Ra Taroga na iTabagone . . .

Vakacava ke Marici au e Dua me Keirau Veiyacovi?

“Na inaki levu ga era dau veisa kina noqu icaba oya mera lai veiyacovi. Na levu ga ni tamata era mocera, na kena vinaka vei ira.”​—Penny. *

“O ira na tagane era dau raqataka na ka qo. E so e sa tiko rawa na nodra itau, era qai dau talanoataka yavoki nira sa veiyacovi kei na so tale na goneyalewa.”​—Edward.

“Era doudou wale o ira na dau mai marici au. Keu mani tukuna na sega, era na surevaki ira ga!”​—Ida.

ENA so na vanua, ni rau lako vata e rua, e tukuni ni rau lasa. Ia mai Japani, ni rau cakava oqori, e tukuni ni rau sa veikau oti, e kaya o Akiko, e dua na goneyalewa. E tukuna ni “tiko tale e dua na kena ivosavosataki, na sefre, kena ibalebale, ‘veitau ga ni veiyacovi.’” “Dua ga na inaki erau veitau kina, oya me rau veiyacovi.”

Se mani yaca cava e vakatokai kina na veitau oqo, na kena ibalebale e dua ga​—e caka na veiyacovi me ka ga ni lasa. * E so na itabagone era bau sakitaka ni tiko nodra itokani e rawa nira veiyacovi kei ira ena gauna cava ga e lomadra kina oqori. E kaya e dua na goneyalewa, “Qo e ka ga ni nomu vakaceguya na nomu gagadre ena gauna cava ga sa lomamu mai kina mo veiyacovi. Rawa ga na lomamu, o biubiu tale.”

Ni o lotu Vakarisito, sa dodonu mo “dro tani mai na daudara (“veidauci,” NW).” * (1 Korinica 6:18) Ke matata vei iko na ivakavuvuli oqo, o na saga mo lako tani mai na ituvaki ena rawa ni vakaleqai iko. Ia so na gauna, sa lakovi iko ga mai na leqa. “Levu na gonetagane mai koronivuli era mai vosa sara ga vei au,” e kaya o Cindy. Rawa ni yaco tale ga oqori ena vanua ni cakacaka. “Mai marici au o noqu manidia,” e kaya o Margaret. “Dua na ka nona vakasosani au, niu biuta sara ga kina noqu cakacaka!”

Ia kua ni kurabui ke o vakila ni veidre na lomamu ena ka oqo. E kaya na iVolatabu: “Sa ka dauveivakaisini duaduaga na yalo ni tamata, ka sa dredre ni vinaka.” (Jeremaia 17:9) Na ka oqo  e vakadinata o Lourdes. E kaya: “Au taleitaki koya na tagane a kaya me keirau veiyacovi.” Via vaka tale ga oqo na ka e sotava o Jane, e kaya: “Au sa bau lewa dredre na yaloqu. Dredre dina meu tukuna vua na sega.” O Edward tale ga, sa cavuti oti mai, e tukuna ni sega ni ka rawarawa me savasava tiko ga. “Levu na goneyalewa era mai tukuna sara ga vei au nira via moce vata kei au. Niu lotu Vakarisito, au sa bau tataqeadredre dina oya. Sega dina ni rawarawa mo tukuna na sega!”

Ke o sa vakila tale ga na ka eratou sotava o Lourdes, Jane, kei Edward ia o qai cakava ga na ka e kilikili ena mata i Jiova, e dodonu mo vakacaucautaki. E veivakacegui meda kila ni a dau sagasaga dredre tale ga na yapositolo Paula me kua ni galeleta na ca.​—Roma 7:21-24.

Na ivakavuvuli vakaivolatabu cava mo nanuma tiko ke marici iko e dua mo drau veiyacovi?

Mo Kila na Vuna e Cala Kina na Veidauci

E vakacala na iVolatabu na veiyacovi ena taudaku ni vakawati. E cala bibi na veidauci, ia o ira na vakamatauna “era na sega ni rawata na matanitu ni Kalou.” (1 Korinica 6:9, 10) O na vorata na gagadre ni via veidauci ke o saga me tiko sara ga vei iko na rai i Jiova. Me nomu lewa dei mo kua sara ni vakadukadukalitaki iko ena ivalavala oqo.

“Au vakabauta deivaki ni vinaka duadua ga ena noda bula na ivakavuvuli i Jiova.”​—Karen, Canada.

“Dau levu na leqa ke beci na lawa savasava i Jiova ena kena guti na lasa e lekaleka wale na kena kamica.”​—Vivian, Mexico.

“Nanumi rau tiko na nomu itubutubu, o ira na nomu itokani, kei ira na lewe ni ivavakoso. Era na rarawa dina ke o vakamalumalumu ina itovo ca!”​—Peter, Peritania.

E vola na yapositolo o Paula: “Dou vakatovolea na ka sa vinaka vua na Turaga.” (Efeso 5:10) Ke da saga me tiko vei keda na rai i Jiova me baleta na veidauci, eda na “cata na ka ca,” veitalia se mani vakacava sara na idre ni yagoda ivalavala ca.​—Same 97:10.

