E dau dredre mo guilecava na veika ca e cakava se kaya o watimu, e kabi dei tale ga ena nomu vakasama na vosa mosimosi e tauca kei na nona sega ni dau veinanumi. Sa seavu na kamica ni nomu taleitaki koya, tekivu mo sevaki koya. Cava tale mo cakava, o sa na rairai vosota tu ga na bula vakawati e batabata kina na loloma. Sa qai kuria ga qori nomu cati koya.

Ia e rawa ni wali na leqa qori. Vakasamataka mada eso na ka e dau vakavuna na veicudruvi.

Na cudru ena vakavuna na kavoro ni bula vakawati. Na veicudruvi e vakavuna me sega ni vakaitovotaki na itovo e dodonu me yavu ni vakawati me vaka na loloma, veinuitaki, kei na dina. E bibi me kauaitaki na tikina qo, ke sega ena vakavuna na leqa ni bula vakawati. Sa rauta me kaya na iVolatabu: “Me kau tani vei kemuni na yaloca [“cudru,” NW].”—Efeso 4:31.

Ena vakararawataki iko nomu cudru vakabalavu. Ni o cudru tiko vakabalavu e vaka sara ga nomu sabaki iko, o qai nanuma ni na vakila na kena mosi e dua tale. E vola o Mark Sichel ena nona ivola Healing From Family Rifts, “Ena rairai wele voli ga o koya o cudruva tiko e vale, e mamarau, qai sega ni vakaleqai koya na nomu cudru.” Ia cava me nanumi? E kaya o Sichel: “O na rarawa ga vakalevu ke o cudru tiko.”

Vakatau tiko ga vei iko. Eso era na rairai vakatitiqataka qori. Era na kaya, ‘E vakavuna ga o watiqu na noqu cudru.’ Sa kauaitaki vakasivia e keri na nona itovo e dua, ia me nanumi tiko nida sega ni rawa ni lewa na ka e cakava e dua. E tukuni ena iVolatabu na kena iwali. E kaya: “Me dikeva na tamata yadua na nona cakacaka.” (Kalatia 6:4) Eda sega ni lewa rawa na ka e kaya se cakava e dua, ia eda rawa ni lewa na ka eda cakava. Meda kua gona ni cudruvi ira.

Yalorawarawa ni kere veivosoti. Dau rawarawa tu ga mo beitaki watimu. Ia mo nanuma ni vakatau vei iko na nomu cudru, vaka kina na veivosoti. Rawa ni o muria na veiuqeti vakaivolatabu qo: “Me kua ni dromu na matanisiga o se cudru tiko ga.” (Efeso 4:26) Ke o dau tu vakarau mo veivosoti, ena rawarawa ni wali na leqa baleta sa donu rawa tiko na rai.—iVakavuvuli vakaivolatabu: Kolosa 3:13.

Dikevi iko. E kaya na iVolatabu ni so era dau “cudru,” so tale era “cudru katakata.” (Vosa Vakaibalebale 29:22, NW) O dau va ya? Tarogi iko mada: ‘Dau tuburi au totolo na cudru? Dau rawarawa nodra vakacudrui au eso? Au dau vakalevutaka na ka?’ E kaya na iVolatabu ni “o koya e weroka tiko ga na ka, e tawasei ira na itokani dredre.” (Vosa Vakaibalebale 17:9, NW; Dauvunau 7:9) Qori e rawa tale ga ni dau yaco ena vakawati. E bibi gona mo tarogi iko ke dau tuburi iko totolo na cudru, ‘Rawa niu vosoti watiqu?’—iVakavuvuli vakaivolatabu: 1 Pita 4:8.

Veivosakitaka ga na ka e bibi. E kaya na iVolatabu ni tiko “na siga me tiko lo kina, kei na siga me vosa kina” e dua. (Dauvunau 3:7) Sega ni ka kece e vakavuna na cudru me veivosakitaki, e rawa ni “tu lo ga e lomamu na ka o via tukuna ena nomu imocemoce, mo galu ga.” (Same 4:4, NW) Ia ke bibi dina mo drau veivosakitaka na ka e vakacudrui iko, waraka me ruru nomu cudru. E kaya e dua na yalewa vakawati o Beatriz: “Niu cudru, au saga meu tauri au mada vakamalua. Au qai raica ni sega ni leqa levu qori, uqeti au gona meu vosa ena veidokai.”—iVakavuvuli vakaivolatabu: Vosa Vakaibalebale 19:11.

iBalebale dina ni “veivosoti.” Ni vakayagataki ena iVolatabu na vosa “veivosoti” e dau yavutaki ena so na gauna ena vosa a vakadewataki taumada kina, qai kena ibalebale mo kua ni katona tale tiko. Ena sega kina ni vakalecalecavi se me vakawaleni na ka ca e yaco, ia ena sagai me guilecavi, ni o kila ni rawa vakaleqa na kemu ituvaki vakayago kei na nomu bula vakawati na cudru.