Vunau ni Soro 5:1-19
5 “‘Ke dua e valavala ca ni rogoca ni kacivaki e matanalevu me vakadinadina,*+ qai ivakadinadina o koya ni raica se kila e dua na ka qai sega ni tukutuku, ena saumitaro o koya ena nona cala.
2 “‘Se ni dua na tamata e tara e dua na ka dukadukali, se mani yago mate ni manumanu kila e sega ni savasava, se manumanu manoa e sega ni savasava, se manumanu lalai era qeleni tu e sega ni savasava, e dukadukali+ o koya, sa cala tale ga ke sega mada ga ni kila.
3 Se ke dua e lecava ni tara na ka dukadukali ni tamata+—na ka dukadukali cava ga e rawa ni vakadukadukalitaki koya—e qai kila e muri, sa na cala kina o koya.
4 “‘Se ke sega ni liaca e dua ni bubului vakariri me cakava e dua na ka—se caka vinaka se caka ca, se mani cava ga—ia e qai kila e muri ni bubului vakariri, sa na cala*+ o koya.
5 “‘Ke mani cala o koya ena dua na ka qori, me qai vakatusa+ na sala e cala kina.
6 Ena kauta tale ga o koya na nona isoro ni cakacala vei Jiova me baleta na nona ivalavala ca,+ oya e dua na ka yalewa mai na qelenimanumanu, se mani lami yalewa se luvenime yalewa, me isoro ni ivalavala ca. Ena qai sorovaki koya na bete ena vuku ni nona ivalavala ca.
7 “‘Ke sega ni rawata o koya e dua na sipi, me kauta yani vei Jiova e rua na kukuru se rua na ruve gone+ me nona isoro ni cakacala ena vuku ni ivalavala ca, dua me isoro ni ivalavala ca, dua tale me isoro kama.+
8 Me kauta vua na bete, ena cabora e liu o koya e dua me isoro ni ivalavala ca, ena qai kinita laivi na domona e liu, me kua ga ni cavuka.
9 Ena kureitaka eso na dra ni isoro ni ivalavala ca ena yasa ni icabocabonisoro, ia na vo ni dra ena vakadrodroi laivi ena vu ni icabocabonisoro.+ Qo na isoro ni ivalavala ca.
10 Ena cabora o koya na kena ikarua me isoro kama me vaka ga na kena ivakarau,+ ena sorovaki koya na bete ena vuku ni ivalavala ca e cakava, ena qai vosoti o koya.+
11 “‘Ke sega ni rawata e rua na kukuru se rua na ruve gone, me kauta me nona isoro e dua na ikatini na efa*+ falawa vinaka sara, me isoro ni ivalavala ca. Me kua ni vakawaiwaitaka, se biuta e delana na drega boivinaka, baleta e isoro ni ivalavala ca.
12 Ena kauta o koya vua na bete, ena qai taura mai kina na bete e dua na iluku me isoro ni ivakananumi,* qai cakava me kubou ena icabocabonisoro ena dela ni isoro i Jiova e cabori ena bukawaqa. Qo na isoro ni ivalavala ca.
13 Ena sorovaka na bete na nona ivalavala ca, se mani valavala ca cava qori, me na vosoti kina o koya.+ Na vo ni isoro me nona na bete,+ me vaka ga na isoro kakana.’”+
14 E vosa tale vei Mosese o Jiova, e kaya:
15 “Ke dua e sega ni yalodina ni sega ni nakita nona ivalavala ca ena veika tabu i Jiova,+ me kauta vei Jiova me nona isoro ni cakacala+ e dua na tamanisipi, me ka vinaka, na kena isau ena sikeli siliva* me cakacakataki ena ivakarau tudei ni sikeli ena vanua tabu.*+
16 Ena sauma o koya na isau ni ivalavala ca e cakava ina vanua tabu, ena vakuria tale ga kina e dua na ikalima ni kena isau.+ Ena solia o koya vua na bete, me sorovaki+ koya kina na bete ni cabora na tamanisipi me isoro ni cakacala, ena qai vosoti o koya.+
17 “Ke dua e valavala ca ni cakava e dua na ka e vakarota o Jiova me kua ni caka, ke sega mada ga ni kila, e se cala tiko ga o koya, ena saumitaro ena nona cala.+
18 Me kauta vua na bete e dua na tamanisipi vinaka mai na qelenimanumanu me isoro ni cakacala,+ me vaka na isau e lavaki. Ena qai sorovaki koya na bete ena vuku ni cala a sega ni nakita ni sega ni kila, ena qai vosoti o koya.
19 Qo na isoro ni cakacala. Sa cala sara ga o koya ni valavala ca vei Jiova.”
iVakamacala e ra
^ Ipe., “domo ni veicudruvi (bubului).” De dua qo na kena vakarogoi na cala, wili tale ga kina na nona cudruvi o koya e cala, se na ivakadinadina e sega ni lai tukutuku.
^ E kena irairai ni a sega ni vakayacora o koya na ka e bubuluitaka.
^ Se “me dua na kena iwase me ivakananumi (mata).”
^ Se “ni sikeli tabu.”
