“Oni biuta tani na ivunau ni Kalou, oni qai taura matua na ivakavuvuli vakatamata.”—Marika 7:8.

KA E KAYA NA IVOLATABU

E buli na tamata mera “gadreva na Kalou.” (Maciu 5:3) Era tauyavutaka kina e levu na lotu, ia era vakavuvulitaka e levu na vakasama vakatamata sega ni vakalou.

Kena ivakaraitaki, na iVolatabu e tukuni ira na lewe ni dua na isoqosoqo lotu ena imatai ni senitiuri: “[Era] yalogu dina ena nodra qarava na Kalou, ia e sega ni salavata kei na ivakavuvuli dina. Nira sega ni kauaitaka na yalododonu ni Kalou, era via vakadonui ira ga vakataki ira, era sega ni vakamalumalumutaki ira ina yalododonu ni Kalou.” (Roma 10:2, 3) E levu tale ga na matalotu nikua era “vakavuvulitaka ga na ivakavuvuli vakatamata.”—Marika 7:7.

“Meda dau veinanumi, meda veivakauqeti, meda veilomani, meda caka vinaka tale ga, meda kua ni vakawaletaka na soqoni.”—Iperiu 10:24, 25.

KA E KAYA NA IVOLATABU

E cavuti ena Iperiu 10:25 na matavosa “kua ni vakawaletaka na soqoni.” Na vosa qori e vakaraitaka ni vinakata na Kalou meda soqoni vata da qai sokaloutaki koya. Ia e sega ni kena ibalebale qori me vakatau vei keda na sala meda qaravi koya kina. Ni kaya na iVolatabu ni o ira era sokaloutaki koya ena sala e vakadonuya e dodonu mera ‘duavata ena ka era tukuna, duavata tale ga nodra rai kei na nodra inaki.’ (1 Korinica 1:10) Dodonu mera tuvanaki ena dua na ivavakoso ra qai “lomani ira na mataveitacini” e vuravura raraba. (1 Pita 2:17; 1 Korinica 11:16) Ni tuvanaki qai vakaduavatataki o ira na qaravi Kalou ena vakamarautaki koya na Kalou.

“Na ka qo era na kila kece kina ni dou noqu tisaipeli—ke dou veilomani.” —Joni 13:35.

KA E KAYA NA IVOLATABU

E vakatakilakilataka na iVolatabu na sala eda na kilai ira kina era vakavuvulitaka na ka dina: “Oni na kilai ira ena vuadra. E vakaevei, e dau beti na vaini mai na wavakavotona, se lolo mai na soni?” (Maciu 7:16) E sega ni tukuni sara mo cakacaka ena tabana ni teitei mo qai vakaduiduitaka na vunilolo mai na soni, sega tale ga ni gadrevi mo vakoroi ena ka vakalotu mo qai vakaduiduitaka na dina mai na lasu. Cava eso na ivakatakilakila ni lotu dina?

• Na lotu dina e vakavulica na ka dina ena Vosa ni Kalou na iVolatabu. (Joni 4:24; 17:17) Sega ni yavutaki ena vuku vakatamata.

• Na lotu dina e vukea e levu mera kila na Kalou, okati kina nodra kila na yacana, o Jiova.—Joni 17:3, 6.

• Na lotu dina e vakabibitaka ni Matanitu ni Kalou e inuinui duadua ga ni kawatamata, sega ni matanitu vakatamata.—Maciu 10:7; 24:14.

• Na lotu dina e uqeta na veilomani dina. (Joni 13:35) E vakavulica meda doka na matatamata kece, meda vakayagataka noda gauna kei na iyau meda veivukei kina, meda kua tale ga ni vakaitavi ena nodra veivaluvaluti na veimatanitu.—Maika 4:1-4.

• Na lotu dina e sega ni dodonu me ka vagauna, ia me tiki sara ga ni noda bula. O ira na lewena era bulataka sara ga na ka era vakavulica.—Roma 2:21; 1 Joni 3:18.

Era dau saga na iVakadinadina i Jiova, o ira era tabaka na ivola qo, mera doka na Kalou ena nodra vosa kei na nodra itovo. O na vakadinadinataka qo ke o tovolea mo tiko ena dua na nodra soqoni.