Taniela 8:1-27
8 Ena ikatolu ni yabaki ni veiliutaki nei Tui Pelisasari,+ au raivotu tale o yau o Taniela ni oti ga na kena e liu.+
2 Niu raivotu au raica niu tiko ena vanua viribaiti* mai Susani*+ ena yasana o Ilama,+ au raica ena raivotu niu duri volekata tu na uciwai o Ulai.
3 Niu tacake au raica ni duri donuya tu na uciwai e dua na tamanisipi,+ e rua na kena ileu.+ Erau ileu babalavu, e dua e balavu sara vei rau, ia e tubu e muri na ileu balavu sara.+
4 Au raica na tamanisipi ni cumu ina ra, ina vualiku, kei na ceva, e sega ni tu rawa e matana e dua na manumanu kila, e sega ni dua e veivakabulai rawa mai na kena kaukaua.*+ E cakava ga na ka e vinakata, e tubu me levu.
5 Niu vakararai tiko au raica ni lako mai na ra* e dua na me tagane,+ e takosova na dela i vuravura taucoko qai sega ni tara na qele. E toka e dua na ileu levu ena maliwa ni matana.+
6 E lako yani vua na tamanisipi e rua na kena ileu au raica ni duri donuya tu na uciwai, e ciciva yani ena levu ni nona cudru.
7 Au raica ni torova yani na tamanisipi, dua na ka nona sevaka. E cumuta na tamanisipi qai musuka na kena ileu ruarua, e sega ni kaukaua na tamanisipi me vorata. E vakabalea ina qele qai butubuturaka, e sega ni dua me vakabula rawa na tamanisipi mai na kena kaukaua.*
8 E tubu me levu sara na me tagane, ena gauna ga e kaukaua kina e ramusu na kena ileu levu, e tubu tale mai e va na ileu lelevu me kena isosomi donuya na cagi vava ni lomalagi.+
9 E dua vei ratou qori e qai tubu mai kina e dua na ileu lailai, e tubu tiko me levu vaka ina ceva, vaka ina tokalau* kei na vanua Totoka.+
10 E tubu me levu sara me yacovi ira na mataivalu ni lomalagi mani biuta sobu ina qele eso na mataivalu kei na so na kalokalo, e butubuturaki ira.
11 E vakalevulevui koya mada ga vua na Turaga ni mataivalu, e mani kau tani vua na isoro e cabori wasoma qai vukici na nona tikina tabu tudei.+
12 E soli yani na mataivalu kei na isoro e cabori wasoma ena vuku ni ivalavala ca, e kolotaka tiko ga ina qele na ka dina, e yavala qai yaco na lomana.
13 Au rogoca ni vosa tiko e dua na yalosavasava, ia e kaya e dua tale na yalosavasava vei koya e vosa tiko: “Ena vakacava na balavu ni raivotu ni isoro e cabori wasoma kei na ivalavala ca e veivakarusai,+ me buturaki kina na tikina tabu kei na mataivalu?”
14 E kaya sara vei au o koya: “Me 2,300 na yakavi kei na mataka, ena qai vakalesui na tikina tabu ina kena itutu dodonu.”
15 Niu raivotu tiko, o yau o Taniela, au saga meu kila na kena ibalebale, e vakasauri ga niu raica ni duri tu e mataqu e dua e vaka na tamata.
16 Au rogoca sara e dua na domo ni tamata e loma ni uciwai na Ulai,+ e kacivaka mai: “Keperieli,+ tukuna vei koya qori na ibalebale ni ka e raica.”+
17 E toso mai o koya ena vanua au duri tu kina, au rere vakalevu ni yaco mai, au mani davo vakatoboicu. E kaya vei au o koya: “O iko na luve ni tamata, mo kila ni baleta na gauna ni icavacava na raivotu.”+
18 Ni se vosa tiko ga vei au sa lutu noqu moce niu davo tu vakatoboicu ena qele. E tarai au, e vakaduri au sara ena vanua ga au a duri tu+ kina.
19 E kaya vei au: “Au na tukuna vei iko na ka ena yaco ena iotioti ni cudru, ni na vakayacori ena gauna lokuci ni icavacava.+
20 “Na tamanisipi o raica e rua na kena ileu e dusi rau na tui Mitia kei Perisia.+
21 Na me tagane vutivutia e dusia na tui Kirisi,+ na ileu levu ena maliwa ni matana e dusia na imatai ni kena tui.+
22 Ni ramusu na ileu qori, e tubu mai e va me kena isosomi,+ ena basika mai ena nona matanitu e va tale na matanitu, ia eratou na sega ni kaukaua me vakataki koya.
23 “Ni vakarau cava na nodratou veiliutaki, nira be vakalevu na ivalavala ca, ena qai basika e dua na tui mata kaukaua e kila na ivosavosa e dredre ni kilai.
24 Ena kaukaua na nona lewa, ia e sega ni vakavuna ga o koya. Ena duatani sara na nona veivakarusai,* ena gumatua, ena yaco na ka kece e cakava. Ena vakarusai ira na qaqa kei ira na yalosavasava.+
25 Ena veivakacalai ena nona qaseqase me yaco kina na lomana, ena vakalevulevui koya e lomana, ena qai vakarusa e levu ena gauna era bula vakacegu tu kina.* Ena bolea mada ga na nodra Turaga na turaga ia ena musuki o koya, sega ga ena liga ni tamata.
26 “E dina na raivotu e tukuni me baleta na yakavi kei na mataka, ia mo vunia na raivotu, ni baleta na gauna se yawa sara.”+
27 Ia o yau o Taniela, au oca, au mani tauvimate me vica na siga.+ Oti au duri meu qarava na noqu itavi vua na tui,+ au kurabui ena ka au raica, e sega ni dua e kila na kena ibalebale.+
iVakamacala e ra
^ Se “valenitui, koronivalu.”
^ Se “Susa.”
^ Ipe., “ligana.”
^ Se “idromudromu ni siga.”
^ Ipe., “ligana.”
^ Se “icabecabe ni siga.”
^ Se “Ena vakadomobula nona veivakarusai.”
^ Se rawa ni, “sega ni veivakaroti.”
