Yalomalumalumu—E Nodra iTovo Beka na Dadatuvu?
Na Rai Ni iVolatabu
Yalomalumalumu—E Nodra iTovo Beka na Dadatuvu?
E DAU raica o vuravura mera vakadamurimuri na tamata dokadoka kei ira na yalovakatani. Ia, na tamata yalomalumalumu qai malua e dau raici mera ka malumalumu, mamadua, se ra dau solimaka. E dadatuvu beka na yalomalumalumu dina? E ivakaraitaki beka ni kaukaua na dokadoka? Na cava sara mada e kaya na iVolatabu?
Taumada, na iVolatabu e sega ni vakacala na noda dokadokataka e so na ka. Me kena ivakaraitaki, era sakitaka na lotu Vakarisito ni nodra Kalou o Jiova qai kilai ira o koya. (Same 47:4; Jeremaia 9:24; 2 Cesalonaika 1:3, 4, NW) Era sakitaki luvedra na itubutubu nira ivakaraitaki vinaka ena itovo vakarisito ra qai dei tale ga ena sokalou dina. (Vosa Vakaibalebale 27:11) Ia, e tiko tale ga na dokadoka e ca.
Vakadeuci Mada na Dokadoka kei na Yalomalumalumu
E dua na ibalebale ni dokadoka oya na nona rui nanumi koya vakasivia e dua. Na mataqali dokadoka vaka oqo e vakavuna me biubiuti koya cake kina e dua qai qaciqacia, baleta beka na totoka ni kena irairai, na matatamata e cavutu mai kina, na nona itutu vakavanua, nona taledi se na ka e taukena. (Jemesa 4:13-16) E tukuna na iVolatabu ni so era “na dokai ira ga vakai ira.” (2 Timoci 3:4, VV) Se dua tale na kena itukutukuni era sa rui dau vakalevulevui ira, dina ga ni sega na vuna vinaka.
Ena yasana kadua, o ira na yalomalumalumu era na saga mera dikevi ira vakayalomatua ena nodra kila nira tamata ivalavala ca ra qai lolovira ena mata ni Kalou. (1 Pita 5:6) Kuria, era ciqoma—ra qai rekitaka—na nodra itovo uasivi na tani. (Filipai 2:3) Era sega gona ni rawai ena yalo ni sisivo se vuvu. (Kalatia 5:26) Sa rauta me tukuni ni yalomalumalumu dina e vakavurea na veimaliwai vinaka kei ira na tani, qai kauta mai na yalonuidei kei na veinuitaki.
Dikeva mada na ivakaraitaki i Jisu. Ni bera na nona lako mai vuravura, a dua na kabula vakayalo kaukaua mai lomalagi. Ni mai bula e vuravura, a tamata uasivi. (Joni 17:5; 1 Pita 2:21, 22) Sega ni vakatauvatani rawa na ka e rawata, nona vuku kei na ka e kila. Ia, a sega ni dokadokai koya, e dau yalomalumalumu tu ga. (Filipai 2:6) A vuya na yavadratou na yapositolo ena dua na gauna, qai dau kauaitaki ira na gonelalai. (Luke 18:15, 16; Joni 13:4, 5) A vakatura o Jisu e dua na gone e yasana qai kaya: “[O] koya sa vakamalumalumutaki koya me vaka na gone lailai oqo, ko koya ga sa levu cake e na matanitu vakalomalagi.” (Maciu 18:2-4) Io, ena mata i Jisu—kei na Tamana—na itovo uasivi duadua na yalomalumalumu, sega ni dokadoka.—Jemesa 4:10.
Sega ni Dadatuvu na Yalomalumalumu
Dina ga ni ivakaraitaki vinaka ni yalomalumalumu o Jisu, ia a sega ga ni dau solimaka se rerere. E doudou ni tukuna na ka dina qai sega ni rerevaka na tamata. (Maciu 23:1-33; Joni 8:13, 44-47; 19:10, 11) Era dokai koya sara mada ga e so vei ira na dau tusaqati koya. (Marika 12:13, 17; 15:5) Sega vakadua ni vakacolasau o Jisu. Ia, ena yalomalumalumu, yalovinaka kei na loloma e rawarawa kina nira torovi koya na tamata, na sala era sega ni rawata na dokadoka. (Maciu 11:28-30; Joni 13:1; 2 Korinica 5:14, 15) Ena gauna mada ga oqo, era lewe vica na milioni era vakamalumalumutaki ira vei Karisito baleta nira lomana dina ra qai dokai koya.—Vakatakila 7:9, 10.
