Na Rai ni iVolatabu

Cava me Dokai Kina na Vakawati?

LEVU nikua era na rairai vakabauta ni dodonu me dokai na vakawati. Ia na cava ga e dau tini kina e levu na vakawati ena veisere? Vei ira e so, na vakawati e vosa ga ni yalayala ni veivinakati kei na veidinadinati vakalawa. Ia e rawa ni voroki na yalayala. O ira e vaka oqo nodra rai e dau totolo nodra via tinia nodra bula vakawati ni yaco na leqa.

E raica mada vakacava na Kalou na bula vakawati? Na kena isau e kune ena nona Vosa, na iVolatabu, ena Iperiu 13:4, VV: “Sa dodonu mo ni doka taucoko na tiko vakawati.” Na vosa vakirisi e vakadewataki me “doka” e tiko kina na vakasama ni dua na ka e talei qai vakamareqeti. Nida vakamareqeta e dua na ka, eda qarauna meda maroroya vinaka da qai kua ni vakayalia, me kua tale ga ni vakacalakataki. Ena vakatale ga oya na bula vakawati. Mera doka na lotu Vakarisito na vakawati me vaka e dua na ka talei era via maroroya.

Na Kalou o Jiova a tauyavutaka na bula vakawati me ka tabu vei rau na veiwatini. Ia eda na vakaraitaka vakacava nida duavata kei na nona rai?

Veilomani kei na Veirokovi

Me dokai na bula vakawati, ena vinakati vei rau na veiwatini me rau veirokorokovi. (Roma 12:10) A vola na yapositolo o Paula vei ira na lotu Vakarisito ena imatai ni senitiuri: “Mo dou dui lomana yadua na watina me vakataki koya; ia na yalewa, me vakarokorokotaka na watina.”​—Efeso 5:33.

Ena so na gauna, e dua vei rau ena sega beka ni dau loloma sara se veirokovi. Ia, o ira na lotu Vakarisito  e dodonu mera veilomani ra qai veirokovi. A vola o Paula: “Dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua; me vaka sa sega ni cudruvi kemudou na Karisito, mo dou vaka talega kina.”​—Kolosa 3:13.

Gauna kei na Veikauaitaki

Na veiwatini era doka nodra bula vakawati era dau vakatikitikitaka na gauna mera vakaceguya kina na lomadra kei na nodra gagadre vakayago. E okati e ke na veiyacovi. E kaya na iVolatabu: “Me ia vua na yalewa na tagane na ka sa dodonu e na veilomani: me vaka talega kina na yalewa vua na tagane.”​—1 Korinica 7:3.

Ia, e so na veiwatini era na duavata ni vinaka me gole vakalekaleka o tagane ina dua tale na vanua me lai cakacaka kina me rawati kina vakalevu na ilavo. Ena so na gauna, sa dau dede tale na nodra dui tutu. Na ka oqo e dau vakavuna na leqa ena vakawati, e so na gauna e dau tini ena veibutakoci kei na veisere. (1 Korinica 7:2, 5) Oya na vuna, e levu na veiwatini lotu Vakarisito era vakuai ira ena sasagataki ni iyau, ia me kua ga ni leqa nodra bula vakawati, o koya era doka vakalevu.

Ni Yaco na Leqa

Ni yaco na leqa, o ira na lotu Vakarisito era doka na vakawati era sega ni vakusakusa mera veibiu se veisere. (Malakai 2:16; 1 Korinica 7:10, 11) A kaya o Jisu: “O koya ga e sereka na watina, ka sega e na vuku ni dautagane, sa vakavuna me la’ki dautagane, ia, ko koya e rau sa veiwatini kei na yalewa sa veisere oti sa dauyalewa.” (Maciu 5:32, VV) Na veiwatini erau saga me rau veisere se veibiu ni sega ni dua na kena yavu vakaivolatabu, erau sega ni doka na bula vakawati.

Na ivakarau tale ga ni noda raica na vakawati e laurai ena noda ivakasala vei ira na veiwatini era sotava na leqa. E dau totolo beka noda tukuna mera na veibiu se veisere? Dina ni so na gauna ena tiko na vuna vinaka ni veibiu, ena vuku beka ni itovo kaukaua se sega na veitokoni. * Dua tale, me vaka sa tukuni toka e cake, na iVolatabu e vakatara ga na veisere ni dua vei rau na veiwatini e veidauci. Na lotu Vakarisito e sega ni dodonu me tukuna vua e dua tale na ka me vakatulewataka ena ituvaki vaka oqo. O koya gona, ena qai colata voli na vua ni nona vakatulewa o koya e sotava tiko na leqa ni bula vakawati, sega ni o koya e soli ivakasala.​—Kalatia 6:5, 7.

Biuta Laivi na Rai Cala

Ena so na vanua sa dau matau vei ira e so mera vakayagataka na vakawati me idewadewa ni veivakadonui vakalawa mera vakatikotiko kina ena dua tale na vanua. O ira vaka oqo era dau veidinadinati mera saumi koya e vakaitikotiko ena vanua oya mera veiwatini. E dau vakavuqa vei ira na veiwatini vaka oqo mera dui tutu ra qai sega mada ga ni veitokani vinaka, e dina nira sa vakawati. Gauna ga era taura kina na veivakadonui vakalawa ni sa rawa nira vakaitikotiko e kea, era saga sara mera veisere. Era raica na vakawati me vaka ga e dua na veidinadinati vakabisinisi.

E sega ni tokona na iVolatabu na rai cala vaka oqo. Se mani cava nodra inaki, o ira era vakawati era vauci ena ituvatuvanaki dokai e nakita na Kalou me tawamudu. O rau na veidinadinati oqo erau vauci me rau veiwatini, rau sa na vauci tale ga ena ivakatagedegede e kaya na iVolatabu me rawa kina na veisere kei na vakawati tale.​—Maciu 19:5, 6, 9.

Me vaka ga e dua na inakinaki yaga, na vakawati vinaka e gadrevi kina na sasaga kei na vosota. O ira era raica na bula vakawati me sega ni ka dokai ena dau totolo nodra soro koso, se ra na bula vata tiko ga ena vakawati e sega ni marautaki. Ena dua tale na yasana, o ira era doka na vakawati era kila ni namaka na Kalou mera kua ni veibiu. (Vakatekivu 2:24) Era kila tale ga ni kevaka e vinaka nodra bula vakawati, ena vakarokorokotaki se dokai kina na Kalou, o koya a tauyavutaka na bula vakawati. (1 Korinica 10:31) Na rai oqo e uqeti ira mera vosota ra qai saga tiko ga mera vakavinakataka nodra bula vakawati.

[iVakamacala e ra]