E donu Vinaka na Cakacaka au Digia

Talanoataka o Sonia Acuña Quevedo

A soli vei au e dua na itutu torocake ena baqe. Na cakacaka oqo e kena ibalebale na rogo qai levu cake na kequ isau. Ia, au se qai sureti ga meu cakacaka vakaitalatala vakatabakidua ina dua na ivavakoso yawa. Niu vakasamataka lesu na noqu digidigi ena 32 na yabaki sa oti, au kila niu a digidigi vakavuku.

A SUSU o tinaqu ena lotu Katolika ia e dau lomatarotarotaka na kena ivakavuvuli. E dau vaqaqa se dodonu beka me sokaloutaki na ivakatakarakara​—na cakacaka ni liga ni tamata? Ni bibi vua na ka dina vakalotu, e mani lakova kina e levu na lotu me vaqara na kena isau, ia e sega ni bau kunea.

Dua na siga ni vakamudremudre toka o tinaqu e tautuba ni neitou vale e Tuxtla, Mexico, sa tokatu yani e dua na iVakadinadina i Jiova. E tarai tinaqu na nona sauma ena iVolatabu na iVakadinadina tagane oya na nona taro, mani vakadonuya o tinaqu me lesu tale yani. Ni sa lesu yani na iVakadinadina sa waraki koya toka o Nana, dua na italatala ni lotu Kavitu, dua na bete ni Katolika, kei na dua na dauvunau ni lotu na Nazarene. Mani taroga sara o tinaqu na veika e baleta na Siga ni Vakacecegu, ia e veivakacegui ga na nona isaunitaro vakaivolatabu na iVakadinadina. O koya duadua ga a kauta yani nona iVolatabu! A papitaiso me dua na iVakadinadina i Jiova o tinaqu ena 1956 ni se qai oti ga e ono na vula nona vulica na iVolatabu. Au se qai yabaki walu ena gauna oya.

Kauai o Tamaqu

O Tata a sega ni saqati Nana ena nona vulica na iVolatabu. Ia ena gauna sa tekivu me vakavulici keitou kina na va na gone​—rua na tagane kei na rua na yalewa—qai kauti keitou tale ga ina soqoni vakarisito, sa tekivu me kauai o Tata, mani vakarusa na ivola i Nana. Me vakadeitaka ni keitou sa vakamuai cala, a saga me vakayagataka na iVolatabu ni Katolika me vakadinadinataka nira biuta vakailawaki na iVakadinadina na yaca ni Kalou​—Jiova—​ena nodra iVolatabu. Ia ni vakaraitaka vua o tinaqu na yaca sara ga oya ena nona iVolatabu, e kurabui sara ga o tamaqu, tekivu tale ga e kea me sa veisau na nona rai me baleti ira na iVakadinadina.​—Same 83:18.

E dau raici me soqo bibi e Mexico na ika15 ni nona siganisucu e dua na goneyalewa. Me vaka ni sega ni yavutaki ena iVolatabu na solevutaki ni siganisucu, au mani muduka na noqu dau solevutaka. * Ia, e vinakata ga o Tata me cakava e dua na ka me baleti au sara ga. Au vakasamataka na tikina oya au qai kaya, “O iko ga mo noqu iloloma, au kerea me daru lako vata ina soqo ni tabacakacaka ni iVakadinadina i Jiova e tarava.” A mani vakadonuya, qai vakalevutaki tale ga kina nona taleitaka na iVolatabu.

Dua na bogi, ni oti e dua na draki ca levu, a butuka vakacalaka o Tata e dua na wanilivaliva bula a lutu tu qai mavoa vakaca sara kina. Era veivuke na iVakadinadina ena vanua keitou tiko kina ena nodra dau lai qaravi koya tiko ena loma ni 24 na aua ena gauna e curu tu kina e valenibula​—na ivakaraitaki ni loloma vakarisito ena sega ni guilecava rawa. Dua na gauna e muri sa tekivu me vakaitavi ena cakacaka vakaitalatala qai yalataka nona bula vei Jiova. Ka ni rarawa ni a mai takali ena 30 Sepiteba, 1975, ni vo e dua na vula me papitaiso. Keitou vinakata sara ga me keitou sotavi koya tale ena gauna ni veivakaturi!​—Cakacaka 24:15.

Veiuqeti e Vale

Na tuakaqu o Carmen, e dau ka talei tu ga vua na cakacaka vakaitalatala vakatabakidua. Ni papitaiso oti ga ena 1967, sa painia tudei sara, e vakayagataka e rauta ni 100 na aua e veivula ena  cakacaka vakaitalatala. Toso tiko na gauna sa mani toki ina korolevu o Toluca, ena loma kei Mexico. Niu sa biu vuli au lai cakacaka sara ena baqe. Au qai papitaiso ena 18 Julai, 1970.

