Taniela 11:1-45
11 “Ia o yau ena imatai ni yabaki nei Taraiasi+ na kai Mitia, au tu meu vakaukauataki koya, meu taqomaki* koya.
2 Au na tukuna vei iko na ka dina:
“Raica! Ena tubu e Perisia e tolu na tui, na kena ikava ena vutuniyau sara vei ratou. Ena gauna ga e kaukaua kina ena levu ni nona iyau, ena uqeta na ka kece mera valuta na matanitu o Kirisi.+
3 “Ena tubu mai e dua na tui qaqa ena lewa e levu na vanua,+ ena vakayacora ga na lomana.
4 Ena dela ni nona gauna ena vakarusai na nona matanitu qai wasei ina cagi vava ni lomalagi,+ ia ena sega ni wasei vei ira na nona kawa, ena sega ni tautauvata kei na vanua e lewa, ni na cavuraki na nona matanitu me nodra eso tale, me kua o ira qori.
5 “Ena kaukaua na tui ni ceva, oya e dua na nona turaga, ia e dua tale ena qaqa vua, ena levu sara na vanua e lewa ni vakatauvatani kei koya qori.
6 “Ni oti e vica na yabaki erau na tovata, ena lako yani na luvena yalewa na tui ni ceva vua na tui ni vualiku me rau veiyalayalati. Ia ena sega ni dei na lewa e liga i yalewa, ena oti na nona lewa na tui se na ligana, ena soli yani na yalewa, o koya kei ira na kauti koya yani, kei na tamana e vakavuna nona sucu, kei koya e vakaukauataki koya tiko ena gauna oya.
7 Ena tubu e dua na suli ni wakai yalewa me sosomitaki koya, ena lako yani ina mataivalu me valuta na nona koronivalu na tui ni vualiku, ena valuti ira, ena qaqa.
8 Ena kauta tale ga i Ijipita na nodra kalou, na nodra matakau kaukamea, na nodra iyaya mareqeti e siliva se koula, kei ira na vesu. Ena sega ni vakasosana na tui ni vualiku me vica na yabaki,
9 ena valuta o koya na nona matanitu na tui ni ceva ia ena lesu tale ina nona vanua.
10 “Era na vakavakarau ina ivalu na luvena tagane,* era soqona e dua na mataivalu levu sara. Ena lako dina yani o koya, ena kuitaka me vaka na dobui. Ia ena lesu tale, ena vala tiko me yaco sara ina nona koronivalu.
11 “Ena yaloca mai na tui ni ceva, ena lako yani me valuti koya, oya na tui ni vualiku, ena soqona o koya e dua na ilala levu ia ena soli na ilala levu qori e liga i koya oya.
12 Era na kau tani na ilala levu. Ena qaciqacia na lomana, ena vakabalea e oba vakaoba, ia ena sega ni vakayagataka o koya na nona kaukaua.
13 “Ena lesu na tui ni vualiku me vakarautaka e dua na ilala levu, e lailai na kena e liu, ni oti e dua na gauna, oya e vica na yabaki, ena lako dina yani kei na dua na mataivalu levu kei na levu sara na iyau.
14 Ena gauna oya e levu era na valuta na tui ni ceva.
“Era na uqeti tale ga na kainomu era valavala kaukaua* mera vakayacora na raivotu, ia era na bale.
15 “Ena lako yani na tui ni vualiku me vakaduria e dua na bainivalu me ravuta e dua na koro vakabai. Era na bale na mataivalu mai na ceva kei na nona tamata digitaki, ena sega na nodra kaukaua mera vala lesu.
16 Ena vakayaco lomana o koya e mai valuti koya,* ena sega ni dua e tu rawa e matana. Ena tu ena vanua Totoka,+ ena tu e ligana na kaukaua me veivakarusai.
17 Ena vakanamata* o koya me lako vata kei na mataivalu qaqa ni nona matanitu taucoko, ena dua na nodrau veidinadinati, ena rawa na nona sasaga. Ia ena vakadonui me vakarusa na luve ni marama. Ena sega ni tudei o koya, ena sega tale ga ni tokoni tagane.
18 Ena goleva tale na veibaravi, ena vakadruka e levu. Ena tinia na nona veibeci e dua na komada me oti vakadua nona veibeci. Ena vakasuka vua na nona veibeci.
19 Ena qai goleva tale na koronivalu kece ni nona vanua, ena tarabe, ena lutu, ena sega tale ni laurai.
20 “Ena tu me sosomitaki koya e dua ena tala na mata* me lakova na matanitu lagilagi, ia ena vakarusai o koya ena vica ga na siga, ena sega ni vakarusai ena cudru se na ivalu.
21 “Ena sosomitaki koya e dua e beci, era na sega ni rokova na nona itutu vakamatanitu, ena lako yani ena gauna ni tikovinaka* me taura na matanitu ena veicavilaki.*
22 Ena kuitaka o koya na mataivalu dobui, era na vakamalumalumutaki, vaka kina na Turaga+ ni veiyalayalati.+
23 Nira mai tovata kei koya ena lawaki tiko ga o koya, ena vala, ena kaukaua sara ena vuku ni dua na matanitu lailai.
24 Ena gauna ni tikovinaka* ena lako yani o koya ena yasana sautu me vakayacora na ka era sega ni dau cakava na tamana kei na tukana. Ena wasea vei ira na ka e kovei, na itokinivalu, kei na iyau, ena bukia o koya na vere me valuta na veivanua vakabai, ia ena dua ga na gauna lekaleka.
