“Au sa rarawa sara; au sa vakalairoro vakalevu; au sa tagi lako e na siga ka bogi mai.”—Same 38:6.

KA ERA TUKUNA NA DAUVAKADIDIKE

O keda kece eda dau rarawa ena so na gauna. Ia na lomabibi e dau taura na gauna me qai seavu, e rawa ni vakamalumalumutaki keda qai vakataotaka na noda cakacaka ni veisiga. Ena gauna qo e duidui na nodra rai na kenadau me baleta e dua e rarawa kei na ka e vakavuna na lomabibi. E rawa ga ni tukuni ni so era nanuma nira tawayaga ni cala nodra rai, eso tale era dau rarawataka na nodra cala.

KA E KAYA NA IVOLATABU

E vakamacalataki ena iVolatabu na kedra italanoa e levu na tagane kei na yalewa yalodina era dau rarawa. Kena ivakaraitaki, e tukuni kina ni o Ana a “rarawa na yalona,” ena so tale na ivakadewa e tukuna ni “yalobibivoro” se “vusolo na lomana.” (1 Samuela 1:10) A masuta tale ga na Kalou na parofita o Ilaija me kauta tani na nona bula ena levu ni nona rarawa!—1 Tui 19:4.

Era vakamasuti na lotu vaKarisito ena imatai ni senitiuri mera “vosa vakayalovinaka vei ira na yalolailai” se lomabibi. (1 Cesalonaika 5:14) E tukuni ena dua na ivola, ni vosa “yalolailai” se lomabibi e rawa ni vakaibalebaletaki vei ira “era vakila vakalekaleka na lomaocaoca ni bula.” E kilai gona mai na tikinivolatabu qori nira dau lomabibi tale ga ena so na gauna na lotu vaKarisito yalodina ena gauna vakaivolatabu.

“Eda kila nira vutugu ra qai rarawa tu na kabuli kece me yacova mai qo.” —Roma 8:22.

KA E KAYA NA IVOLATABU

E vakavulica na iVolatabu ni rau vakavuna na tauvimate na imatai ni veiwatini ni rau talaidredre. E kaya na Same 51:5: “Ka’u a sucu vata kei na ca; ka sa kunekunetaki au ko tinaqu e nai valavala ca.” E vakamacalataka na Roma 5:12, “ena vuku ni dua ga na tamata [na imatai ni tamata o Atama] e curu kina i vuravura na ivalavala ca kei na mate ena vuku ni ivalavala ca, mani dewa na mate vei ira na tamata kece ga ni sa valavala ca na tamata kece ga.” Eda na sega gona ni galala mai na tauvimate kei na rarawa nida kawa mai vei Atama. Sa rauta me tukuna na iVolatabu “nira vutugu ra qai rarawa tu na kabuli kece me yacova mai qo.” (Roma 8:22) Ia e yalataki ena iVolatabu e dua na inuinui era na sega ni solia rawa na vuniwai. E yalataka kina na Kalou e dua na vuravura vou ni sautu ena sega tale kina na tauvimate se na leqa cava ga, wili kina na lomabibi.—Vakatakila 21:4.

“Sa voleka ko Jiova vei ira sa ramusu na yalodra; ka sa vakabulai ira sa dasila na lomadra.”—Same 34:18.

VUNA MO KAUAI KINA

E yacovi keda kece na veika tawanamaki, so na gauna eda na sotava na ka ca. (Dauvunau 9:11, 12) Ia o rawa ni cakava eso na ka mo valuta kina na lomabibi.

KA E KAYA NA IVOLATABU

E tukuna na iVolatabu ni yaga na vuniwai vei ira na tauvimate. (Luke 5:31) Koya gona e sega ni cala mo qara ivakasala vakavuniwai ke tarai iko na lomabibi. E vakadreta tale ga na iVolatabu na yaga ni masu. Kena ivakaraitaki, e kaya na Same 55:22: “Mo biuta vei Jiova na nomui colacola bibi, ena tokoni iko ko koya: Ena sega ni laivi ira na yalododonu me ra vakayavalataki e na dua na gauna.” Na masu e sega wale ga ni dua na sala mo vakacegui kina, o sa veitaratara sara tiko ga kei na Kalou o Jiova, o koya e “voleka . . . vei ira sa ramusu na yalodra.”—Same 34:18.

Ena yaga tale ga mo talaucaka na lomamu vua e dua na nomu itokani voleka. (Vosa Vakaibalebale 17:17) E tukuna o Daniela, e iVakadinadina i Jiova: “A kerei au e dua keirau vakabauta vata me keirau veitalanoataka na noqu lomabibi. Au sega ni dau vinakata meu veitalanoataka qori, ia au sa qai kila ni dodonu meu se cakava makawa sara. Ni oti neirau veitalanoa dua na ka noqu lomavakacegu.”