NIRA yaco i El Salvador na kai Sipeni ena voleka na 500 na yabaki sa oti, na yavusa era lewa na vanua oya era vakatoka na nodra vanua me o Cuscatlán​—e kena ibalebale “Vanua ni Vatutalei.” Nikua e levu e El Salvador era nodra kawa na itaukei e kea kei ira na vulagi era toki yani kina.

Era kilai na kai El Salvador nira dau veikauaitaki kei na nodra dau cakacaka. Era vakaitovo, dau veidokai tale ga. Nira sota era dau veikidavaki ena vosa “Buenos días” (yadra) se “Buenas tardes” (bula). Era kaya na vakaitikotiko ena taudaku ni koro lelevu kei na tauni ni veibeci ke o sega ni vakabula ni o veisivi kei na dua.

E kedra kakana taleitaki na pupusa​—oya na tortilla e caka mai na sila qaqi (se raisi) qai tu e loma na jisi, bini, vuaka se so tale na ka. E dau laukana vata kei na tomato sauce kei na curtido​—e waki vata kina na kaveti, varasa, kareti, qai toni ena dua na mataqali viniqa. Eso era vakayagataka na isele kei na icula nira kana pupusa, ia na nodra itovo e kea mera kana e ligadra.

 SO NA KENA ITUKUTUKU E vakatokai o El Salvador me vanua ni volukano se ulunivanua dau kacabote. E tu kina e sivia na 20 na volukano qai so se katakata tu ena rawa ni kacabote ena dua na siga. Na vatu e tu ena savu na Los Tercios, oya na vatu waicala ni volukano.

E sivia na 38,000 na iVakadindina i Jiova e El Salvador, qai rauta ni 700 na ivavakoso. Era vakavulica e rauta na le 43,000 ena iVolatabu ena vosa vakaSipeni, vakavalagi, wili kina na vosa vagalu vakaEl Salvador.