Taniela 2:1-49
-
Tadra veivakidroataki nei Tui Nepukanesa (1-4)
-
Sega ni dua na tamata vuku me tukuna na tadra (5-13)
-
Kere veivuke o Taniela vua na Kalou (14-18)
-
Vakacaucautaka na Kalou ni vakatakila na ka vuni (19-23)
-
Tukuna na tadra o Taniela vua na tui (24-35)
-
iBalebale ni tadra (36-45)
-
Vatu ni Matanitu ni Kalou me vurumemeataka na ivakatakarakara (44, 45)
-
-
Rokovi Taniela na tui (46-49)
2 Ena ikarua ni yabaki ni veiliutaki nei Nepukanesa, e levu na nona tadra, e kidroa vakalevu+ o koya* qai sega ni moce rawa.
2 E mani vakarota na tui mera kacivi mai na bete daucakaiba, o ira na daurairai, o ira na daucakaisausau, kei ira na Kalitia* mera tukuna vua na tui na nona tadra. Era lako sara mera duri e matana na tui.+
3 E kaya vei ira na tui: “Au a tadra, au* kidroa, au via kila na ka au tadra.”
4 Era kaya vua na tui na Kalitia ena vosa vakaArame:*+ “Moni bula balavu mada ga na tui. Moni tukuna mai vei keimami na nomuni tamata na tadra, keimami na vakaraitaka na kena ibalebale.”
5 E kaya na tui vei ira na Kalitia: “Qo na ka au sa lewa: Ke oni sega ni vakatakila vei au na tadra kei na kena ibalebale, oni na musumusulaki, ena vukici tale ga na nomuni vale me valelailai* ni lewenivanua.
6 Ia ke oni tukuna na tadra kei na kena ibalebale, au na solia vei kemuni na iloloma kei na iyau, moni rokovi tale ga vakalevu.+ Moni tukuna gona vei au na tadra kei na kena ibalebale.”
7 Era kaya ena ikarua ni gauna: “Me tukuna mada na tui na tadra vei keimami na nomuni tamata, keimami na tukuna na kena ibalebale.”
8 E kaya na tui: “Au kila vinaka ni oni vakaberabera tiko, ni oni kila na ka au sa lewa oti.
9 Ke oni sega ni vakatakila vei au na tadra, ena tau vei kemuni kece e dua ga na lewa. Ia oni duavata moni tukuna vei au na ka lasu qai veivakaisini me veisau mada na ituvaki. Moni tukuna gona vei au na tadra, au na qai kila ni oni na vakamacalataka rawa na kena ibalebale.”
10 Era kaya vua na tui na Kalitia: “E sega ni dua e vuravura* me vakayacora rawa na ka e vinakata na tui, ni sega ni dua na tui rogo se kovana me taroga na ka va qo vua na bete daucakaiba se na daurairai, se na Kalitia.
11 E dredre na ka e vinakata tiko na tui, e sega ni dua na tamata e bula tiko me tukuna rawa vua na tui na ka qo, o ira ga na kalou, era sega ni tiko vata kei keda na tamata.”
12 E cudru sara ga vakalevu na tui, e vakarota mera vakamatei kece na tamata vuku ni Papiloni.+
13 Ni tukuni yani na lewa mera vakarau vakamatei na tamata vuku, era vaqarai Taniela tale ga kei ratou na nona itokani mera vakamatei ratou.
14 Ena gauna qori e yalomatuataka o Taniela, e lewa vinaka tale ga na nona vosa vei Arioki, na iliuliu ni nona matayadra na tui, e lako yani me vakamatei ira na tamata vuku ni Papiloni.
15 E taroga o Taniela vei Arioki, na vakailesilesi ni tui: “Na cava e rui kaukaua kina na nona ivakaro na tui?” E qai tukutuku vei Taniela o Arioki.+
16 E mani lako yani o Taniela me kerea na tui me solia vua na gauna me tukuna vua na tui na ibalebale ni tadra.
17 Oti e lako ina nona vale o Taniela, e tukuna sara qori vei ratou na nona itokani o Enanaia, o Misaeli, kei Asaraia.
18 E kerei ratou me ratou masulaka na loloma ni Kalou ni lomalagi me baleta na ka vuni qo, me ratou kua kina ni vakamatei vata o Taniela kei ratou na nona itokani kei ira na vo ni tamata vuku ni Papiloni.
