Kua ni Dau Bera!

“E NODRA ivalavala tudei na iliuliu lelevu ni cakacaka na bera,” e kaya na niusipepa na USA Today. E kuria, “Ke caka e 10 na bose, era na berata e ono.” E taura mai na iwiliwili oqo na niusipepa ena dua na vakatataro a caka vei ira e lewe 2,700 na iliuliu lelevu ni cakacaka.

Ena buturara ni bisinisi, e sega ni okati ga me itovo ca na bera. Macala oqo ena vakadidike a caka ina dua na ilawalawa era lewe 81,000, era a taro cakacaka: “E dua na ilavo vakaitamera e vakayali ena levu ni gauna e vakamaumautaki ena vuku ni bera kei na yali vakatawadodonu e valenicakacaka.” Ia, na bera e sega ni tara ga na buturara ni bisinisi. Era vakatarogi tale ga e dua na ilawalawa iliuliu ni koronivuli torocake, e macala kina “ni vu levu duadua ni nodra cudruvi wasoma na gonevuli, oya na nodra dau bera.”

Na noda Dauveibuli a nakita meda kauaitaka, da vakabibitaka na toso ni gauna. Laurai oqo ena nona vakarautaka “e rua na vu-ni-rarama lelevu”​—na siga kei na vula—​me vukei keda meda kila kina na toso ni gauna. (Vakatekivu 1:14-16) Nikua li, ena levu ni iyaya sa tu meda kidava tiko kina na toso ni gauna, eda sa kila rawa sara mada ga na toso ni veiminiti kei na veisekodi. Ia, e dina ni sa tu na iyaya vovou vakalivaliva meda kila kina na toso ni gauna, e levu vei keda se bera ga​—i cakacaka, vuli, se ina so tale na inakinaki bibi e dau lokuci.

E vu beka ni leqa na sega ni gauna? Macala ni sega ni dua e vulagi ena levu ni gauna e kania na cakacaka saumi, se qaravi ni matavuvale. Ia, oqo na ka e kaya o Wanda Rosseland, e dua na marama tina, e cakacaka saumi tale ga: “Au sa tinia na noqu dau didivaka na lailai ni gauna, ena noqu raica rawa ni 24 vakadua na aua e soli me noda ena loma ni dua na siga. Niu vakasamataka, au sa qai taura rawa ni sega ni lailai na gauna, ia ena bula vou eda sa vavaca tu oqo, sa rui levu na ka e vakasugusugu se vakaosooso ina noda bula.”

Da rogoci Renee * tale mada ga, e iVakadinadina i Jiova, e lima na luvena. E vaka oqo na nona vakanananu lesu: “Ni ratou se lalai na luvequ, bau ka ni bolebole toka na noqu vakarautaki iratou i vuli se ina soqoni vakarisito. Ia, keitou sega ni dau bera. Nikua eratou sa tamatabula, sa qai vaka me noqu leqa na itovo ca oqo ni dau bera.” E nomu leqa tale beka ga? Ke o mani vakaio, nanuma ni rawa ni o vakavinakataka! Koto gona oqo e so na vakatutu e rawa nida muria.

●  VAKASAMATAKA NA CA NI BERA. De so e nanuma, ke nodra ivalavala tudei ni bula na bera, e sega ni dua na ka oya. Ia, vakasamataka na ka e kaya na iVolatabu: “A lago mate sa vakaboicataka na waiwai e vakaisaluakitaki vakamatai: sa vakakina na nona lialia lailai na tamata sa rogo ni sa vuku ka dokai.” (Dauvunau 10:1) Io, ena okati beka me “lialia lailai” ga na dau bera, ia, e rawa nida rogo ca kina ni na vakavotuya vua na itaukei ni cakacaka se vei qasenivuli nida tawaveinanumi.

O Marie, e dua na marama a lai tosoya tale na nona vuli ena dua na koronivuli torocake, e raica ni levu era vuli vata “e sega sara ga nira kauaitaka na gauna,” era dau berata vakalevu na vuli. “Ia, sega ni dede era sa kidavi ira,” e nanuma lesu o Marie. “Ni rau lewe rua na parofesa erau catacata ni mate na bera. Ke so na gonevuli era bera mada ga ena vica na miniti, sa na volai nira vakalutu vuli ena siga oya. Ni sa sivia na iwiliwili ni siga e vakalutu vuli kina e dua na gonevuli, ena musu na kena maka.”

Ke sa noda ivalavala tudei na bera, e rawa tale ga ni vakacaraka na keda irogorogo ena kedra maliwa na noda itokani se vei ira eda veikilai. E vakadinata na tikina oqo na kena turaga o Joseph ena nona nanuma lesu e dua na nona itokani lotu Vakarisito erau a veikilai ena vica na yabaki sa oti. Dina ni a dokai vakalevu na nona itokani ni dua toka na kenadau ena veivakavulici, ia e dua na nona malumalumu levu. “A nona ivalavala tudei na bera,” e nanuma lesu o Joseph. “Sega ni bera ga ena so na ka, ia ena veika kece! E vaka ni sa ka wale vua. Lai tini veiwalitaki na nona dau bera.” Sa ra kaya tale beka ga na tani ni o dau bera? Ke vaka kina, e rawa nira lai guilecava wale kina na vo ni nomu ivalavala vinaka.

