E veiyabaki, levu na tacida era sa malumu tu vakayalo era na tiko ena iVakananumi. Dua na gauna era vakaitavi tiko mai ena veitaucici ni bula, ia era sa malumu vakayalo ena vuku ni so na ituvaki, me vaka e vakamacalataki ena brochure Mo Lesu Vei Jiova. (Ipe 12:1) Era se ka talei tiko ga vei Jiova, nira voli tale ga ena dra i Luvena. (Cak 20:28; 1Pi 1:18, 19) Ia eda na uqeti ira vakacava mera lesu ina ivavakoso?

Me vaka ga na ivakatawa gugumatua e vaqarai ira na sipi era lakosese mai na qelenisipi, o ira tale ga na qase ni ivavakoso era na vaqarai ira na malumu vakayalo, ra qai veivuke. (Lu 15:4-7) E vakavotuya sara ga qori na veikauaitaki vakayalololoma i Jiova. (Jr 23:3, 4) O keda kece meda vakayaloqaqataki ira na tacida era malumu vakayalo, sega ni o ira ga na qase. Ena marautaka o Jiova na noda kauai kei na noda nanumi ira na tacida, eda na vakalougatataki kina. (Vvb 19:17; Cak 20:35) Io, meda vakasamataki ira na tacida e dodonu mera vakayaloqaqataki, da qai kua ni lokuyara ni veivuke!

SARAVA NA VIDIO VAKAYALOQAQATAKI IRA NA MALUMU VAKAYALO, QAI SAUMA NA TARO E RA:

• Na cava e cakava o Abbey ni sotava e dua na iVakadinadina i Jiova e rau sega ni veikilai?

• Ni bera nida vukea e dua e malumu tu vakayalo, na cava meda tukuna rawa kina vei ira na qase?

• E vakavakarau vakacava o Abbey ena ikarua ni gauna me sikovi Laura kina?

• E vakaraitaka vakacava o Abbey na gugumatua, vosovoso kei na loloma ni saga tiko me vakayaloqaqataki Laura?

• Na cava eda rawa ni vulica ena vosa vakatautauvata i Jisu ena Luke 15:8-10?

• Na veivakalougatataki cava e rawati ena nona vukei o Laura?