E parofisaitaki ena iVolatabu ni na vakararawataki keda o Setani me tarova noda cakacaka vakaitalatala. (Jn 15:20; Vta 12:17) Eda na vukei ira vakacava na tacida era vakararawataki ena so tale na vanua? Eda rawa ni masulaki ira. “Me kua ni beci na vakamamasu ni tamata yalododonu ni na yaga vakalevu.”—Jem 5:16.

Na cava eda na masulaka? Eda rawa ni kerei Jiova me vakayaloqaqataki ira, mera kua tale ga ni rere. (Ais 41:10-13) Meda masulaki ira tale ga na iliuliu mera kua ni saqata noda cakacaka vakaitalatala, “me rawa nida bula galala tiko ga, meda vakacegu” tale ga.—1Tm 2:1, 2.

Ni rau vakararawataki o Paula kei Pita, era masulaki rau o ira na lotu vaKarisito ena imatai ni senitiuri nira cavuta sara ga na yacadrau. (Cak 12:5; Rom 15:30, 31) Ke da sega mada ga ni kila na yacadra kece era vakararawataki tiko nikua, eda rawa ni cavuta na nodra ivavakoso, vanua se yasayasa era tiko kina.