Taniela 5:1-31
5 E vakarautaka sara o Tui Pelisasari+ e dua na magiti levu vei ira na le duanaudolu na nona tamata vakaitutu, e gunu waini tale tiko ga e matadra.+
2 Ni mateni ena waini o Pelisasari, e vakarota sara me kau yani na iyaya koula kei na iyaya siliva a kauta mai o Nepukanesa na tamana* ena valenisoro e Jerusalemi+ me gunu kina na tui kei ira na nona tamata vakaitutu, o ira na watina lalai kei na so tale na watina.
3 Era mani kauta yani na iyaya koula era kauta mai na valenisoro ni Kalou e Jerusalemi, e qai gunu kina na tui kei ira na nona tamata vakaitutu, na watina lalai kei na so tale na watina.
4 Era gunu waini ra qai vakacaucautaka na kalou koula kei na kalou siliva, na kalou kopa, na kalou kaukamea, na kalou kau, kei na kalou vatu.
5 E basika mai ena gauna oya na iqaqaloniliga ni tamata qai volavola ena iboro ni lalaga ni valenitui e veibasai kei na itutu ni cina, e raica na tui na dakuniliga i koya e volavola tiko.
6 E qai veisau na irairai ni* matana na tui, e vakarerei koya na nona nanuma, e yavala na dibina,+ e ninini tale ga na duruna.
7 E kaci yani ena domolevu na tui mera kacivi na daurairai, o ira na Kalitia,* kei ira na dauraikalokalo.+ E kaya sara na tui vei ira na tamata vuku ni Papiloni: “Ke dua e wilika rawa na volavola qo me tukuna vei au na kena ibalebale, ena vakaisulutaki ena isulu lokaloka, ena vakaitaubetaki ena itaube koula,+ ena lesi me ikatolu ena veiliutaki ena matanitu.”+
8 Era qai lako kece yani na nona tamata vuku na tui, ia era sega ni wilika rawa na volavola se vakatakila vua na tui na kena ibalebale.+
9 E rere vakalevu o Tui Pelisasari, e veisau na irairai ni matana, era veilecayaki na nona tamata vakaitutu.+
10 Ena vuku ni nona vosa na tui kei ira na nona tamata vakaitutu, e curu yani na ranadi ena rumu ni kana. E kaya sara na ranadi: “Moni bula balavu na tui. Me kua ni vakarerei kemuni na ka oni vakasamataka se veisau na irairai ni matamuni.
11 E tiko e dua na tamata ena nomuni matanitu e tiko vua na yalodra na kalou yalosavasava. E laurai vua na yalorarama kei na yalomatua kei na vuku me vaka na nodra vuku na kalou ena gauna i tamamuni.+ E lesi koya o Tui Nepukanesa na tamamuni me nodra iliuliu na bete daucakaiba, o ira na daurairai, o ira na Kalitia,* kei ira na dauraikalokalo,+ io e lesi koya o tamamuni, kemuni na tui.
12 E laurai vei Taniela, o koya e vakayacana na tui me o Pelitisasari,+ na vakasama e duatani sara kei na kilaka kei na yalomatua me tukuna na ibalebale ni tadra, me vakamacalataka na vatavatairalago, me walia tale ga na leqa vereverea.*+ Ia me kacivi mai o Taniela, ena tukuna o koya na kena ibalebale.”
13 E mani kau yani o Taniela vua na tui. E tarogi Taniela na tui: “O iko ga o Taniela o kau vakavesu mai Juta,+ a kauti iko mai Juta+ na tamaqu na tui?
