Sakaraia 4:1-14
4 E lesu mai na agilosi keirau a veivosaki tiko me vakayadrati au, me vaka ni vakayadrati e dua e moce tu.
2 E kaya sara vei au: “Na cava o raica?”
Au mani kaya: “Au raica e dua na itutu ni cina e koula taucoko+ qai toka e delana e dua na bilo. E toka e delana e vitu na kena cina,+ io e vitu, e vitu na kena paipo.
3 E toka e yasana e rua na vuniolive,+ e dua ena yasana imatau ni bilo, e dua tale ena yasana imawi.”
4 Au qai taroga na agilosi keirau a veivosaki tiko: “Na cava na ibalebale ni ka kece qo, noqu turaga?”
5 E taroga na agilosi keirau veivosaki tiko: “O sega ni kila na ibalebale ni ka qo?”
Au kaya: “Sega noqu turaga.”
6 E tukuna vei au o koya: “Qo na vosa i Jiova vei Serupepeli, ‘“E sega ena vuku ni mataivalu se kaukaua,+ ia ena yaloqu ga,”+ e kaya o Jiova ni lewe vuqa.*
7 O cei o iko, ulunivanua levu? O na vuki mo vanua tautauvata+ e mata i Serupepeli.+ Ena kauta mai o koya na vatu e toka e cake, ena kailavaki: “E totoka! E totoka!”’”
8 E vosa tale vei au o Jiova, e kaya:
9 “Na liga i Serupepeli e tauyavutaka na vale qo,+ ena vakaotia tale ga na ligana.+ Oni na qai kila ni o Jiova ni lewe vuqa e talai au mai vei kemuni.
10 O cei e beca na siga e tekivu kina na ka lalai?+ Era na marau nira raica na ivakarau* e liga i Serupepeli. Na vitu na mata i Jiova qo e veiraiyaki tiko e vuravura taucoko.”+
11 Au qai tarogi koya: “Na cava na ibalebale ni rua na vuniolive e toka ena yasa imatau kei na yasa imawi ni itutu ni cina?”+
12 Au tarogi koya ena ikarua ni gauna: “Na cava na ibalebale ni rua na taba* ni vuniolive e vakadrodroya tiko na waiwai koula ena rua na paipo koula?”
13 E mani tarogi au o koya: “O sega ni kila na ibalebale ni ka qo?”
Au kaya: “Sega noqu turaga.”
14 E kaya o koya: “Erau lumuti o rau na duri tu qo e yasa ni Turaga ni vuravura taucoko.”+
iVakamacala e ra
^ Qo na mataivalu vakalomalagi.
^ Ipe., “na vatu, na tini.”
^ Oya na tabanikau e tiko kina na vuana.