◼ Vakawilika toka: Vakatekivu 39:7-9. Raica mada i keri nona doudou o Josefa me vorata na veitemaki, kei na vuna e rawa kina vua me cakava oqori.

Sakitaka Nomu Vakabauta

So na itabagone era dau tutaka ena doudou na nodra vakabauta. Ni o lotu Vakarisito, sa dua dina na ka dokai mo maroroya na irogorogo vinaka ni yaca ni Kalou ena nomu itovo rakorako. Kua ni madua ke ra vakalialiai iko e so ni o vakacala na veiyacovi ni se bera na vakamau.

“Me matata vei ira tale e so ni o cata na itovo vakasisila.”​—Allen, Jamani.

“Kua vakadua ni maduataka na nomu vakabauta.”​—Esther, Nigeria.

“Era na sega ni ciqoma na nomu icaba na nomu rai me baleta na veidauci ke o kaya wale tu ga, ‘Rau sega ni vakadonuya na noqu itubutubu meu na lako vata kei iko.’ Mo vakaraitaka sara ga vakadodonu vei koya e mai marici iko ni o sega sara ga ni taleitaka mo lako vata kei koya.”​—Janet, Sauca Aferika.

“Era kilai au vinaka na gonetagane mai koronivuli, era kila tale ga ni na maumau wale nodra via sagai au.”​—Vicky, Mereke.

Ke o tutaka na nomu vakabauta, e dusia  oqori ni o sa veisau tiko mai mo lotu Vakarisito matua.​—1 Korinica 14:20.

◼ Vakawilika toka: Vosa Vakaibalebale 27:11. Saga mo raica e ke se tokona vakacava na vakacerecerei ni yaca i Jiova na nomu ivalavala!

Kua ni Vakamalumalumu!

E bibi mo tukuna sara ga na sega. Ia e so era na nanuma ni o vaqitoqito tiko ga ni o kaya na sega.

“Ke o kaya na sega, e sega ni dua na ka vei ira e so qori, baleta ni kamikamica vei ira mera dau sasagataka na ka dredre.”​—Lauren, Canada.

“Na ka kece baleti iko—nomu isulusulu, ivosavosa, o koya o vosa vua, kei na nomu ivalavala—me vakaraitaka votu ni o bese dina.”​—Joy, Nigeria.

“Kua tale ni tukuna tiko vakamalua na sega!”​—Daniel, Ositerelia.

“Kua sara ni vakamalumalumu! Ni via marimari mai vei au e dua na cauravou, au qai kaya, ‘Kua ni tarai au!’ Oti, au gole tani yani ena matacudrucudru.”​—Ellen, Peritania.

“Mo vosa sara ga vakadodonu, mo kaya ni o sega sara ga ni taleitaki koya se na ka e via cakava tiko. Kua ni via vakamalumalumu!”​—Jean, Sikoteladi.

“Dua na tagane e dau vakasosani au ena vosa marimari kei na vosa veicavilaki. Dua na siga, au sa qai vosataki koya vinaka. E oti sara ga kina nona veivakasosani.”​—Juanita, Mexico.

“Mo vakamatatataka vua ni ka e lomana tiko ena sega sara ga ni yaco. Kua vakadua ni ciqoma na isolisoli vakasuina era via solia vei iko na tagane. Era na vakayagataka tale qori me kemu ivesu.”​—Lara, Peritania.

Ke o dei ena ka o tukuna kei na nomu ivalavala, ena vukei iko o Jiova. Mai na veika e sotava, e rawa kina vei Tevita me kaya me baleti Jiova: “Vei koya sa dina, oni na dina tale ga vua.”​—Same 18:25, NW.

◼ Vakawilika toka: 2 Veigauna 16:9. Eda raica e ke ni tu vakarau o Jiova me vukea na tamata e dodonu na lomana vua.

Mo Yalomatua

E kaya na iVolatabu: “O koya sa yalomatua sa kunea na ca, ka sa vunitaki koya.” (Vosa Vakaibalebale 22:3) O na muria vakacava na ivakasala oya? Ena nomu yalomatua!

“Kua ni vakailala kei ira na dau veivosakitaka na veika va ya.”​—Naomi, Japani.

“Qarauna na ilala kei na ituvaki e rawa ni vakavuleqa. Au kila e so era temaki rawarawa nira sa kube tu.”​—Isha, Brazil.

 “Kua sara ni tukuna nomu katonimeli se nomu naba ni talevoni.”​—Diana, Peritania.

“Qarauna nomu isulusulu, de veivagarogaroi.”​—Heidi, Jamani.

“E itataqomaki vinaka ke vinaka tu nomu veiwekani kei rau nomu itubutubu, e rawarawa kina nomudou veivosakitaka na leqa.”​—Akiko, Japani.

Qarauna na ka o tukuna, nomu itovo, ilala, kei na vanua o dau lakova. Oti qai tarogi iko, ‘E tukuna tiko beka noqu ivukivuki kei na noqu ivalavala niu vinakata na lasa tawakilikili?’