14 Au rogoca ni tiko vei iko na yalodra na kalou+ qai laurai vei iko na yalorarama, na kilaka, kei na vuku e duatani sara.+
15 Era kau mai vei au na tamata vuku kei ira na daurairai mera wilika na volavola qo, mera tukuna vei au na kena ibalebale, ia era sega ni tukuna rawa na ibalebale ni itukutuku.+
16 Au rogoca ni o rawa ni tukuna na ibalebale ni ka vuni,+ o walia tale ga na leqa vereverea.* Ia qo ke o rawa ni wilika na volavola mo tukuna vei au na kena ibalebale, o na vakaisulutaki ena isulu lokaloka, o na vakaitaubetaki ena itaube koula, o na lesi mo ikatolu ena veiliutaki ena matanitu.”+
17 E qai kaya o Taniela vua na tui: “Moni maroroya na iloloma qori, moni solia na iyau vua e dua tale. Ia au na wilika vua na tui na volavola, au na vakatakila vei kemuni na kena ibalebale.
18 Kemuni na tui, e solia na Kalou Cecere Duadua vei Nepukanesa na tamamuni na matanitu, na rogo, na itutu cecere, kei na lagilagi.+
19 Ena vuku ni rogo e solia vua o koya, era rerevaki koya kece kina na lewe ni veivanua, na veimatatamata, kei na duivosavosa.+ O koya ga e via vakamatea e vakamatea se vakabula, o koya ga e via vakacerecerea e vakacerecerea se vakamadualaka.+
20 Ia ni qaciqacia na lomana qai yalokaukaua me viavialevu+ kina, e mani vakasivoi mai na nona idabedabe vakaturaga ena nona matanitu, e kau tani vua na vakarokoroko.
21 E cemuri tani mai vei ira tamata, e soli vua na yalo ni manumanu, e lai tiko kei ira na asa kila. E soli vua na co me kania me vaka na bulumakau, e suasua na yagona ena tegu ni lomalagi, me kila mada ni lewa na matanitu ni tamata na Kalou Cecere Duadua, e solia tale ga vei koya e vinakata.+
22 “Ia o kemuni Pelisasari na luvena* oni kila na ka kece qo, oni sega ga ni vakamalumalumutaka na lomamuni.
23 Oni vakalevulevui kemuni ga vua na Turaga ni lomalagi,+ oni vakarota mera kauta mai vei kemuni na iyaya ni nona vale.+ Oni qai gunu waini kina kei ira na nomuni tamata vakaitutu, o ira na watimuni lalai kei na so tale na watimuni moni vakacaucautaka na kalou siliva kei na kalou koula, na kalou kopa, na kalou kaukamea, na kalou kau kei na kalou vatu, na kalou era sega ni rai rawa, era didivara, era sega ni kila e dua na ka.+ Oni sega ga ni vakalagilagia na Kalou e tiko e ligana na nomuni icegu+ kei na nomuni ilakolako kece.
24 Oya na vuna e tala mai kina o koya na liga me volai kina na volavola qo.+
25 Qo na ka e volai: MINI, MINI, TIKELI, PASINI.
26 “Qo na ibalebale ni vosa: MINI, e wilika na Kalou na gauna me lewa kina na nomuni matanitu, me vakaotia.+
27 “TIKELI, oni vakarautaki ena ivakaraunibibi, e laurai ni oni mamada.
28 “PIRESI, sa wasei na nomuni matanitu me soli vei ira na Mitia kei ira na Perisia.”+
29 E mani vakarota o Pelisasari mera vakaisulutaki Taniela ena isulu lokaloka, mera vakaitaubetaki koya ena itaube koula, era kacivaka sara ni sa ikatolu ni iliuliu ni matanitu.+
30 Ena bogi tiko ga oya e vakamatei kina o Pelisasari na nodra tui na Kalitia.+
31 E taura sara na matanitu o Taraiasi+ na kai Mitia, e rairai yabaki 62 o koya.
iVakamacala e ra
^ Se “tukana.”
^ Se “qai vulaci na.”
^ Qo na ilawalawa e kenadau ena rairai kei na raikalokalo.
^ Qo na ilawalawa e kenadau ena rairai kei na raikalokalo.
^ Ipe., “me sereka na ka e buki.”
^ Ipe., “me sereka na ka e buki.”
^ Se “makubuna.”
