ULUTAGA LEVU | NI YACO NA LEQA—CAVA MO CAKAVA
Tauvimate
O Mabel e dua na marama e bulabula vinaka mai Argentina qai dau vukei ira e vakaleqai nodra bula. Ia ena 2007 a tekivu me dau wawale qai mosi na uluna. E kaya: “Au raica e levu na vuniwai, vakayagataka e levu na wainimate, ia e sega ni wali rawa na kequ ituvaki.” Toso na gauna, a dikevi o Mabel ena misini na MRI scan qai laurai ni tubu tiko ena nona mona e dua na ka. E kaya: “Au kidacala sara ga! Au sega ni vakabauta ni tubu tiko e yagoqu e dua na meca.”
“Ia au qai kila na bibi ni kequ mate niu sa sele oti. Ena gauna au yadra kina, au sa tu ena vanua era qaravi kina o ira na mate bibi, qai sega ni rawa meu vuki. Au dagava tu ga na dokanivale. Ni bera niu sele, au bulabula vinaka qai rawa meu qaravi au ga vakataki au. Ia sa sega ni rawa qo meu cakava e dua na ka. Au veilecayaki ena gauna au tu kina ena vanua qori qai kosakosa na iyaya vakavuniwai, tagi ni alamu, kei na nodra tagi na vo ni tauvimate. E vaka me wavoliti au tu na mosi kei na rarawa.
“Ia au sa bulabula vinaka qo. Sa rawa niu taubale vakataki au, qai so na gauna au gole vakataki au ga i tuba. Ia au se sega ni rawa ni rai vinaka, qai berabera meu cakava na ka.”
KA MO CAKAVA
Tovolea me donu tiko ga na nomu rai. E kaya na Vosa Vakaibalebale 17:22: “A loma daumarau sa wai yaga: Ia na yalo sa mavoa sai vakamamaca ni sui.” E nanuma lesu o Mabel: “Ena gauna au vakabulabula tiko kina, au vakila sara ga na veika era dau sotava o ira au dau vukei ira. Au vakila na mosi ena gauna au vakaukauayago kina qai so na gauna au via viritaka sara ga na tawelu. Ia au saga meu kauta laivi na rai qori, niu kila ni sasaga qo ena yaga vei au.”
Tovolea mo dau vakasamataka na veika ena vukei iko mo vosota. E kaya o Mabel: “Noqu vulica na iVolatabu, au kila kina ni na yaco ga na leqa. Au kila tale ga ni veisiga yadua eda volekata yani na gauna sa na sega kina na mosi.” *
Nanuma tiko ni kauaitaki iko dina na Kalou. (1 Pita 5:7) E nanuma lesu o Mabel na sala e vukei koya kina na tikina qori: “Na gauna ratou kauti au kina meu lai sele, au vakila sara ga na dina ni Aisea 41:10, e yalataka na Kalou: “Kakua ni ko rere; ni’u sa tiko vata kei iko.” Au sega ni rere niu kila ni Kalou e kauaitaka na veika e yacovi au.”
O bau kila? E tukuna na iVolatabu ni na yaco na gauna sa na sega tale kina na tauvimate.—Aisea 33:24; 35:5, 6.
^ para. 8 Me ikuri ni ivakamacala, raica na wase 11 ni ivola Na Cava Sara Mada e Kaya na iVolatabu?
Rawa ni o Wilika Tale ga
SAUMI NA TARO VAKAIVOLATABU
Tauvimate Bibi—Ena Walia na iVolatabu?
Io! Raica mada e tolu na ka mo cakava mo vosota kina na tauvimate bibi.
YADRA!
“Sega ni Vakamalumalumu ina Kequ Mate”
Na cava e vakaukauataki Elisa me vosota na mosi e vakila, so mada ga na gauna e guilecava ni tauvimate tiko?
RA TAROGA NA ITABAGONE
Na Cava Meu Cakava Niu Tauvimate?—Wase 1
Ratou vakamacalataka e va na itabagone na ka e vukei ratou me ratou vosota kina na kedratou mate, me donu tale ga nodratou rai.
