Na iTokani Lasu

E dua na “itokani” drau a sota ni o se itabagone. Ni o tiko kei koya, o nanuma ni o sa matua, era taleitaki iko tale ga kina eso tale. Gauna o lomaocaoca tu kina, e dau “vakacegui” iko. Vaka o sa vakararavi sara tu ga vua ena levu na ituvaki.

Toso na gauna o qai raica na kena roka dina. E dau vinakata me tu ga vata kei iko, ke o sega mada ga ni taleitaki kina ena so na vanua. Dina ni vaka mo rairai matua ni o tiko kei koya, ia e vakaleqa na nomu bula. Koya e ca sara, e butakoca nomu ilavo.

Dua ga na gauna sa oti qo o saga mo muduka nomudrau veitokani, ia e sega ni taleitaka o koya. E vaka me sa lewai iko tiko. O veivutunitaka sara ga nomu mai kilai koya.

QORI na ka era sotava e levu na dau kana tavako. Oti e 50 na yabaki nona dau kana tavako e dua na marama o Earline, e kaya: “E vaka me vinaka cake vei au na tavako, mai na noqu veimaliwai kei ira eso tale. Au rawa ni kaya ni noqu itokani makawa, eso na gauna e noqu itokani duadua ga.” E qai mai kila o Earline ni tavako e dua na itokani lasu, e rerevaki tale ga. Na italanoa mai cake e rawa sara ga ni vakaibalebaletaki vua. Ia e muduka rawa o Earline na kana tavako ena gauna e vulica kina ni Kalou e cata na vakatavako, ni vakaleqa na yagoda e bulia.—2 Korinica 7:1.

O Frank tale ga a vakatulewataka me muduka na vakatavako, me rawa ni vakamarautaka na Kalou. Ia oti ga e dua se vica na siga, e veiqasiyaki ena ruku ni nona vale me vaqara na ivovo ni itibi era dau lulutu mai na maliwa ni fuloa kau. E kaya, “Au sa vakatulewataka sara ga ikeri meu sa biuta na tavako. Dua na ka noqu vakasisilataka noqu veiqasiyaki tiko ena vanua duka qori meu vaqara vovo ni itibi. Au sega tale vakadua ni qai kana tavako.”

Cava sa rui dredre kina me muduki na kana tavako? Qo e vica na ka era raica na dauvakadidike: (1) Na tavako e rawa ni veivakabobulataki me vaka na waigaga ni veivakamatenitaki. (2) Ni cerumi na tavako, na kena waigaga na nicotine e rawa ni curuma sara noda mona ena loma ga ni vitu na sekodi. (3) Na vakatavako e rawa sara ga ni nona ivakarau ni bula e dua. Ena kana tavako ni gunu tiko, ni kana oti, ni veivosaki, me vakaceguya nona lomaocaoca, kei na levu tale na ituvaki.

Ia me vaka eda raica vei Earline kei Frank, e rawa ni muduki na leqa qo. Ke o dau vakatavako o qai vinakata mo muduka, nomu wilika na vica na ulutaga tarava ena rawa sara ga ni dua na itekitekivu vinaka ni nomu sasaga.