Vakatakila e Vola o Joni 21:1-27
21 Au qai raica na lomalagi vou kei na vuravura vou,+ ni sa takali na lomalagi kei na vuravura a tu e liu,+ sa sega tale ga na wasawasa.+
2 Au raica tale ga na koro tabu, o Jerusalemi Vou, ni lako sobu mai vua na Kalou mai lomalagi,+ e vakarautaki me vaka na yalewavou e uku me lako vei watina.+
3 Au rogoca sara e dua na domolevu mai na idabedabe vakaturaga ni kaya: “Raica! E sa tiko vei ira na tamata na vale* ni Kalou, ena tiko vata kei ira o koya, era na nona tamata. Na Kalou ena tiko vata kei ira.+
4 Ena qusia tani tale ga na wainimata kece mai na matadra,+ sa na sega tale na mate,+ na lolosi, na tagiyaso, kei na mosi.+ Sa oti na veika e dau yaco e liu.”
5 E qai kaya o koya e dabe tiko ena idabedabe vakaturaga:+ “Raica! Au sa vakavoutaka na ka kece.”+ E kaya tale ga: “Vola, e donu na vosa qo, e dina tale ga.”
6 E qai kaya vei au: “Sa vakayacori! O yau na Alifa kei na Omeka,* na itekitekivu kei na itinitini.+ O koya e karamaca au na solia wale vua na wai mai na ivurevure ni wai ni bula.+
7 O koya e qaqa ena soli vua na ka kece qo, au na nona Kalou, ena luvequ o koya.
8 Ia o ira na daurere, o ira na sega ni vakabauta,+ o ira na dukadukali kei ira na vakasisila, o ira na daulaba,+ o ira na veiyacovi tawadodonu,*+ o ira na dau qaravi tevoro, o ira na qaravi matakau, kei ira kece na daulasu,+ ena nodra ivotavota na drano e caudre tu ena bukawaqa kei na sulifure.+ Qo e vakaibalebaletaka na ikarua ni mate.”+
9 Sa qai basika mai e dua vei ratou na vitu na agilosi eratou taura tu na boulu e sinai ena iotioti ni vitu na ka rarawa,+ e qai kaya vei au: “Mai, au na vakaraitaka vei iko na yalewavou, na wati ni Lami.”+
10 E kauti au yani ena kaukaua ni yalo tabu ena dua na ulunivanua levu qai cecere me vakaraitaka vei au na koro tabu o Jerusalemi ni lako sobu mai vua na Kalou mai lomalagi+
11 e tu kina na lagilagi ni Kalou.+ E serau me vaka na vatutalei totoka duadua, e vaka na vatu jasipa e tatalivaliva qai savasava me vaka na karisitala.+
12 E vakaitamera qai cere na kena lalaga, e 12 na kena matamata, eratou duri tu kina e 12 na agilosi, e ceuti ena matamata na yacadratou na yavusa e 12 ni luvei Isireli.
13 E tolu na matamata e toka ena tokalau, e tolu na matamata ena vualiku, e tolu na matamata ena ceva, e tolu na matamata ena ra.+
14 Na lalaga ni koro e 12 tale ga na vatu ni kena yavu, e volai kina na yacadratou na 12 na yapositolo+ ni Lami.
15 Ia e taura tu o koya a vosa vei au e dua na gasau koula ni ivakarau, me vakarautaka kina na koro, na kena matamata, kei na kena lalaga.+
16 E sukuea* na koro, e vakaitamera na kena balavu me vaka ga na kena raba. E qai vakarautaka na koro ena gasau, e 12,000 na sitadia,* e tautauvata na kena balavu, na kena raba, kei na kena cere.
17 E vakarautaka tale ga na kena lalaga, e 144 na kiupiti,* me vaka na ivakarau ni tamata, qori e ivakarau tale ga ni agilosi.
18 Na lalaga e caka ena jasipa,+ ia na koro e koula dina me vaka na iloilo savasava.
19 Na yavu ni lalaga ni koro e ukutaki ena veivatutalei kece: na imatai ni yavu na jasipa, na kena ikarua na sefaia, na kena ikatolu na kalisetoni, na kena ikava na emeralita,
20 na kena ikalima na satonikisa, na kena ikaono na satiusa, na kena ikavitu na krisilaite, na kena ikawalu na perili, na kena ikaciwa na topasa, na kena ikatini na karisopiraso, na kena ikatinikadua na eisinici, na kena ikatinikarua na amecisita.
21 E yadua tale ga na mataniciva na matamata e 12, na matamata yadua e caka ena dua na mataniciva. Na gaunisala levu tale ga ni koro e caka ena koula dina, e makare sese me vaka na iloilo.
22 Au sega ni raica kina e dua na valenisoro, ni kena valenisoro ga o Jiova* na Kalou Kaukaua Duadua+ kei na Lami.
23 E sega ni yaga me vakararamataka na koro qo na matanisiga se na vula, ni kena rarama ga na lagilagi ni Kalou,+ qai kena cina na Lami.+
24 Era na lako na veimatanitu ena kena rarama,+ era na kauta tale ga kina na tui kei vuravura na nodra lagilagi.
25 Ena sega sara ga ni sogo na kena matamata ena siga, ni na sega e kea na bogi.+
26 Ena qai kau kina na nodra vakarokoroko kei na nodra lagilagi na veimatanitu.+
27 Ia ena sega sara ni curu kina+ e dua na ka e sega ni savasava, se dua e cakava na ka vakasisila, se lasu, o ira ga e volai na yacadra ena nona ivolavivigi ni bula na Lami era na curu kina.+
iVakamacala e ra
^ Kir., “valelaca.”
^ Se “na A kei na Z.” Na Alifa kei na Omeka erau imatai kei na iotioti ni matanivola ena matuavosa vaKirisi.
^ Raica na iVakamacala ni Vosa.
^ Tautauvata na balavu ni yasana kece.
