Sa qai levu tiko ga nikua na leqa tubukoso. Ni yaco qori, e vinakati me tuvanaki vakavinaka na veivuke, me totolo tale ga. Qori na vuna e tuvanaki kina me tiko kece ena noda valenivolavola na iVakadinadina i Jiova na Tabana ni Leqa Tubukoso (Disaster Relief Department).

Nira kila na tacida ena tabana qori ni yaco e dua na leqa tubukoso, era na qiriti ira totolo na qase ni ivavakoso ena vanua qori me ratou kila na ka mera vukei kina na dautukutuku. Ke levu sara na ka e vakacacani, ena lesia na valenivolavola ni tabana eso na tacida tagane matua mera liutaka na veivuke ni vakacoko. De dua era na kerea na tacida qori eso mera bole ena veivuke, se me cautaki yani eso na iyaya e vinakati, se ra volivoli mera qai kauta vei ira na vakaleqai.

E yaga vakalevu ni caka va qori. Ena sega kina ni maumau na nodra sasaga na tacida, se vakavu veilecayaki, se vakasabusabutaki na ilavo kei na iyaya ni vakacoko nira via veivuke ga vakataki ira na mataveitacini.

Era na kila na tacida era lesi mai na valenivolavola ni tabana na levu ni ilavo e vinakati kei na levu ni tacida mera bole ena veivuke ni vakacoko. Rawa tale ga nira veikilai kei ira na vakailesilesi era dau veitokoni me vakatotolotaki kina na veivuke ni vakacoko. Koya gona, meda kua ni saga yadudua meda kumuni ilavo, vakau iyaya ni vakacoko, se lako ena vanua e yaco kina na leqa tubukoso, vakavo ke da kerei.

Ni yaco na leqa tubukoso, eda vinakata meda veivuke. (Ipe 13:16) Eda lomani ira na mataveitacini! Na cava meda cakava? E bibi duadua meda masulaki ira na vakaleqai ena leqa tubukoso kei ira na veivuke tiko. Eda rawa tale ga ni cau ena cakacaka e vuravura raraba. Ena veidusimaki ni iLawalawa Dauvakatulewa, e kila vinaka na valenivolavola ni tabana na sala me vakayagataki vinaka kina na ilavo. Ke da vinakata meda vakaitavi sara ga, meda vakalewena na kena fomu, na Local Design/Construction Volunteer Application (DC-50).

ME SARAVI NA VIDIO VAKACACA NI WALUVU E BRAZIL, OTI QAI SAUMA NA TARO QO:

Na cava o taleitaka me baleta nodra veivuke na iVakadinadina i Jiova ni oti na waluvu e Brazil ena 2020?