Sa Ganiti Koya Beka me Watiqu?
Ra Taroga na iTabagone . . .
Sa Ganiti Koya Beka me Watiqu?
Taura nomu gauna mo sauma vinaka kina na taro oqo:
Na itovo cava o raica ena gauna oqo e bibi me tiko vua na nomu itau o sa nanuma tiko mo drau na vakamau? Toqa na ena yasa ni itovo o nanuma ni bibi.
․․․․․rairai vinaka
․․․․․yalovinaka
․․․․ kilai
․․․․․tamata lasa
․․․․․dau bulataka na veika vakayalo
․․․․․nuitaki
․․․․․daucaka dodonu
․․․․․dau tekia qai rawata nona isausau
O dau wedeva lo tu beka e dua ni o se gone? Toqa na ena yasa ni itovo e dreti iko vakalevu ena gauna oya.
SEGA ni dua na leqa ena itovo se na ka e kilai tani kina e dua era volai toka oqo e cake. Sega beka ni o vakadinata ni gauna eda domona lo kina e dua nida se gone eda kauaitaka ga na irairai e sau, me vaka na kena era volai tu ena yasana imawi?
Nida sa matua tiko mai, eda sa na vakayagataka noda vakasama meda dikeva kina na veika e bibi, me vaka na kena e volai tu ena yasana imatau. Kena ivakaraitaki, o sa qai raica rawa ni goneyalewa rairai vinaka drau yasayasa vata e sega ni dau nuitaki, se na gonetagane kilai levu e koronivuli e dukadukali na nona itovo. Ni sa “oti na gauna ni gone”—na gauna e dau tekivu kaukaua sara ga kina na gagadre ni veiyacovi—o sa na sega ni raica na irairai e sau mo sauma kina na taro oqo, Sa ganiti koya beka me watiqu?—1 Korinica 7:36, NW.
Meu Digia Beka ga e Dua Sa Rawa?
Ni o sa matua tiko mai, o sa na rairai domona e so na tagane ke o yalewa, se so na yalewa ke o tagane. Ia sa na sega ga ni vaka eliu, mo mateca ga e dua sa rawa. O na vinakata me kemu isa e dua mo drau na bula vata ena dua na gauna balavu, mo drau na veitokoni vinaka ena veika drau cakava vata e veisiga. (Maciu 19:4-6) O cei beka sa na donui koya na madigi oqori? Ni bera ni o sauma na taro oqo, rai mada ‘ina iloilo’ qai dikevi iko vinaka.—Jemesa 1:23-25.
Mo kilai iko vinaka, sauma na taro oqo:
Na cava e so na itovo au vinaka kina?
․․․․․
Na cava na noqu malumalumu?
․․․․․
Na cava au dau gadreva tu e lomaqu kei na noqu gagadre vakayalo?
․․․․․
E sega ni ka rawarawa noda saga meda kilai keda vinaka, ia na noda tarogi keda ena taro oqo, e itekitekivu ni noda kilai keda vinaka. * Ke da kilai keda vinaka, ena rawarawa tale ga noda raica e dua ena mai vakataucokotaka na itovo vinaka sa tu rawa vei keda. Ia vakacava, ke o nanuma ni o sa kunea e dua na kemu isa ena ganiti iko vinaka?
Ena Dei Beka na Noqu Veivosaki?
Mo sauma rawa na taro oqo, e vinaka mo dikeva rawa na nona inaki se isausau o koya o sa nanuma tiko mo na vakawatitaka. Ia mo qarauna! Rawa ni o dikeva ga na ka e sau se raica ga na ka o via raica, o na sega ni rai sara vakatitobu. E bibi mo solia e dua na gauna. Saga mo kilai koya vinaka.
Levu vei ira na veibuku era sega ni kauai mera kilai ira vinaka nodra itau. E totolo ga nodra raica na ka era taleitaka vata: ‘Keirau taleitaka vata e dua na mataqali vakatagi.’ ‘Keirau taleitaka na cakava vata e dua na ka.’ ‘Keirau duavata ena ka kece ga!’ Ia me vaka ga e sa tukuni oti mai, kevaka e sa oti na gauna ni gone, eda na sega ni raica na irairai e sau, eda na rai vakatitobu. Eda na saga meda kila na ‘yalo sa vuni.’—1 Pita 3:4; Efeso 3:16.
Kena ivakaraitaki, e ka vakayalomatua meda Kalatia 5:19, 20; Kolosa 3:8) Se dau yalorawarawa—e tu vakarau me vakarorogo ke veivosakitaki tiko na ka e sega ni beci kina na ivakavuvuli vakaivolatabu?—Jemesa 3:17.
raica na nona itovo ke da sega ni duavata ena dua na ka, mai na noda kauaitaka tiko ga na ka eda duavata kina. E vakacava na nona rai ni drau sega ni duavata ena dua na ka—e dau vinakata ga me yaco na lomana, e “daucudrucudru” se “vosa ca”? (Dua tale na ka me nanumi: E dau via lewa kece ga na ka, se vuvu? E dau vinakata me kila kece na ka o cakava? E kaya e dua na goneyalewa o Nicole: “Na vuvu e vakaraitaka ni tiko na leqa. Au dau rogoca nira dau veivala o ira na veibuku tiko nira sega ni ‘veiqiriti.’—Oya e vakaraitaka ni tiko na leqa.”
E vakacava nodra rai e so me baleti nomu itau? E vinaka mo veitalanoa kei ira era kilai koya vinaka, me vakataki ira na matua vakayalo ena nona ivavakoso. Era na tukuna vei iko se “rogo vinaka” o koya se sega.—Cakacaka 16:1, 2. *
Meu Vakasuka Beka Neirau Veivosaki?
