E kaya o koya: “Qo na ileu era vakasavi Juta me kua sara ni dua e vakaduria cake na uluna. O ira na kena vo qo era na lako mai mera vakarerei ira, mera biuta sobu na nodra ileu na veimatanitu era laveta cake na nodra ileu mera saqata na vanua o Juta, mera vakasavi koya.”
