Vakatakila e Vola o Joni 8:1-13
8 Ni dolava o koya+ na ikavitu ni drega,+ e qai vakanomodi o lomalagi me rauta ni veimama na aua.
2 Au raica sara e vitu na agilosi+ ni ratou duri tu ena mata ni Kalou, e soli vei ratou e vitu na biukila.
3 E yaco mai e dua tale na agilosi qai mai duri ena yasa ni icabocabonisoro,+ e taura tiko e dua na itawatawa koula ni ka boivinaka, e soli vakalevu vua na ka boivinaka+ me cabora vata na nodra masu na yalosavasava ena icabocabonisoro koula+ ena mata ni idabedabe vakaturaga.
4 E kuvu cake ina mata ni Kalou na kubou ni ka boivinaka mai na liga ni agilosi salavata kei na nodra masu+ na yalosavasava.
5 Ia e sega ni bera nona kauta na agilosi na itawatawa ni ka boivinaka qai tawana kina eso na bukawaqa ni icabocabonisoro qai kolotaka i vuravura. E vavadugudugu na kurukuru, e rogo mai eso na domo, e veitibiyaki na liva,+ e yaco tale ga na uneune.
6 Eratou sa qai vakarau na vitu na agilosi eratou taura tu na vitu na biukila+ me ratou uvuca.
7 E uvuca sara na nona biukila na kena imatai. E qai basika mai na ucaqereqere kei na bukawaqa e veiwaki kei na dra qai kolotaki i vuravura,+ e vakamai kina e dua na ikatolu ni vuravura, e dua na ikatolu ni kau, kei na co drokadroka kece.+
8 E uvuca na nona biukila na ikarua ni agilosi. E qai kolotaki i wasawasa e dua na ka e vaka na ulunivanua levu e kama tiko.+ Mani vuki e dua na ikatolu ni wasawasa me dra,+
9 era mate e dua na ikatolu ni kabula e wasawasa,+ e voca tale ga e dua na ikatolu ni waqa.
10 E uvuca na nona biukila na ikatolu ni agilosi. E qai lutu mai lomalagi e dua na kalokalo levu e caudre tiko me vaka na cina, e lutuka e dua na ikatolu ni uciwai kei na ivurevure ni wai.+
11 Na yaca ni kalokalo qori o Kaugaga. E qai vuki e dua na ikatolu ni wai me kaugaga, era mani mate e levu na tamata ni sa vagagai na wai.+
12 E uvuca na nona biukila na ikava ni agilosi. E mani vakaleqai e dua na ikatolu ni matanisiga,+ e dua na ikatolu ni vula, kei na dua na ikatolu ni kalokalo, me ratou vakabutobutotaki,+ me kua kina ni rarama e dua na ikatolu ni siga kei na bogi.
13 Oti au raica, au rogoca tale ga ni kacivaka ena domolevu e dua na ikeli e vuka tiko e macawa: “Oni na rarawa, oni na rarawa, oni na rarawa+ o kemuni na tiko e vuravura, ni sa vakarau uvuci na nodratou biukila na vo ni tolu na agilosi!”+