● DAUVEINANUMI. E itovo ca na bera, e veivakasosani tale ga. Rawa tale ga nira tauri iko cala kina e so ni o dokadoka. Ni vakamacalataka e dua na daunibisinisi na vu ni nodra dau berata na bose e levu na iliuiliu ni bisinisi, e vakatusa: “Sa rui levu ga na neimami dokadoka.” Ia, me kena veibasai, era uqeti na lotu Vakarisito mera okati ira na tani mera uasivi cake. (Filipai 2:3) Era saga tale ga na lotu Vakarisito mera cakava vei ira na tani na ka era vinakata me caka vei ira. (Maciu 7:12) Sega li ni dau votivoti vei iko ke balavu na nomu waraka e dua? Saga gona mo kua ni dau waraki.

● VULICA MO VAKAYAGATAKA VINAKA NA GAUNA. O dau lokuyara beka mo qai vakusakusa ni o vakila ni o sa bera tiko? Se rui levu na ka o tuvanaka mo cakava, o qai via cakava kece ena loma ni dua na gauna lekaleka? De rawa ni veivuke e ke na ivakavuvuli ena Dauvunau 3:1: “Sa dui vagauna na ka kecega.” Ke o ‘vagaunataka’ gona na veika o cakava, e rawa ni caka vakamatau.

Na imatai sara ga ni ka, mo vola na veika kece e tu mo cakava. Ni oti oya, vakamuria na ivakavuvuli e koto ena Filipai 1:10, (VV): “Digitaka na veika e uasivi sara.” Io, mai na veika kece o sa vola tu, cakava e liu na ka e bibi. Na cava e vakatotolotaki, ena dodonu ga me caka e liu? Na cava e rawa ni daro me qai caka malua? Ni o sa vakalewa oti, cakacakataka na balavu ni gauna ena taura, se me caka ni naica. Mo kila na ka o  rawata kei na ka o sega ni rawata, mo kua gona ni tuvanaka vakasivia na ka me caka ke sega ni veirauti na gauna me caka kina.

Dua na marama, o Dorothy, e vakacaucautaki rau na nona itubutubu ni rau a vakavulici koya me dau cakacaka ena gauna. E kaya: “Ke dodonu me keitou tiko ena soqoni vakarisito ena veimama ni vitu ena bogi, sa dau tekivu vakarautaki keitou o Nau ni se vo tu e dua na aua 45 na miniti. E veirauti na gauna oya me keitou vakayakavi kina, sava na iyayanikana, keitou vakaisulu rawa, okati kina na neitou vodo motoka ina vanua ni soqoni. Sa neitou itovo tudei.” E vinaka tale ga ke nanumi me wasei na gauna me baleta na kena rawa ni yaco e so na ka e tawanamaki. Me vaka na ka e nanuma lesu o Dorothy: “Ena dua na gauna lekaleka sa oti, au lai vakavodoki ira mai e so ina soqoni. Mani kacabote na taya ni motoka niu se bera ni yaco. Ia, a veisautaki rawa, au sega ga ni berata na gauna lokuci meu lai veivakavodoki mai kina. Au cakava rawa ga oya, niu sa wasea tu e levu na gauna me baleta na leqa e rawa ni yaco ena motoka se na osooso ni gaunisala.”

● KERE IVAKASALA. E kaya na iVolatabu ena Vosa Vakaibalebale 27:17: “Sa vagatai na kaukamea e na kaukamea: ia na tamata, sa vagata vakakina na mata ni wekana.” O koya gona, me salavata kei na ivakavuvuli oqo, tovolea mo talanoa kei ira e tautauvata na nomu ituvaki ni bula​—ia era dau cakacaka ena gauna. Vuqa na gauna e rawa ni levu na vakasama yaga era na vakatututaka.

O Renee, sa cavuti oti, e saga tiko ena nona igu me vakavinakataka na nona dau bera. E kaya: “Ena dua na gauna wale tiko ga oqo, au sa vakadeitaka meu na vakavinakataka na tikina oqo. E dredre, ia au sa bau vakila toka na veisau.” Rawa tale ga ni o cakava oqo. Ke o moica na nomu ituvaki ni rai, o qai saga vakaukaua, o rawa ni vulica mo kua ni dau bera!

[iVakamacala e ra]

[iYaloyalo ena tabana e 14]

Ke noda ivalavala tudei na bera, e rawa nira cata na itaukei ni cakacaka, e rawa tale ga ni votu kina na tawaveinanumi

[iYaloyalo ena tabana e 15]

Nida tuvanaka vinaka na noda bula, eda na sega ni vakamaumautaka na gauna