Taniela 10:1-21
10 Ena ikatolu ni yabaki nei Tui Sairusi+ e Perisia e vakaraitaki e dua na itukutuku vei Taniela na yacana tale ga o Pelitisasari,+ e dina na itukutuku qo, e vauci tiko kina e dua na ivalu levu. E kila o koya na itukutuku qo qai vakamacalataki vua na ibalebale ni ka e raica.
2 Ena gauna oya, o yau o Taniela au lolosi+ tiko me tolu taucoko na macawa.
3 Au sega ni kania na kakana vinaka, au sega ni kania na lewe ni manumanu, se gunu waini, au sega ni lumulumu me tolu taucoko na macawa.
4 Ena ika24 ni siga ni imatai ni vula niu tiko ena bati ni uciwai levu na Taikirisi,*+
5 au tacake au raica sara e dua na tamata e vakaisulu lineni+ tu, e vesu toka e tolona na beleti koula ni Ufasi.
6 Na yagona e vaka na kirisilaite,+ na matana e vaka na liva, na yalokanimatana e vaka na cina caucaudre, na ligana kei na yavana e vaka na irairai ni kopa taliva,+ na rorogo ni domona e vaka na domodra na lewe levu.
7 O yau o Taniela au raica duadua ga na raivotu, era sega ni raica na raivotu+ o ira na tiko vata kei au. Ia era sautaninini vakalevu, era dro mera vuni.
8 Au sa qai vo duadua ga o yau, niu raica na raivotu veivakurabuitaki qo e oti vakadua noqu kaukaua, e veisau na kequ irairai me ca, e yali sara ga na noqu kaukaua+ kece.
9 Au rogoca sara na domona ni vosa tiko, ia niu rogoca ni vosa tiko au mani mocelutu niu cuva tu ena qele.+
10 E qai tarai au e dua na liga,+ e yavalati au meu duri e ligaqu kei na duruqu.
11 E kaya vei au:
“I Taniela, o iko na tamata mareqeti vakalevu,*+ mo vakatudaliga ina vosa au vakarau tukuna vei iko. Mo duri ena vanua o tu kina, niu talai mai vei iko.”
Ni tukuna vei au o koya na ka qo, au tucake sara ena sautaninini.
12 E tukuna tale vei au o koya: “Kua ni rere+ Taniela. Sa rogoci na nomu vosa ena imatai ni siga o vakarautaka kina na lomamu mo kila na ka, o vakamalumalumutaki iko tale ga vua na nomu Kalou, au lako mai qo ena vuku ni nomu vosa.+
13 Ia e saqati au tiko me 21 na siga na turaga+ ni vanua vakaturaga o Perisia. E qai lako mai vei au o Maikeli*+ e dua vei ira na turaga levu* me vukei au, au tiko ga e kea volekati ira na tui Perisia.
14 Au lako mai qo meu tukuna vei iko na ka ena yacovi ira na kainomu ena veisiga mai muri,+ ni na vakayacori na raivotu ena gauna se bera mai.”+
15 Ni se tukuna tiko ga vei au na vosa qori, au vakacuva na mataqu ena qele, au galu.
16 E qai tara na tebenigusuqu e dua e vaka na irairai ni tamata,+ au mani dalaga, au tukuna vei koya e duri tu e mataqu: “Kemuni na noqu turaga, au sokonu sara ga ena vuku ni raivotu, e oti noqu kaukaua.+
17 Ena vosa rawa vakacava vua na noqu turaga, na dauveiqaravi ni noqu turaga?+ Sa sega mada ga noqu kaukaua ena gauna qo, sa oti tale ga na noqu icegu.”+
18 E tarai au tale o koya e vaka na irairai ni tamata me vakaukauataki au.+
19 E kaya vei au: “Mo kua ni rere+ o iko na tamata mareqeti vakalevu.*+ Mo vakacegu.+ Mo kaukaua, io, mo kaukaua.” Ni vosa oti ga vei au o koya, au kaukaua sara au kaya: “Moni vosa mai na noqu turaga ni oni vakaukauataki au.”
20 E kaya tale o koya: “O kila na vuna au lako mai kina vei iko? Au na lesu tale qo meu vala kei na turaga ni Perisia.+ Niu biubiu, ena lako mai na turaga ni Kirisi.
21 Ia au na tukuna vei iko na ka e volai tu ena ivola ni ka dina. E sega ni dua e tokoni au vakalevu ena ka qo, o Maikeli+ ga na nomuni turaga.+
iVakamacala e ra
^ Ipe., “Itikeli.”
^ Se “o taleitaki vakalevu, dokai vakalevu.”
^ Se “turaga liu.”
^ Kena ibalebale “O Cei e Vaka na Kalou?”
^ Se “o taleitaki vakalevu, dokai vakalevu.”