iTabagone Era Dau Veitaratara ena Internet

Vakasamataka mada me yavoki taudua tu e gaunisala ena bogi na luvemu.

Vakasamataka mada ke tuvanaka tiko na luvemu me caka e nomudou e dua na pati o qai sega ni kila.

Vakasamataka mada ke lai cakava o luvemu e vica tale na ki ni nomudou vale qai veisoliyaka vei ira na tamata dou sega sara ga ni kila.

KEVAKA e dau vakayagataka na luvemu na Internet, na veituvaki e tukuni toka oqori mai cake e rawa nira yaco dina sara tiko ga. “Sa levu sara tu na iwalewale e rawa nira veikilai ra qai sota kina kei na so tale ena Internet, e vakau qai ciqomi tale ga kina na itukutuku, kei na kena e vakatokai na social networking site,” e kaya na ivola na Science News.

Sa totolo dina na nodra kila na itabagone na vakayagataki ni Internet. Ena 2004, rauta ni 9 mai na veiya10 na tamata e Mereke era tiko ena yabaki 12 ina 17 era vakayagataka na Internet, qai voleka ni veiyasa i vuravura kece e sa tu vakarawarawa kina.

Levu era vakadinadinataka na yaga ni Internet. Ia me qarauni tale ga na leqa e rawa ni vakavuna. Kena ivakaraitaki, levu na itabagone era dau vaqaqara duadua voli ena Internet, qai so era sa lai veitaratara tiko gona kei ira o na rairai sega vakadua ni bau sureta e vale, se o luvemu sara mada ga.

So tale na itabagone sega ni yalomatua era dau biuta ena Internet na itukutuku matailalai e baleti ira, nodra vakasama, vaka kina na kedra itaba. E kaya o Parofesa Zheng Yan mai na State University of New York, “era sega ni kila” na itabagone “na levu ni tamata era na raica se wilika na itukutuku era biuta oya, wili kina o ira na dau bacani ira na gone mera cakava vei ira na itovo tawakilikili.”

Meda vakadeuca mada na ka era sa cakava tiko e levu na itabagone ena Internet. Eda na kila kina na leqa e rawa ni basika, na veika era vakasaqara voli se nuitaka mera kunea, kei na ka meda cakava meda vakacegui ira kina. Ena vukei ira tale ga na itabagone lotu Vakarisito mera qaqarauni kina me rawa nira yalodina tiko vua na Kalou ena gauna lewalewai dredre eda sa bula donuya tu oqo.​—2 Timoci 3:1-5.