E LEVU era sa wilika se rogoca na italanoa vakaivolatabu me baleta na buli ni lomalagi kei na vuravura. Na itukutuku qori a volai ena rauta na 3,500 na yabaki sa oti, e tekivu ena malanivosa: “Enai vakatekivu sa bulia na lomalagi kei vuravura na Kalou.”

Ia e levu era sega ni kidava ni sa veisautaki me itukuni na itukutuku ena iVolatabu me baleta na bulibuli. Qo na ka era cakava na iliuliu ni lotu ni Veivanua Vakarisito, ira na dau veibataka na bulibuli kei ira era sega ni ciqoma na ivakavuvuli vovou e basika. Na vakasama qori e veicalati kei na ivakadinadina vakasaenisi. E vakavuna kina me levu era sega ni via kauaitaka na itukutuku vakaivolatabu me baleta na bulibuli ra qai raica me italanoa buli ga.

Era mani sega ni kila e levu na itukutuku vakaivolatabu me baleta na bulibuli. E vakaloloma dina qori, ni vakamacalataka vakamatata na iVolatabu na itukutuku ni bulibuli, e nuitaki tale ga na ivakamacala e tiko kina. Kena ikuri, na ivakamacala qori sa vakadinadinataki tale ga vakasaenisi. De dua o na kurabuitaka na itukutuku dina ena iVolatabu me baleta na bulibuli!

Na itukutuku ni bulibuli ena iVolatabu e vakaraitaka ni tiko e dua e Cecere, e Kalou Kaukaua, e bulia na ka kece. O cei sara mada o koya, kei na cava e kilai tani kina? Na iVolatabu e vakamacalataka ni duatani o koya mai na kalou era qarava na veimatatamata kei na kalou era vakavuvulitaka na veimatalotu kilai levu. E bulia na Kalou Kaukaua na ka kece, ia e levu era sega ni kila na veika me baleti koya.

• E dua na kabula na Kalou. E sega ni dua na ka kaukaua e ciri voli e maliwalala. E vakasama, e vakila na ka, qai tiko na nona inaki.

• E tawavakaiyalayala na nona kaukaua kei na vuku. E laurai qori ena vereverea ni veika e bulia vakabibi na veikabula.

• E bulia na Kalou na ka kece e tu wavoliti keda. E sega ni rawa gona ni vakayagataka o koya na veika qori me buli koya tale kina. Ni o koya e dua na ka bula vakayalo sa bula rawa tu.

• E sega ni vakaiyalayala, ia e tawamudu na nona bula na Kalou. E sega gona ni dua e buli koya.

• E tiko na yaca ni Kalou, e volai vakavica na udolu ena iVolatabu. Na yacana o Jiova.

• Na Kalou o Jiova e lomani keda, e kauaitaki keda tale ga.

E tukuna na iVolatabu ni Kalou a bulia na “lomalagi kei vuravura.” Ia e sega ni vakamacalataka na balavu ni gauna e bulibuli kina se na iwalewale ni nona bulibuli. Vakacava na nodra ivakavuvuli takalevu na dau veibataka na bulibuli, ni Kalou e bulibuli ena ono na siga e 24 ga na aua na kena dede? Era sega ni duavata na saenitisi kei na rai qori. Ia dikeva mada na ka e tukuna dina na iVolatabu.

• E sega ni tokona na iVolatabu na nodra rai na sega ni ciqoma na ivakavuvuli vovou e basika kei ira era dau veibataka na bulibuli nira tukuna ni ono ga na siga e bulibuli kina na Kalou, oya me 24 na aua dua na siga.

• Ena iVolatabu na vosa “siga” e levu na kena ibalebale. Ena so na vanua e sega ni vakamatatataki na balavu ni gauna. E va sara ga qori na itukutuku ni bulibuli ena Vakatekivu.

• Na ono na siga ni bulibuli ena iVolatabu e rawa ni vicavata na udolu na yabaki.