Vakacava ke o liaca ni na sega ni kemu isa vinaka ni vakawati o koya drau sa veibuku tiko? Ena ka vakayalomatua mo sa na vakasuka ga. E kaya na iVolatabu: “O koya sa yalomatua sa kunea na ca, ka sa vunitaki koya.”—Vosa Vakaibalebale 22:3. *
Ni toso na gauna, o sa na rairai veibuku tale kei na dua. Ia kevaka e sa mani yaco vaka kina, e sega ni vakabekataki ni sa na tiko vei iko na rai vakayalomatua—baleta ni o sa na kila vinaka na ka mo cakava. Ena gauna oqori sa na qai rawa ni o sauma na io ena taro “Sa ganiti koya beka me watiqu?”
[iVakamacala e ra]
^ para. 25 iKuri ni taro mo tarogi iko kina, raica na tabana 30 ni Awake!, Janueri 2007.
^ para. 31 Raica tale ga na kato ena tabana e 25-26.
^ para. 33 O na kunea e so tale na itukutuku me baleta na vakasukai ni veivosaki ena Yadra!, Julai-Sepiteba, 2001, tabana 16-18.
VAKASAMATAKA MADA
◼ Na itovo vinaka cava o dau vakaitovotaki iko kina o kila ni na yaga ena gauna o sa na vakawati kina?
◼ Na itovo cava so o na qara vua na nomu itau mo na vakawatitaka?
◼ Sala cava so o na kila kina e levu na ka me baleti koya drau veitau tiko me vaka na nona itovo, na kena irogorogo, se mataqali tamata vakacava?
[Kato ena tabana e 25]
Ena tagane vinaka beka me vakawatitaki?
SO NA TIKINA BIBI
❑ E dau vakataulewa vakacava?—Maciu 20:25, 26, VV.
❑ Cava so nona isausau?—1 Timoci 4:15.
❑ E sa saga tiko beka me tekia na isausau oqori?—1 Korinica 9:26, 27.
❑ O cei so na nona itokani?—Vosa Vakaibalebale 13:20.
❑ Cava nona rai me baleta na ilavo?—Iperiu 13:5, 6.
❑ Na ka ni veivakamarautaki cava e dau taleitaka?—Same 97:10.
❑ Na cava e tukuna nona isulusulu?—2 Korinica 6:3.
❑ Sala cava e vakaraitaka kina ni lomani Jiova?—1 Joni 5:3.
NONA ITOVO
❑ E dau cakacaka?—Vosa Vakaibalebale 6:9-11.
❑ E dau vakayagataka beka vakavuku na ilavo?—Luke 14:28.
❑ E vinaka beka na kena irogorogo?—Cakacaka 16:1, 2.
❑ E dau dokai rau beka nona itubutubu?—Lako Yani 20:12.
❑ E dau veikauaitaki?—Filipai 2:4.
NA IVAKATAKILAKILA NI TIKO NA LEQA
❑ E dau cudrucudru totolo?—Vosa Vakaibalebale 22:24.
❑ E dau saga beka mo cakava na ivalavala vakasisila?—Kalatia 5:19.
❑ E dau ivalavala kaukaua qai dau vosa vakaukaua?—Efeso 4:31.
❑ E dau vakayagataka beka na yaqona ni valagi se yaqona ni viti me marau kina?—Vosa Vakaibalebale 20:1.
❑ E dau vuvu qai nanumi koya ga?—1 Korinica 13:4, 5.
[Kato ena tabana e 26]
Ena yalewa vinaka beka me vakawatitaki?
SO NA TIKINA BIBI
❑ E dau vakaraitaka vakacava na yalomalumalumu ena vuvale kei na ivavakoso?—Efeso 5:21, 22.
❑ Na cava e tukuna nona isulusulu?—1 Pita 3:3, 4.
❑ O cei so na nona itokani?—Vosa Vakaibalebale 13:20.
❑ Cava nona rai me baleta na ilavo?—1 Joni 2:15-17.
❑ Cava so nona isausau?—1 Timoci 4:15.
❑ E sa saga tiko beka me tekia na isausau oqori?—1 Korinica 9:26, 27.
❑ Na ka ni veivakamarautaki cava e dau taleitaka?—Same 97:10.
❑ Sala cava e vakaraitaka kina ni lomani Jiova?—1 Joni 5:3.
NONA ITOVO
❑ E dau cakacaka?—Vosa Vakaibalebale 31:17, 19, 21, 22, 27.
❑ E dau vakayagataka beka vakavuku na ilavo?—Vosa Vakaibalebale 31:16, 18.
❑ E vinaka beka na kena irogorogo?—Ruci 4:11.
❑ E dau dokai rau beka nona itubutubu?—Lako Yani 20:12.
❑ E dau veikauaitaki?—Vosa Vakaibalebale 31:20.
NA IVAKATAKILAKILA NI TIKO NA LEQA
❑ E dau veileti?—Vosa Vakaibalebale 21:19.
❑ E dau saga beka mo cakava na ivalavala vakasisila?—Kalatia 5:19.
❑ E dau ivalavala kaukaua qai dau vosa vakaukaua?—Efeso 4:31.
❑ E dau vakayagataka beka na yaqona ni valagi se yaqona ni viti me marau kina?—Vosa Vakaibalebale 20:1.
❑ E dau vuvu qai nanumi koya ga?—1 Korinica 13:4, 5.