19 E qai vakatakilai vei Taniela na ka vuni ena raivotu ena bogi.+ E vakacaucautaka sara o Taniela na Kalou ni lomalagi.
20 E kaya o Taniela:
“Me vakacaucautaki mada ga na yaca ni Kalou me tawamudu,Ni nona duadua ga na vuku kei na kaukaua.+
21 E veisautaka na gauna kei na yabaki,+E vakasivoi ira na tui, e lesi ira na tui,+E solia na vuku vei ira na lomavuku kei na kilaka vei ira na yalomatua.+
22 E vakatakila na veika titobu kei na ka e tabogo,+E kila na ka e tu ena butobuto,+E vu ni rarama o koya.+
23 Au vakalagilagi kemuni, au vakavinavinakataki kemuni na nodra Kalou na tukaqu,Ni oni solia vei au na vuku kei na kaukaua.
Oni vakaraitaka qo vei au na ka keitou kerea vei kemuni,Oni vakaraitaka vei keitou na ka e kauai kina na tui.”+
24 E lako sara o Taniela vei Arioki, e lesia na tui me vakamatei ira na tamata vuku ni Papiloni,+ e kaya vua: “Moni kua ni vakamatei ira na tamata vuku ni Papiloni. Ni kauti au vua na tui, au na tukuna vua na tui na ibalebale ni tadra.”
25 E kauti Taniela vakatotolo vua na tui o Arioki, e tukuna vua: “Au sa kunea e dua na turaga e kau mai vakavesu e Juta+ e rawa ni vakatakila na ibalebale ni tadra vua na tui.”
26 E kaya na tui vei Taniela, na yacana tale ga o Pelitisasari:+ “O rawa dina ni tukuna vei au na tadra au raica kei na kena ibalebale?”+
27 E kaya vua na tui o Taniela: “E sega ni dua na tamata vuku, na daurairai, na bete daucakaiba, kei ira na dauraikalokalo me tukuna rawa na ka vuni e taroga tiko na tui.+
28 Ia e tiko e dua na Kalou ni lomalagi e Dauvakatakila na ka vuni,+ e vakaraitaka vei Tui Nepukanesa na ka ena yaco ena iotioti ni gauna. Qo na nomuni tadra kei na raivotu oni raica ni oni davo tiko ena nomuni idavodavo:
29 “Kemuni na tui, oni vakananuma ena nomuni idavodavo na ka ena yaco ena gauna mai muri, e vakatakila gona vei kemuni na ka ena yaco o koya e Dauvakatakila na ka vuni.
30 E sega ni vakatakilai vei au na ka vuni qo baleta niu vuku sara vei ira na kena vo era bula tiko, ia meu vakaraitaka ga na ibalebale ni tadra vua na tui, moni kila kina na ka oni nanuma tiko e lomamuni.+
31 “Kemuni na tui, oni vakararai tiko oni raica e dua na ivakatakarakara* levu. Na ivakatakarakara levu oya e duatani na kena serau, e duri tu e matamuni qai vakarerevaki na kena irairai.
32 Na ulu ni ivakatakarakara oya e koula dina,+ na sarisarina kei na ligana e siliva,+ na ketena kei na sagana e kopa,+
33 na temo ni yavana e kaukamea,+ eso na tiki ni yavana e ra e kaukamea, eso na tikina e qele.*+
34 Oni vakararai tiko qai kavida mai e dua na vatu e sega ni ta ena liga ni tamata, e lauta sara na yava ni ivakatakarakara e ra e buli ena kaukamea kei na qele, qai vurumemeataka.+
35 Ena gauna qori e vurumemea kece na kaukamea, na qele, na kopa, na siliva, kei na koula, me vaka na qa ni covuata ena rara ni butu covuata ena vulaikatakata e vukataka na cagi me kua tale ni kune e dua na tikina. Ia na vatu e lauta na ivakatakarakara e tubu me dua na ulunivanua levu, e roboti vuravura taucoko.