• Ni bera na imatai ni siga ni bulibuli sa bulia rawa tu na Kalou na lomalagi kei na vuravura.

• Kena irairai na ono na siga ni bulibuli qori e okati me dua na gauna balavu ena nona vakarautaka na vuravura na Kalou o Jiova me bula kina na kawatamata.

• Na itukutuku ni bulibuli ena iVolatabu e sega ni veisaqasaqa kei na veika era sa vakadinadinataka na saenitisi me baleta na yabaki ni noda vuravura.

E levu era sega ni vakabauta na iVolatabu, era tokona na vakasama nira bula mai vakaidewadewa na veikabula qai tekivu mai na dua na ka somidi. Ia vakasamataka mada e dua na ka somidi me vaka na beketiria e veisautaki koya tiko ga me yacova ni basika na veimataqali kabula sa tu nikua. E vaka mera tukuna tiko, na vereverea kei na vakasakiti ni bulibuli ni tamata e basika mai ena beketiria.

Era vakabauta tale ga na ivakavuvuli ni bula vakaidewadewa e levu era tukuna ni iVolatabu e vosa ni Kalou. Era vakabauta ni bulia na Kalou na imatai ni kabula somidi, sa qai dewa mai kina na veimataqali kabula, qori na bula vakaidewadewa. Ia e sega ni tukuna qori na iVolatabu.

• E tukuna na iVolatabu, ni bulia na Kalou o Jiova na duidui kau, manumanu, kei na rua na tamata uasivi erau rawa ni vakatulewa, vakaraitaka na loloma, na vuku kei na lewadodonu.

• Me yacova mai nikua, e roboti vuravura na veimataqali ka bula ena kedra bulibuli ga a bulia na Kalou ena vakatekivu.

• Na itukutuku ni bulibuli ena iVolatabu e sega ni veisaqasaqa kei na veika era sa dikeva na saenitisi me baleta na duidui e basika ena dua na kawa.

Ena loma ni veiyabaki ni 1800, a duavata kei na veika a vakatavuvulitaka o Charles Darwin o Alfred Russel Wallace e dua na saenitisi mai Peritania, ni bula e basika mai na ka sa bula rawa tu. E tukuni ni a kaya na saenitisi rogo qori: “Mera rai o ira e tu na matadra, mera qai vakasama, ni dikevi na sela ena dra ni tamata, na veika era tu e vuravura, kei na maliwalala, . . . , e laurai na vuku ena kena tuvani vakamaqosa.”

Ena ruanaudolu na yabaki ni bera na gauna i Wallace sa tukuna makawa tu na iVolatabu: “Tekivu mai na gauna a buli kina na vuravura e kilai na veika tawarairai me baleti koya [Kalou], ya na nona kaukaua e sega ni vakaiyalayala, vaka kina ni o koya dina ga na Kalou, e kilai qori ena veika e buli.” (Roma 1:20) De vinaka me tiko na gauna mo vakasamataka kina na vakasakiti ni kedra ibulibuli na veikabula​—mai na dua na co lailai ina veikalokalo e lomalagi. Ni o vakayacora qori o na kila ni tiko e dua na Dauveibuli.

‘Ia o na rairai taroga, ‘Ke tiko e dua na Kalou yalololoma e bulia na veikabula, na cava e vakatara tiko kina na rarawa? Sa guilecava na nona ibulibuli e vuravura? E tiko e dua na inuinui?’ E levu tale na itukutuku dina era tu ena iVolatabu, na veika dina qori era sega ni kila e levu ni sa sosomitaki ena ivakavuvuli vakatamata kei na ivakavuvuli vakalotu. Era na marau na iVakadinadina i Jiova, mera vukei iko mo vulica e levu na ka dina ena iVolatabu me baleta na Dauveibuli kei na inuinui e baleti keda na nona ibulibuli.