De dua drau na veivakalewai ena gauna kece drau veiba kina vakaveiwatini. Sa vaka me “ivakarau” tu ni nomudrau bula na vosa mosimosi.

Ke yaco tiko qo ena nomu bula vakawati, o rawa ni walia na ituvaki qori. Ia mo na kila mada e liu se cava e vakavuna na vosa mosimosi, mo kila tale ga na vuna e bibi kina mo veisautaka na ivakarau qori.

iSususu. E levu na veiwatini era susugi ena vuvale e dau tau vakalevu kina na vosa mosimosi. Ena rairai vakatotomuria e dua vei rau na veiwatini na ivakarau ni veivosaki qori.

Veivakamuai na ka ni veivakamarautaki. Sa ka ni lasa tu na veiwali ca e dau vakaraitaki ena iyaloyalo kei na porokaramu ni vakalasalasa ena tivi. Era nanuma kina na sarasara ni lasa se sega ni dua na kena leqa.

iTovo vakavanua. E laurai ena so na ivakarau vakavanua ni dodonu mera vakatulewa ga na “tagane,” se me kaukaua na nodra ivakarau na yalewa me kua ni nanumi kina nira malumalumu. Ke tiko gona vei rau na veiwatini na rai qori, erau na sega tiko ga ni via veiyaloni rau qai tauca na vosa mosimosi ena gauna erau veiba kina.

Se mani cava e vakavuna na vosa mosimosi, e rawa sara ga ni tini ina veisere qai vakavurea e levu na mataqali tauvimate. So mada ga era kaya ni mosimosi cake na vosa mai na ivacu. Kena ivakaraitaki, e tukuna e dua na yalewa vakawati e dau vakayacora vua o watina eso na ivalavala kaukaua, e dau tauca tale ga na vosa mosimosi: “Au raica ni mosimosi sara na vosa e dau tauca mai na nona ivakarau kaukaua.”

Na cava drau rawa ni cakava vakaveiwatini ke vakaleqa tiko na nomudrau veimaliwai na vosa mosimosi?

Dauveikauaitaki. Biuti iko ena ituvaki i watimu, qai saga mo kila na nona rai ena gauna o tauca kina na vosa mosimosi. Ke rawa, vakasamataka lesu e dua na gauna a rarawataka kina o watimu na ka o tukuna. Kua ni kauaitaka vakalevu na ka o tukuna; na ka ga e bibi mo kila se tarai watimu vakacava na ka o tukuna. Vakacava o rawa ni vakasamataka eso tale na vosa vinaka mai na nomu cavuta na vosa mosimosi? E kaya na iVolatabu: “A vosa vakayalovinaka sai vakamalumu ni cudru: Ia na vosa vakararawa sa vakatubura na cudru.”—Vosa Vakaibalebale 15:1.

Vuli mai na nodra ivakaraitaki vinaka eso tale na veiwatini. Ke vakaleqa tiko na nomudrau veivosaki na nodra ivakaraitaki ca eso tale, vakacava mo drau vuli mai na nodra ivakaraitaki vinaka eso tale na veiwatini. Vakarogoci ira na veiwatini e vinaka na ivakarau ni nodra veivosaki, ena yaga ke drau vakatotomuria.—iVakavuvuli vakaivolatabu: Filipai 3:17.

Vakabulabulataka tale na loloma drau a bucina ena imatai ni gauna. Na vosa mosimosi o tukuna e vakaraitaka ni ca na lomamu sega ni gusumu. Me donu gona nomu rai me baleti watimu, se mo raica ga na veika e vinaka kina. Dau vakananuma tale ga na veika vinaka drau dau marautaka tu e liu. Sarava eso na itaba makawa. Na cava o raica kina e vakavuna mo dredre? Na cava eso na itovo a vakavuna mo drau veivinakati?—iVakavuvuli vakaivolatabu: Luke 6:45.

Kua ni veibeitaki. Kua ni vosataki watimu, vakamacalataka ga vakayalovinaka se tarai iko vakacava na ka a cakava. Kena ivakaraitaki, e vinaka mo tukuna: “Au vakila niu sega ni dokai ena nomu dau cakava eso na ka daru sega mada ga ni veivosakitaka,” mai na nomu tukuna: “O sa dau va qori tu ga—o sega ni dau tukuna vei au na ka o via cakava!”—iVakavuvuli vakaivolatabu: Kolosa 4:6.

Kila na gauna mo biubiu kina. Ena vinaka mo drau qai veivosaki ena dua tale na gauna ke sa tekivu katakata na veivosaki se tau vakasabalia na vosa. E sega ni dua na leqa ke o biubiu ni katakata na veivosaki, drau qai veivosaki tale ni sa vinaka na ituvaki.—iVakavuvuli vakaivolatabu: Vosa Vakaibalebale 17:14.