E marautaka vakalevu o Carmen na cakacaka vakaitalatala vakatabakidua qai dau uqeti au meu lai tomani koya e Toluca. Au a vakasamataka tiko na tikina oya ena gauna au vakarogoca tiko kina na ivunau me baleta na nodra vakayagataka na imuri i Jisu na nodra iyau vakayalo mera vakacaucautaka na Kalou. (Maciu 25:14-30) Au vaqaqa, ‘Au sa vakayagataka tiko vakavinaka na isolisoli vakayalo e soli vei au?’ Na vakasama oya e uqeta na lomaqu meu vakalevutaka noqu cakacaka vei Jiova.

Vakatulewa

Ena 1974, au vakalewe fomu meu lai veiqaravi vakapainia ena dua tale na yalava. Sega ni dede, a qiriti au yani e valenicakacaka e dua na qase ni ivavakoso lotu Vakarisito mai Toluca. “Keimami sa waraki iko tiko. Gauna cava o na lako mai kina?” e taroga. Au kurabui dina, au sa lesi meu lai painia lavotaki i Toluca, ia na noqu ivola ni ilesilesi e sega ni macala na vanua e sa lako kina! (O ira na painia lavotaki era vakadonuya mera veiqaravi vakatabakidua ena vanua cava ga e lesi ira kina na isoqosoqo i Jiova.)

Totolo sara noqu tukuna ina baqe niu sa vakatulewataka meu sa na biubiu. “Wawa mada, Sonia,” e kaya o noqu boso, ena nona yalovaka e mataqu e dua na tikinipepa. “Se qai tukuni ga mai oqo vei keitou ni o iko e dua vei iratou na vitu na yalewa sa digitaki mo dou ivukevuke ni manidia. Se bera vakadua ina kabani oqo me bau digitaki ira na yalewa ena itutu oya, e qai kena imatai sara ga oqo. Vakacava o vinakata?” Me vaka sa cavuti oti mai, na tosoi ni itutu oqo e kena ibalebale na rogo kei na levu cake ni kequ isau. Ia au vakavinavinakataka ga na noqu boso, au qai tukuna ni sa dei ga na lomaqu meu qarava vakatabakidua na Kalou. “Io, lako ga,” e kaya. “Ia nanuma, kevaka o mani vinakata mo cakacaka, ena solia vei iko na baqe.” Ni oti e rua na siga au sa tu mai Toluca.

Painia Lavotaki e Mexico

Ena gauna au lai tomani Carmen kina e Toluca, a sa rua na yabaki na nona veiqaravi tiko vakapainia lavotaki e kea. Keirau marau ni keirau mai cakacaka vata tale! Ia a lekaleka wale ga. Ni oti ga e tolu na vula a sotava e dua na leqa vakacalaka o Nana qai gadrevi e dua me sa na qaravi koya sara ga e vale. Ni oti neirau veitaratara kei na valenivolavola ni tabana ni iVakadinadina i Jiova keirau sa mani duavata kei Carmen me sa na lesu o koya me lai qaravi Nana, a veiqaravi tiko me 17 na yabaki. Ena loma tale ga ni gauna oqori a painia tudei tiko kina, qai dau sureti ira mai na nona gonevuli mera mai vuli iVolatabu e vale me rawa ni na raici Nana tale tiko ga kina.

Ena 1976, au sa lesi i Tecamachalco, e dua na korolevu e duidui sara na kena ivakarau ni bula​—ena dua na yasa ni tauni era bula kina na dravudravua, ena yasana kadua o ira na vutuniyau. Au tekivu vuli iVolatabu sara kei na dua na kena marama dawai e tiko vei ganena e vutuniyau. Gauna e tukuna kina vei ganena ni vinakata me sa na dua na iVakadinadina a vakarerei koya o ganena ni na vakatalai koya tani mai nona vale. Ia na marama yalomalumalumu oqo e sega ni bau tusuka, ni papitaiso oti a mani vakatalai koya dina o ganena. Dina ni sa yabaki 86 ena gauna oya ia e nuitaki Jiova tiko ga. Era vukei koya na lewe ni ivavakoso, e yalodina voli ga me yacova sara nona mai vakacegu.

Vuli e Kiliati, Lesi Sara i Bolivia

Au marautaka dina na lima na yabaki au veiqaravi tiko kina e Tecamachalco. Oti oya au mani sureti meu lai vuli ena imatai ni Gilead Extension School e vakayacori e Mexico. Me vaka ga e laurai ena yaca ni koronivuli oqo, e isema ga ni vuli e caka ena koronivuli e tiko mai Niu Yoka. Rau cikeva o Nana kei Carmen meu ciqoma na veisureti, au mani lako ina valenivolavola ni tabana e Mexico City meu lai tiko ena vuli e tini na macawa na kena balavu, oya na ilutua ni veika vakayalo ena noqu bula. Keimami a tuvaitutu ena 1 Feperueri, 1981, au mani lesi i La Paz, Bolivia, vata kei Enriqueta Ayala (sa veisau na ikarua ni yacana me o Fernández).

