Vakatekivu 48:1-22
48 Oti na veika qo, e qai tukuni vei Josefa: “Raica, sa malumalumu tiko o tamamu.” E kauti rau sara na luvena tagane o Manasa kei Ifireimi.+
2 E qai tukuni vei Jekope: “Sa lako mai qo vei iko o Josefa na luvemu.” E vakaukauataki koya sara o Isireli me dabe ena nona idavodavo.
3 E qai kaya vei Josefa o Jekope:
“Na Kalou Kaukaua Duadua e rairai mai vei au e Lusa, ena vanua o Kenani, qai vosa vakalougatataki au.+
4 E kaya vei au, ‘Au sa vakavuna mo vakawa, mera le levu, au na cakava mo ivavakoso tamata,+ au na solia na vanua qo vei ira na nomu kawa era na taravi iko mai mera taukena me tawamudu.’+
5 Erau sa noqu na luvemu tagane erau a sucu ena vanua o Ijipita ni bera niu lako mai ke.+ Erau sa na noqu o Ifireimi kei Manasa me vakataki rau o Rupeni kei Simioni.+
6 Ia o ira na luvemu era na sucu taravi rau, era na qai nomu. Era na qai vakatokai ena yaca i tuakadra ena nodra ivotavota.+
7 Ia o yau, niu gole tiko mai Petani, a mate+ o Raijeli e yasaqu ena vanua o Kenani, ni se vo tu e dua na iwase levu ni vanua me qai yaco e Efiraca.+ Au mani buluti koya i kea ena sala i Efiraca, oya o Peceliema.”+
8 E qai raici rau na luvei Josefa o Isireli, e taroga: “O cei o rau qo?”
9 E kaya vei tamana o Josefa: “Erau luvequ, e solia vei au na Kalou ena vanua qo.”+ Sa qai kaya o koya: “Yalovinaka, kauti rau mai vei au meu vosa vakalougatataki rau.”+
10 Ia sa buawa sara tiko na mata i Isireli ni sa qase, qai sega ni rai rawa. E kauti rau voleka yani vua o Josefa, e reguci rau qai mokoti rau.
11 E kaya vei Josefa o Isireli: “Au sega sara ga ni nanuma niu na raica na matamu,+ ia qo sa vakatara tale ga na Kalou meu bau raica na nomu kawa.”
12 E qai kauti rau tani mai na duru i Isireli o Josefa, e cuva sara ina qele.
13 E qai kauti rau yani o Josefa, e tauri Ifireimi+ ena ligana imatau qai tuberi koya me donuya na imawi nei Isireli, e tauri Manasa+ ena ligana imawi qai tuberi koya me donuya na imatau nei Isireli, e kauti rau voleka yani vua.
14 E dodoka yani na ligana imatau o Isireli qai vakataqara ena ulu i Ifireimi e dina ni gone, e qai vakataqara na ligana imawi ena ulu i Manasa. E nakita me biuta va ya na ligana, ni ulumatua o Manasa.+
15 E vosa vakalougatataki Josefa qai kaya:+
“Na Kalou dina, o koya erau lako voli e matana na tamaqu o Eparama kei Aisake,+Na Kalou dina, o koya e vakatawai au voli ena gauna kece ni noqu bula me yacova na siga qo,+
16 Na agilosi e vakabulai au voli mai na leqa+ kece, ni vakalougatataki rau mada ga na gonetagane.+
Me cavuti mada ga vei rau na yacaqu kei na yacadrau na tamaqu o Eparama kei Aisake,Me rau qai tubu mada ga me rau levu sara e vuravura.”+
17 Ni raica o Josefa ni biuta tu ga na ligana imatau o tamana ena ulu i Ifireimi, e sega sara ga ni taleitaka qai saga me taura na liga i tamana, me laveta tani mai na ulu i Ifireimi me biuta ena ulu i Manasa.
18 E kaya vei tamana o Josefa: “I ta me kua, ni o koya qo na ulumatua.+ Biuta na ligamu imatau ena uluna.”
19 Ia e bese tiko ga o tamana, e kaya: “Au kila luvequ, au kila. O koya tale ga ena yaco me dua na umatamata, o koya tale ga ena levu sara. Ia ena uasiviti koya na tacina gone,+ era na qai tautauvata vinaka kei na veimatanitu lelevu na nona kawa.”+
20 E vosa vakalougatataki rau tiko ga ena siga+ oya o koya, e kaya:
“Mera tukuni iko mada ga na Isireli nira tauca na vosa ni veivakalougatataki, mera kaya,‘Me cakava mada ga na Kalou mo tautauvata kei Ifireimi kei Manasa.’”
Mani vakaliuci Ifireimi tiko ga vei Manasa o koya.
21 E qai kaya vei Josefa o Isireli: “Raica, sa voleka niu ciba,+ ia na Kalou ena tiko dina kei kemuni qai vakasukai kemuni ina nodra vanua na tukamuni.+
22 Ia o yau, au sa solia vei iko e dua na iwase ni qele,* e levu cake mai na qele au solia vei ratou na tacimu, na qele au kauta tani mai na ligadra na Amoraiti ena noqu iseleiwau kei na noqu dakaititi.”
iVakamacala e ra
^ Se “dua na tikiniqele.” Ipe., “dua na taba.”