36 “Qo na tadra, keitou na tukuna vua na tui na kena ibalebale.
37 Kemuni na tui, oni nodra tui na tui, e solia vei kemuni na Kalou ni lomalagi na matanitu,+ na kaukaua, na qaqa, kei na lagilagi,
38 e solia tale ga e ligamuni na vanua kece era tiko kina na tamata, vaka kina na manumanu ni veikau, kei na manumanuvuka ni lomalagi, e solia kece+ vei kemuni moni lewa, o kemuni ga na ulu koula.+
39 “Ia ena taravi kemuni e dua tale na matanitu+ e lailai vei kemuni, oti e dua tale na matanitu na kena ikatolu e kopa, ena lewa na vuravura taucoko.+
40 “Na ikava ni matanitu ena kaukaua me vaka na kaukamea.+ Ni dau vurumemeataka qai qaqia na ka kece na kaukamea, io me vaka na kaukamea e dau vorovorolaka na ka, ena vurumemeataka qai vorovorolaka na ka kece qori.+
41 “Oni raica na yavana sara e ra kei na iqaqaloniyavana era buli ena qele ni dautulituli kei na kaukamea, ena tatawasewase gona na matanitu qori, ia ena tiko kina na kaukaua ni kaukamea me vaka oni raica ni rau waki vata na kaukamea kei na qele malumu.
42 Nira buli ena kaukamea kei na qele eso na tiki ni iqaqaloniyavana, ena kaukaua e dua na iwase ni matanitu, ena malumalumu e dua tale na iwase.
43 Me vaka oni raica ni rau waki vata na kaukamea kei na qele malumu, era na veiwaki kei ira na lewenivanua,* ia era na sega ni veikabiti me vaka ga ni rau sega ni veikabiti na kaukamea kei na qele.
44 “Ena nodra gauna na tui oya ena vakarautaka na Kalou ni lomalagi e dua na matanitu+ ena sega sara ni vakarusai.+ Ena sega ni soli na matanitu qo vua e dua tale na tamata.+ Ena vurumemeataka, ena vakawabokotaki ira na veimatanitu kece qori,+ ena tu ga me tawamudu,+
45 me vaka ga oni raica ni kavida mai na ulunivanua e dua na vatu e sega ni ta ena liga ni tamata qai vurumemeataka na kaukamea, na kopa, na qele, na siliva, kei na koula.+ E vakatakila na Kalou Cecere vua na tui na ka ena yaco ena gauna mai muri.+ E dina na tadra qai donu na kena ibalebale.”
46 E tekicuva ina qele o Tui Nepukanesa me vakarokoroko vei Taniela. E vakarota o koya me soli vua na iloloma kei na ka boivinaka.
47 E kaya na tui vei Taniela: “Na nomudou Kalou e nodra Kalou na kalou, e nodra Turaga na tui, e Dauvakatakila tale ga na ka vuni, ni o vakatakila rawa na ka vuni qo.”+
48 E vakalevulevui Taniela sara na tui, e solia vua e levu na iloloma vinaka, e lesi koya me lewa na yasana taucoko o Papiloni,+ me nodra iliuliu tale ga na tamata vuku kece ni Papiloni.
49 E kerea na tui o Taniela me lesi Setareki, Mesake, kei Apeteniko+ me ratou lewa na yasana o Papiloni, ia e veiqaravi tiko ga o Taniela ena valenitui.
iVakamacala e ra
^ Ipe., “na yalona.”
^ Qo na ilawalawa e kenadau ena rairai kei na raikalokalo.
^ Ipe., “na yaloqu e.”
^ E volai ena vosa vakaArame na ikarua ni icegu ni Tan 2:4 me yacova na Tan 7:28.
^ Se rawa ni, “ibenubenu, ibinibini denimanumanu.”
^ Se “e vanua mamaca.”
^ Se “matakau.”
^ Se “qele vavi (buli).”
^ Se “na luvedra na kawatamata,” oya o ira na tauvanua.