25 “Ena yaloqaqa mai, ena vakayagataka na nona kaukaua kei na dua na mataivalu levu me valuta na tui ni ceva, ena vakarautaki koya na tui ni ceva me vala kei na dua na mataivalu levu sara qai kaukaua. Ia ena sega ni tudei o koya nira na bukia na kena vere.
26 Era na vakarusai koya ga o ira na kania na kena.
“Ena kuitaki na nona mataivalu, era na balemate e levu.
27 “Ia e lomadrau ruarua na tui qo me rau vakayacora na ka ca, erau na dabe vata ena dua na teveli, erau na veilasutaki. Ena sega ni yaco e dua na ka, ni sa loku oti tu na gauna ni icavacava.+
28 “Ena kauta lesu ina nona vanua e levu sara na iyau, ena cata na lomana na veiyalayalati tabu. Ena rawa na nona sasaga qai lesu ina nona vanua.
29 “Ena lesu ena gauna lokuci me valuta na ceva. Ia na gauna qo ena sega ni vaka na gauna sa oti,
30 era na lai valuti koya na waqa ni Kitimi,+ ena vakamalumalumutaki o koya.
“Ena lesu o koya me cudruva na veiyalayalati tabu,+ ena rawa na nona sasaga, ena lesu tale o koya me golevi ira na biuta na veiyalayalati tabu.
31 Ena lako mai vua e dua na mataivalu, era na beca na tikina tabu,+ na koronivalu, era na kauta tani tale ga na isoro e cabori wasoma.+
“Era na vakaduria kina na ka vakasisila e dauveivakarusai.+
32 “Ena nona vosa veicavilaki, ena liutaki ira kina na cata na veiyalayalati mera vukitani. Ia o ira na kila na nodra Kalou era na qaqa, ena rawa na nodra sasaga.
33 O ira na lewenivanua yalomatua+ era na vakavulica e levu. Era na bale ena iseleiwau kei na bukawaqa, era na vesu, era na kovei me vica na siga.
34 Ia nira vakabalei era na vukei vakalailai, e levu era na tokoni ira ena vosa veicavilaki.
35 Era na vakabalei eso era yalomatua mera vakatovolei kina, mera vakasavasavataki ra qai vakavulavulataki+ me yacova na gauna ni icavacava, ni sa loku oti na kena gauna.
36 “Ena vakayaco lomana na tui, ena vakalevulevui koya, ena vakacerecerei koya vei ira kece na kalou, ena tukuna o koya na ka veivakurabuitaki me saqata kina na nodra Kalou na kalou.+ Ena yaco na lomana me oti mada na veicudruvi, me vakayacori kina na ka sa nakiti.
37 Ena sega ni doka na nodra Kalou na tukana, se na ka era vinakata na yalewa, se dua tale na kalou, ia ena vakacerecerei koya vei ira kece.
38 Ena vakalagilagia ga o koya na kalou ni koronivalu, ena vakalagilagia na kalou era sega ni kila na tukana ena koula, ena siliva, ena vatutalei, kei na iyau mareqeti kece.
39 Ena rawa na nona sasaga me valuta na vanua viribaiti ni vukei koya kina na kalou tani. Ena vakacerecerei ira vakalevu na tokoni koya, ena lesi ira mera liutaka e levu, ena wasewasea na qele me volitaka.
40 “Ena gauna ni icavacava ena cumuti koya na tui ni ceva, ena cicivi koya na tui ni vualiku ena qiqinivalu, o ira na dauvodo ose, kei na levu na waqa, ena curu ina veivanua me kuitaka me vaka na dobui.
41 Ena curu tale ga ina vanua Totoka,+ ena bale e levu na vanua. Qo o ira na dro mai ligana: o Itomi kei Moapi, kei ira na turaga ni Amoni.
42 Ena dodoka tiko ga na ligana me valuta na veivanua, ia ena sega ni dro na vanua o Ijipita.
43 Ena lewa o koya na iyau vuni, na koula kei na siliva kei na iyau mareqeti kece nei Ijipita. Era na muria na weniyavana na kai Lipea kei ira na kai Iciopea.
44 “Ena lomaleqataka o koya na itukutuku mai na tokalau* kei na vualiku, ena lako yani ena cudru levu me ravuravu qai vakarusa e levu.
45 Ena vakaduria na nona valelaca vakaturaga ena maliwa ni wasawasa levu kei na ulunivanua tabu Totoka,+ ena yacova na kena icavacava, ena sega ni dua me vukei koya.
iVakamacala e ra
^ Se “meu nona koronivalu.”
^ Rairai dusia na tui ni noca.
^ Se “era luve ni daubutako.”
^ Rairai dusia na tui ni sauca.
^ Se “nakita.”
^ “Na mata,” rairai kumuna na ivakacavacava. Se “iliuliu ni cakacaka.”
^ Se rawa ni, “sega ni veivakaroti.”
^ Se “vere.”
^ Se rawa ni, “sega ni veivakaroti.”
^ Se “icabecabe ni siga.”