Ni keirau kele yani ena raraniwaqavuka e La Paz, era se bera mai na mataveitacini era mai tavaki keirau. “Daru kua ni vakaoti gauna,” keirau kaya. Tekivu sara me keirau vunau vei ira era tu ena raraniwaqavuka. E marautaki na tolu na aua oya, oti keirau sa qai sota kei iratou na mataveitacini mai na valenitabana. Eratou kere veivosoti, ratou qai vakamacalataka ni osooso vakalevu na gaunisala ena vuku ni dua na soqo ni marau.

 Vunau ena Vanua Cere

O La Paz e voleka ni 3,625 na mita na kena cere mai waitui, ena levu gona na siga keimami na toka ena vanua cere qai no e ra na o. E dredre na cegu ena vuku ni cagi batabata, au dau qai oca totolo ni oti ga e dua na gauna lekaleka noqu vunau tiko. Dina ni taura e dua na yabaki meu matau ena draki e kea, na veivakalougatataki i Jiova e ulabaleti kina na leqa e dau sotavi. Kena ivakaraitaki, ena dua na mataka ni 1984, au cabeta e dua na yasa ni tokaitua vatuvatu meu yacova e dua na vale e toka sara e delana. Sa dua na ka na noqu wawale, au mani tukituki e katuba, e curu mai i tuba e dua na marama. Totoka dina na neirau veivosaki au qai tukuna vua niu na lesu tale yani ena loma ni vica na siga.

“Au sega ni vakabauta,” e kaya. Au mani lesu dina, qai kerea na marama oya meu vakavulici luvenayalewa ena iVolatabu. “Oqo e nomuni itavi na itubutubu,” au kaya. “Ia au na vukei iko ke o vinakata.” A mani vakadonuya qai vinakata tale ga me vulica na iVolatabu. Me vaka ni sega ni kila na wilivola, keirau mani vuli ena ivola na Learn to Read and Write, e vakarautaka na iVakadinadina i Jiova me baleti ira sara ga era sega ni kila na wilivola.

Yaco na gauna sa tubu na vuvale ni sa walu na gone. Niu dau lako yani eratou na yatuni ratou qai veitauriliga e so na gone me ratou dreti au cake kina mai baba. Mani yaco gona me ratou qaravi Jiova na vuvale kece​—o tama, tina, kei iratou na walu na gone. E tolu na yalewa eratou painia, qai dua vei iratou na tagane e qase ni ivavakoso. O tamadratou a dauveiqaravi ni ivavakoso ena gauna e mai takali kina ena yabaki 2000. Au marau dina niu dau vakasamataka na vuvale totoka oqo kei na nodratou yalodina! Au vakavinavinaka vei Jiova ni vakatara meu vukei iratou.

Tomani Au Tale o Carmen

Ni sa vakacegu o tinaqu ena 1997, a sureti tale o Carmen me veiqaravi vakapainia lavotaki. Ena 1998 a lesi yani i Cochabamba, Bolivia, na vanua au veiqaravi tiko kina. Io, sa oti e 18 na yabaki keirau sa mai cakacaka vata tale, sa tekivu tale ga kina nona cakacaka vakadaukaulotu o Carmen. Keirau marautaka dina na neirau tiko e Cochabamba, qai totoka na kena draki! Ena gauna oqo keirau sa tiko e Sucre, Bolivia, e dua na siti totoka e koto ena dua na buca cere, e 220,000 na iwiliwili ni lewenivanua. A dau vakatokai tu na vanua oqo me o Vatikani Lailai baleta ni levu kina na valenilotu ni Katolika, ia oqo sa tiko kina e lima na ivavakoso ni iVakadinadina i Jiova.

Ni soqoni vata na yabaki ni neirau cakacaka vakapainia kei Carmen, e sa sivia na 60 na yabaki, keirau qai marautaka neirau rawa ni vukei ira e sivia na le duanadrau me yacova sara na nodra papitaiso. Io, nida qaravi Jiova ena lomada taucoko, e sega ni vakabekataki ni oya na ivakarau ni bula e vinaka duadua!​—Marika 12:30.

[iVakamacala e ra]

[iYaloyalo ena tabana e 15]

Au cabeta e dua na yasa ni tokaitua vatuvatu meu vuli iVolatabu kei na vuvale oqo

[iYaloyalo ena tabana e 15]

Ena cakacaka vakaitalatala kei tuakaqu, o Carmen (ena imatau)