NA MANUMANU qo e bula ena vanua vakaArctic qai vakavale e lomaniqele. E dau moce ena vulaililiwa, qai lutu sara na ivakarau ni katakata ni yagona me lai yacova na -2.9 na dikiri! Na ivakarau ni batabata qori sa rawa ni vakacacana nona mona. E bula gona vakacava na manumanu qo?

Vakasamataka mada: Ni oti e rua se tolu na macawa donuya na vulaililiwa, ena tubu tale na ivakarau ni nona katakata ena 36.4 na dikiri. Ia na katakata qori ena 12 ga ina 15 na aua na kena dede. Era kaya na dauvakadidike ni gauna lekaleka qori e vukea me cakacaka tiko ga na nona mona. Ena sega ni batabata sara na nona mona ni vakatauvatani kei na vo ni yagona ena vulaililiwa. E laurai ena vakadidike ni sega ni lutu mai na 0.7 na dikiri na katakata ni domona.

Ni cava na vulaililiwa, sa na cakacaka vinaka tale na nona mona ni oti ga e rua na aua. E laurai ena dua na vakadidike ni vinaka sara na cakacaka ni nona mona ena gauna qori! Era vakatauvatana qori na dauvakadidike ina kama ni veikau, ni dau totolo wale ga na kena tubu tale.

Na ka e cakava na mona ni manumanu qo e vukei ira na dauvakadidike mera kila ni levu tale na ka e rawa ni cakava na mona ni tamata. Era saga mera vulica e levu tale na sala e rawa ni wali kina na mate ni mona, wili kina na Alzheimer.

Cava o nanuma? E bula vakaidewadewa na mona ni squirrel se buli?