Same 107:1-43
(Same 107-150)
107 Vakavinavinaka vei Jiova, ni vinaka o koya,+E tawamudu na dei ni nona loloma.+
2 Mera kaya qo o ira e vakalesuya* mai o Jiova,O ira e vakalesuya o koya mai na liga* ni meca.+
3 O ira e kumuna vata mai na veivanua,+Mai na tokalau, kei na ra,*Mai na vualiku, kei na ceva.+
4 Era veilakoyaki voli ena vanua talasiga, ena vanua dravuisiga,Era sega ni kunea na sala ina koro mera tiko kina.
5 Era walokai ra qai karamaca,Era malumalumu nira sa wawale.
6 Era vuki tagi vei Jiova ena nodra rarawa,+E vakabulai ira o koya mai na nodra rarawa.+
7 E dusimaki ira mera muria na sala dodonu+Mera lako ina koro mera tiko kina.+
8 Mera vakavinavinaka vei Jiova+ ena vuku ni dei ni nona lolomaKei na nona cakacaka veivakurabuitaki ena vukudra na luve ni tamata.+
9 Ni vakacegui ira na karamaca o koya,Qai vakasinaiti ira na walokai ena veika vinaka.+
10 Eso era a bula tiko ena butobuto loaloa,Era vesuki ena rarawa kei na kaukamea.
11 Nira sa talaidredre ena vosa ni Kalou,Era beca na nona ivakasala o koya e Cecere Duadua.+
12 E mani vakamalumutaka na lomadra ena veika dredre,+Era tarabe, qai sega ni dua me vukei ira.
13 Era kaci vei Jiova mera vukei ena nodra rarawa,E vakabulai ira o koya mai na nodra leqa.
14 E kauti ira tani mai na butobuto loaloa,Qai basuraka o koya na kedra ivesu.+
15 Mera vakavinavinaka vei Jiova na tamata ena vuku ni dei ni nona loloma+Kei na nona cakacaka veivakurabuitaki ena vukudra na luve ni tamata.
16 Ni sa basuka o koya na katuba kopaQai musulaka na ivakadei kaukamea.+
17 Era lialia qai vakila na rarawa+Ena vuku ni nodra valavala ca kei na nodra cala.+
18 Era sega ni via kania e dua na kakana,Era sa toro voleka ina matamata ni mate.
19 Era dau kaci ni kere veivuke vei Jiova ena nodra rarawa,E dau vakabulai ira o koya mai na nodra leqa.
20 E dau tala yani na nona vosa qai vakabulai ira+E vakabulai ira tale ga mai na qara era sikalutu kina.
21 Mera vakavinavinaka vei Jiova na tamata ena vuku ni dei ni nona lolomaKei na nona cakacaka veivakurabuitaki ena vukudra na luve ni tamata.
22 Mera cabora na isoro ni vakavinavinaka+Qai kaila ena marau nira vakatakila na nona cakacaka.
23 O ira na soko ena waqa e wasawasa,Era dau cakava nodra veivoli ena wailevu,+
24 Era sa raica na cakacaka i JiovaKei na nona cakacaka veivakurabuitaki ena wasa titobu,+
25 Ena nona vosa e liwa kina na cagi kaukaua,+E vakatubura na biau ni wasawasa.
26 Era tubu cake i macawa,Era lutu sobu ina vanua titobu.
E waicala nodra doudou ena vuku ni leqa sa vakarau yaco.
27 Era tataivatia qai taceba me vaka na mateni,Qai tawayaga kece na nodra kila.+
28 Era qai tagi vei Jiova ena nodra rarawa,+Qai vakabulai ira o koya mai na nodra leqa.
29 E vakaruruya o koya na cagi kaukaua,E maravu na biau ni wasawasa.+
30 Era marau vakalevu ni sa tu vakadua,Qai liutaki ira o koya ina toba era via tiko kina.
31 Mera vakavinavinaka vei Jiova na tamata ena vuku ni dei ni nona lolomaKei na nona cakacaka veivakurabuitaki ena vukudra na luve ni tamata.+
32 Mera vakacerecerei koya ena nodra ivavakoso na tamata,+Mera vakacaucautaki koya tale ga ena nodra matabose* na qase.
33 E vukica na uciwai me vanua dravuisigaKei na waivure me qele mamaca.+
34 Na vanua bulabula me vanualala tuituina,+Ena vuku ni nodra caka ca na tiko kina.
35 E vukica na vanua dravuisiga me tobu ni kuta,Kei na qele mamaca me waivure.+
36 E vakavuna o koya mera tiko e kea na walokai,+Mera tauyavutaka kina e dua na koro mera tiko kina.+
37 Era kakaburaki ena veiwere qai tea na loganivaini+E vuataka na vuata vinaka.+
38 E vakalougatataki ira, ra qai le levu mai,E sega ni laiva me lailai na nodra bulumakau.+
39 Ia era le lailai tale qai vakamadualakiEna vuku ni veivakasaurarataki, leqa, kei na yaluma.
40 E vosabeci ira na turaga o koyaQai vakavuna mera veilakoyaki voli ena vanua lala, e sega na kena gaunisala.+
41 Ia e taqomaka* o koya na dravudravua mai na veivakasaurarataki+Qai vakalevutaka na nodra vuvale me vaka na qelenisipi.
42 E raica qo na yalododonu qai marau vakalevu,+Ia era sogota kece na gusudra na tawayalododonu.+
43 O koya ga e vuku ena vakaraica na veika qo+Qai vakasamataka vinaka na cakacaka i Jiova ni laurai kina na dei ni nona loloma.+
iVakamacala e ra
^ Se “O ira sa volia lesu.”
^ Se “mai na kaukaua.”
^ Se “Mai na icabecabe ni siga, kei na idromudromu ni siga.”
^ Ipe., “idabedabe.”
^ Se “e biuta sara i cake,” oya me kua ni yacovi rawa.
