Kaya mada ni o vakaitikotiko e Kalili ena gauna i Jisu. O lako i Jerusalemi mo lai tiko ena Soqo ni Valetabanikau. Era osota na koro na tacimu era lako mai vakayawa. O via vakacaboisoro vei Jiova, o mani tuya yani e dua na me, o curu ena kedra maliwa na tiko e kea mo gole i valenisoro. Ni o yaco yani, era osodrigi na via vakacaboisoro. Sa qai kena gauna mo solia kina na me vua na bete. Gauna vata qori o qai nanuma mai ni drau sega ni veimaliwai vinaka tiko kei na dua na tacimu, e rawa sara ga ni maliwai ira tu na ilala levu ya, se tiko ena lomanikoro. E vakamacalataka o Jisu na ka mo cakava. (Wilika Maciu 5:24.) Ena rawa vakacava ni drau veivakameautaki kei na tacimu ya? Ena yatuvosa e toka qo e ra, biuta na ivakatakilakila ena kena isau dodonu.

E DODONU MO . . .

• vosa vua na tacimu ke o kila ni donu vinaka nona cudruvi iko

• saga mo vakadodonutaka nona rai ke o nanuma ni sa rui kauaitaka vakasivia e dua na ka se a vakavuna tale ga o koya

• vakarorogo matua ni vakamacala tiko, ke sega mada ga ni matata vei iko na ka e kaya, mo kere veivosoti ga mai vu ni lomamu ni o vakararawataki koya

O TACIMU E DODONU ME . . .

• qara nodra veitokoni eso ena ivavakoso ni talanoataka na ka o cakava vua

• vosataki iko, tukuna vakamatailalai na ka o cakava qai vinakata mo tukuna ni o cala

• kila nomu yalomalumalumu kei na yaloqaqa ni o lai raici koya qai veivosoti mai vu ni lomana

Nikua, sa sega ni okati ena noda sokalou na isoro manumanu, na cava ga e vakavulica o Jisu me baleta na veisemati ni noda veiyaloni kei ira na tacida me qai vakadonui noda sokalou?