Dua na gauna ga qo sa na sega tale ni vosota o Jiova na vuravura qo. Ena vakarusai o lotu lasu, era na to vata na veimatanitu mera valuti ira na tamata ni Kalou, sa na qai vakarusai ira na tamata ca o Jiova ena Amaketoni. Eda vakanamata na lotu vaKarisito ina gauna vakairogorogo qori.

E macala nida sega ni kila na veika matailalai me baleta na veivakararawataki levu. Kena ivakaraitaki, eda sega sara ga ni kila na gauna ena tekivu kina. Eda sega ni kila na yavu cava era na tukuna na iliuliu vakapolitiki mera valuti lotu kina. Eda sega ni kila se na vakacava na dede ni nodra valuti keda na tamata ni Kalou o ira na veimatanitu, se cava ena okati kina. Eda sega tale ga ni kila na ka ena vakayagataka o Jiova me vakarusai ira kina na tamata ca ena Amaketoni.

Ia e tu ena Vosa ni Kalou na itukutuku kece meda kila me rawa nida nuidei, meda yaloqaqa tale ga ena ka sa vakarau yaco. Kena ivakaraitaki, eda kila nida sa bula tiko ena icavacava ni “iotioti ni veisiga.” (2Tm 3:1) Eda kila ni na “vakalekalekataki” nona valuti o lotu me kua kina ni vakarusai na lotu dina. (Mac 24:22) Eda kila ni o Jiova ena vakabulai ira na nona tamata. (2Pi 2:9) Eda kila tale ga ni o koya e lesia o Jiova me vakarusai ira na tamata ca qai vakabulai ira na lewe ni isoqosoqo levu ena Amaketoni, e turaga yalododonu, e kaukaua sara.—Vta 19:11, 15, 16.

Na veika sa vakarau yaco qo ena vakavuna nodra “cibati ira na tamata ena nodra rere.” Ia nida wilika qai vakasamataka vakatitobu na veivakabulai i Jiova ena veigauna sa oti, vaka kina nona vakatakila na veika sa tu mai liu, e rawa kina nida “tu vakadodonu” qai “tacake” ena nuidei ni sa voleka noda vakabulai.—Lu 21:26, 28.