◼ Vakawilika toka: Vakatekivu 34:1, 2. Eda raica e ke ni dua na vanua ca e tini kina o Taina baleta ga ni a lakova na vanua e sega ni dodonu me lako kina.

Nanuma tiko, ke raici na veidauci me ka ni lasa, ia e sega ni lasa vei Jiova. O iko tale ga mo kua ni raica vakamamada. E kaya na iVolatabu: “Ena sega sara na nonai votavota e na matanitu nei Karisito kei na Kalou, e dua na daudara, se dua sa velavela.” (Efeso 5:5) Ena vinaka nomu lewaeloma, o na taqomaka tale ga na kemu irogorogo ke o tutaka na ka e dodonu. Oqo na ka e kaya e dua na goneyalewa, o Carly, “Kua ni soli iko tu ga vakarawarawa mo lai vakaceguya kina nona garosa e dua tale. Saga vakaukaua mo taqomaka na kemu savasava o maroroya voli mai ena dua na gauna balavu!”

[iVakamacala e ra]

VAKASAMATAKA MADA

◼ De na kamica beka na veiyacovi vakaveitalia, ia na cava e cala kina?

◼ Na cava o na cakava ke dua e marici iko mo drau veiyacovi?

[Kato ena tabana e 19]

◼ E kaya na iVolatabu ni o koya e nona ivalavala na veidauci e “sai valavala ca ki na yagona.” (1 Korinica 6:18) E dina vakacava oqo? Vakasamataka mada qai vola e ra se dina vakacava oqori.

․․․․․

Ke o via kila na isaunitaro e volai oqori e cake, raica na ivola na Reasoning From the Scriptures, tabana e 188, kei na Insight on the Scriptures, Volume 1, tabana e 863. Era tabaka na iVakadinadina i Jiova na ivola ruarua oqori.

[Kato ena tabana e 21]

VEI KEMUNI NA ITUBUTUBU

“Kerei au e dua na tagane mai koronivuli ni vinakata me keirau veikilai. Oti toka vakalailai, au sa qai siqema ni duatani tale na ka e vakaibalebaletaka tiko. Au se yabaki 11 ena gauna oya.”​—Leah.

Sa ra bau lai kila sara vakamatailalai na gone nikua na veika me baleta na veiyacovi. Se tukuna makawa mai na iVolatabu ni na gauna ‘cacamatua na veisiga emuri’ oqo, era na sega kina ni ‘lewa na yalodra’ na tamata, era na ‘lomana ga vakalevu na marau, lailai nodra lomana na Kalou.’ (2 Timoci 3:1, 3, 4, NW) E dua na ivakadinadina ni sa vakayacori tiko na parofisai oqo na kena sa matau vei ira na itabagone nikua mera veiyacovi vakaveitalia, me vaka e sereki ena ulutaga oqo.

Sa veisau sara vakalevu na bula mai na gauna eda se lailai kina. Ia na leqa eda sotava, se o koyakoya tiko ga. Kua gona ni nuiqawaqawa vakasivia se vuturi vakalevu ni o raica tu na levu ni ka ca sa tu e matadra na luvemu. Me nomu sasaga ga mo vukei ira mera cakava na ka a vakauqeti ira kina na lotu Vakarisito ena 2,000 na yabaki sa oti na yapositolo o Paula: “Dou vakaiyaragi e nai yaragi kecega ni Kalou mo dou tu dei rawa ka vorata nai lawaki ni tevoro.” (Efeso 6:11) Sa dua na ka vinaka ni levu na itabagone lotu Vakarisito era sasaga tiko vakaukaua mera cakava na ka e dodonu ena vuravura oqo sa sinai ena itovo torosobu. O na vukea vakacava na luvemu me cakava tale ga oqori?

Dua, nomu vakayagataka na ivakamacala ena ulutaga oqo mo veivosaki sara ga kina vakadodonu, vakasavasava kei na luvemu tagane se yalewa. E so na tikina yaga dina e tiko ena tikinivolatabu e vakaturi me wiliki mai. Ena so na tikina oqori, era tukuni kina e vica na tamata era tutaka na ka e dodonu ra qai vakalougatataki kina, se ra beca na lawa ni Kalou qai kedra kina na isamunidawa. E tiko ena so tale na tikinivolatabu oqori e so na ivakavuvuli yaga o na liaca kina kei ira na luvemu ni dua na ka dokai dina me bulataki na lawa ni Kalou. De vinaka mo se tei lalawataka mo na taleva vata kei ira na ulutaga oqo.

Ena sega vakadua ni lako vakaca vei keda na noda vakaitovotaka na ivakavuvuli ni Kalou. (Aisea 48:17, 18) Ia ke da vakalecalecava, eda na sotava ga kina na rarawa. Nodratou vakanuinui o iratou na tabaka na Yadra! ni na vakalougatataki iko o Jiova ena nomu sasaga mo tuberi ira na luvemu ena lawa kei na ivakavuvuli vakalou.​—Vakarua 6:6, 7.

[iYaloyalo ena tabana e 20]

Mo vakamatatataka vua ni ka e lomana tiko ena sega sara ga ni yaco