Sa Sega Tale ni Bobula ina Yaqona

Na vakayagataki vakarauta ni yaqona ni valagi se yaqona ni Viti e taleitaki kina na kakana se na marautaki ni dua na soqo. Ia, e so e dau vakaleqai ira na gunuvi ni yaqona ni Viti se yaqona ni valagi. Dikeva mada oqo na kena italanoa e dua na turaga e tagutuva na nona daugunu yaqona vakasivia.

E SE dau mositi au ena gauna oqo noqu talanoataka na veika dredre e dau sotavi e vale. Ni rau dau gunu o tamaqu kei tinaqu, e dau tini mokuti tinaqu ga o tamaqu. E dau vacuki au tale ga o tamaqu ena levu na gauna. Niu se qai yabaki va, rau sa veibiu. Au sega ni guilecava na noqu kau meu lai tiko vei Buqu.

Au vakila niu sevaki. Niu qai yabaki vitu, au sa dau lako lo ina rumu ena ruku ni vale e dau maroroi kina na gunu meu lai gunuva na waini e dau caka ga e vale, oqo e vaka me vakaceguya na noqu rarawa. Ena dua na gauna e katakata sara nodrau veibataki au o tinaqu kei Buqu, oqo niu sa yabaki 12. E katakata sara na cudru i tinaqu, e cokai au kina ena dua na icula balavu matairua. Ia au levea! Oqo e sega ni imatai ni gauna me leqataki kina noqu bula. Na mavoa era tu e yagoqu e sega ni titobu sara me vaka na mavoa ni lomaqu au dau kubuta lo tu.

Niu qai yabaki 14, sa sivia sara noqu gunu. Au dro mai vale niu se qai yabaki 17. Niu dau gunu au dau nanumi au ga, e voravora na noqu itovo, au dau vakatubuca kina ena veivalenikana. Sa vakamarautaki au tu ga na gunu. Ena loma ni dua na siga, au rawa ni gunuva e lima na lita na waini, vica na tavaya bia, kei na so tale na yaqona ni valagi kaukaua me vaka na wisiki.

E vakaleqai watiqu na noqu daugunu ena gauna keirau sa vakamau kina. E tubu na veicati kei na lomaca, au dau mokuti koya kei rau na gone, e vakilai kina e vale na ivakarau ni bula rarawa ga au susugi kina. Voleka ni ilavo kece au rawata e vakayagataki ena gunu. Ni sega na neitou iyayanivale, keirau dau moce toka ga kei watiqu ena fuloa. Sa sega ni vakainaki na noqu bula, au sega tale ga ni saga me vinaka na neitou bula e vale.

Dua na siga keirau veitalanoa kei na dua na iVakadinadina i Jiova. Au tarogi koya se cava na vuna sa rui levu kina na rarawa, qai vakaraitaka vei au o koya na yalayala ni Kalou ena iVolatabu me baleta na vuravura ena sega kina na leqa. Oqo sara ga e vakadeitaka vei au meu tekivu vuli iVolatabu kei ira na iVakadinadina. Niu sa bulataka na ivakavuvuli vakaivolatabu kei na noqu  vakalailaitaka na gunu, e vinaka cake sara na neitou bula vakavuvale. Ia, au kila ni kevaka me vakadonuya na Kalou o Jiova na noqu veiqaravi, ena vinakati meu valuta na noqu dau gunu yaqona. Ena loma ga ni tolu na vula, sa oti sara ga na noqu gunu yaqona. Ni oti tale e ono na vula au sa yalataka noqu bula vua na Kalou, au papitaiso sara.

Au sauma kece noqu dinau, baleta niu sa sega tale ni bobula ina gunu yaqona. Au volia rawa sara e dua na vale kei na dua na motoka, me vukea na neitou ilakolako ina soqoni vakarisito kei na cakacaka vakavunau e veivale. Sa qai vakadua meu sega ni beci au.

Ena so na soqo ni marau, au dau sureti meu gunu yaqona. Levu era sega ni kila na noqu sasaga kaukaua, kei na kena rawa me kauti au lesu ina noqu sala makawa na dua ga na bilo oya. So na gauna e dau tubu mai lomaqu na gagadre ni gunu yaqona. Au dau masulaka me soli vei au na kaukaua meu vakuai au tiko ga. Niu karamaca, au dau gunuva ga vakalevu e so tale na wai era sega ni wakivata kei na yaqona. Sa tini na yabaki oqo na noqu sega ni bau tara tale na yaqona.

E sega ni rawata na tamata na ka e cakava o Jiova. E vukei au meu marautaka na galala au sega vakadua ni vakabauta niu na rawata! Se dau mositi au tiko ga na veika e yacovi au niu se gone, au se valuta tiko ga na yalolailai. Ena yasana a dua, au kalougata dina niu mai veiwekani vinaka kei na Kalou, o ira na noqu itokani dina ena ivavakoso, kei na noqu vuvale keitou vakabauta vata. Eratou tokoni au o watiqu kei rau na gone ena noqu valuta tiko na dau gunu yaqona. E tukuna o watiqu: “A dredre dina na bula au sotava. Ia oqo, au vakavinavinakataka vei Jiova ni keitou sa bula mamarau vakavuvale.”​—Cautaki.

[Tikina bibi ena tabana e 27]

Niu qai yabaki 14, sa sivia sara noqu gunu

[Tikina bibi ena tabana e 28]

E sega ni rawata na tamata na ka e cakava o Jiova

[Kato/​iYaloyalo ena tabana e 28]

NA IVOLATABU KEI NA YAQONA

◼ E sega ni vakacala na iVolatabu na gunu yaqona. E vakamacalataka ni ‘waini, e vakamarautaka na loma ni tamata,’ e isolisoli ni Kalou vei keda. (Same 104:14, 15) Ena iVolatabu na vaini e vakatakarakarataka na vutuniyau kei na tiko nuidei. (Maika 4:4) Nona vukica na wai me waini ena dua na soqo ni vakamau e imatai sara ga ni cakamana i Jisu Karisito. (Joni 2:7-9) Ni rogoca na yapositolo o Paula ni ‘dau tautauvimate’ o Timoci, e vakatura me gunuva “vakalailai na waini.”​—1 Timoci 5:23, VV.

◼ Ia na iVolatabu e vakacala na kena gunuvi vakasivia na yaqona:

“Era na sega ni rawata na matanitu ni Kalou . . . na daumateni.”​—1 Korinica 6:9-11, VV.

“O koya gona mo ni kakua kina ni daumateni ni sa daucaka kina na ka vakasisila.”​—Efeso 5:18.

“Ko cei sa vakaulei? Ko cei sa rarawa? Ko cei sa veileti? Ko cei sa dauvosabalavu? Ko cei sa mavoa wale? Ko cei sa damudamu na matana? Ko ira era gunu waini tiko vakadede: ko ira era la’ki qara na waini sa veiwaki vata. Kakua ni ko qoroya na waini ni sa damudamu, ni sa roka vinaka mai e na bilo, ka vinaka na kena gunuvi. Sa oti, sa kata me vaka na gata, ka sa kata me vaka na gata dauveikata. A matamu ena kunei ira na yalewa tani, ia na lomamu ena cavuta na ka vakatani.”​—Vosa Vakaibalebale 23:29-33.

Me vaka eda raica ena ulutaga sa oti, e so na daugunu yaqona vakasivia era sa vakatulewataka mera sa vakatabui ira sara ga kina.​—Maciu 5:29.