E uqeta na yalomalumalumu na Vosa ni Kalou baleta ni o ira na yalomalua era tu vakarau mera ciqoma na ivakasala qai marautaki tale ga na vakavulici ira. (Luke 10:21; Kolosa 3:10, 12) Vakataki Apolosa ga, e dua na lotu Vakarisito qasenivuli maqosa ena imatai ni senitiuri, era dau tu vakarau mera veisautaka na nodra rai nira vakavulici ena so na ivakavuvuli vou. (Cakacaka 18:24-26) Era sega ni rere na taro, ia o ira na dokadoka era sega ni cakava vaka kina nira rerevaka de na qai kilai na nodra lecaika.
Dikeva mada na ivakaraitaki i koya na matanivanua ni Iciopea ena imatai ni senitiuri, ni a sega ni matata vua e so na tikina ena iVolatabu. “O sa kila na ka ko sa wilika, se segai?” e taroga vua o Filipi na tisaipeli lotu Vakarisito. Qai sauma na matanivanua ni Iciopea: “Au sa rawata vakaevei, kevaka sa sega e dua me tuberi au?” Oqo na yalomalumalumu dina—vakauasivi ni matanivanua oya e rairai turaga kilai levu toka ena nona vanua! Ena vuku gona ni nona yalomalumalumu, e yaco kina me kila na veika titobu ena iVolatabu.—Cakacaka 8:26-38.
E duidui vakalevu na turaga ni Iciopea oya vei ira na vunivola Jiu kei ira na Farisi, era vakatokai ira mera kenadau ena ka vakalotu ena nodra gauna. (Maciu 23:5-7) Era sega ni yalomalumalumu na vakarogoci Jisu kei ratou na nona imuri, sa ra qai vakalialiai ratou ra qai vaqara cala mera dusi ratou kina. O koya gona, na nodra dokadoka e vakavuna na nodra lecaika vakayalo.—Joni 7:32, 47-49; Cakacaka 5:29-33.
O Vaka Beka na Qele Malumu se na Qele Kaukaua?
E vakatauvatani Jiova na iVolatabu ina dautulikuro, o keda na tamata eda vaka na tete se qele. (Aisea 64:8) Na yalomalumalumu e vukea na tamata me vaka na tete malumu ena liga ni Kalou, yaco kina me dua na iyaya vakamareqeti; ia o ira na viavialevu era vaka na tete mamaca, kaukaua qai kavuru rawarawa. Na ivakaraitaki kilai levu ni dokadoka o Fero e Ijipita makawa. A beci Jiova mani vakayalia kina nona bula. (Lako Yani 5:2; 9:17; Same 136:15) E vakamacalataki Fero vinaka na vosa vakaibalebale: “Sa liu na viavialevu, ia sa muri na rusa, a sa liu na yaloviavialevu ia sa muri na bale.”—Vosa Vakaibalebale 16:18.
Mai na veika sa tukuni oti, eda oka tale ga kina na tamata ni Kalou meda saga ni valuta na dokadoka. Me kena ivakaraitaki mada o ratou na yapositolo i Jisu eratou dau veibataka se o cei e uasivi cake. (Luke 22:24-27) Ia, a sega ni rawai ratou na dokadoka, eratou a vakarorogo ga vei Jisu ratou qai veisautaka na nodratou rai.
“A kenai sau ni yalomalumalumu kei na rerevaki Jiova nai yau, kei na vakarokoroko, kei na bula,” e vola o Solomoni. (Vosa Vakaibalebale 22:4) Sa gadrevi dina ga meda bucina na yalomalumalumu! E sega wale ga ni itovo talei qai ivakaraitaki ni tamata kaukaua, ia ena vukei keda meda vakadonui vua na Kalou, da qai vakaicovitaki tale ga ena bula tawamudu.—2 Samuela 22:28; Jemesa 4:10.
O BAU VAQAQA BEKA?
◼ E cala kece beka na dokadoka?—2 Cesalonaika 1:3, 4, NW.
◼ E uqeta vakacava na vuli na yalomalumalumu?—Cakacaka 8:26-38.
◼ E dodonu beka mera bucina na yalomalumalumu na tamata ni Kalou?—Luke 22:24-27.
◼ Na cava e sa waraki ira tu na yalomalumalumu?—Vosa Vakaibalebale 22:4.
[iYaloyalo ena tabana e 22]
E rawarawa nira torovi Jisu na gone baleta ni turaga yalomalumalumu