Na iVakananumi e gauna vinaka meda vakasamataka kina na veivakalougatataki se bera mai e rawati ena ivoli, me vaka na veivakaturi. A sega ni inaki i Jiova meda mate. Sa rauta me dau mositi keda nona takali e dua na wekada lomani. (1Ko 15:26) A rarawa mada ga o Jisu ni raici ratou nona tisaipeli ni ratou tagicaki Lasarusa. (Jn 11:33-35) Ni ucui Tamana vinaka o Jisu, eda nuidei gona ni rarawa tale ga o Jiova nida lolositaki ira na wekada lomani era sa takali. (Jn 14:7) E vinakata o Jiova me totolo mai na gauna me vakaturi ira kina nona dauveiqaravi. Dodonu meda vakanamata tale ga kina.—Jop 14:14, 15.

Ni Kalou dau tuvatuva maqosa o Jiova, eda vakabauta ni na tuvanaki vakamatau na veivakaturi. (1Ko 14:33, 40) Sa na sega na veibulu, de dua ena tiko na ituvatuva mera kidavaki na vakaturi. Vakacava o dau vakananuma vakatitobu na veivakaturi ena gauna ni lolosi? (2Ko 4:17, 18) O dau vakavinavinakataki Jiova ni vakarautaka na ivoli qai vakatakila ena iVolatabu nira na bula tale na mate?—Kol 3:15.

• O cei na itokani se wekamu o via sotava?

• O cei e volatukutukutaki ena iVolatabu o via vosa vua?