Vakamacalataki iko mada.

Au sucu e Itali ena 1943. E rua na tuakaqu, dua na taciqu, kei na tolu na ganequ, keitou susu ena dua na koro lailai. O Ta e dauteitei, e cakacaka tale ga vakamatai. Rau vinakata o Ta kei Na me keitou lotu Katolika ivakaraitaki vinaka.

Cava o via bete kina?

Dau taleitaka na vakarogoci ira na bete niu se gone. Rogo vinaka vei au na domodra kei na talei ni nodra ivakarau ni sokalou. Lomaqu gona meu na bete. Vakacurumi au o Na ena koronivuli curuibure niu se qai yabaki 13, era dau vuli kina na gonetagane era via vuli bete.

O vulica kina na iVolatabu?

Sega. Au se qai yabaki 15 sa solia vei au e dua noqu qasenivuli na ilavelave ni ivola na Kosipeli, e baleta na ivolatukutuku ni bula i Jisu kei na nona cakacaka vakaitalatala, au wilika vakavica na ivola qori. Au lai vuli i Roma niu sa yabaki 18 ena dua na univesiti ni bete, e kena iliuliu na tuitabu. Au vuli vosa vakaLatina, vaKirisi, itukutuku makawa, ivakavuvuli vuku, veika me baleta na vakasama kei na ivakarau ni nona bula e dua, kei na veika vakalou. Keimami dau cavuqaqataka na tikinivolatabu, vakarogoca tale ga na wili iVolatabu ena vunau ni Sigatabu, sega ga ni vulici na iVolatabu.

Na gauna o qasenivuli liu tiko kina, o dau veivakavulici?

Vakatabakidua noqu cakacaka meu veiliutaki. Ia au dau vakavulica tale ga na ivakavuvuli sa vakadonui mai na Matabose ni Lotu Katolika (Second Vatican Council).

Cava o tekivu vakatitiqataka kina nomu lotu?

Tolu na ka e vakavuna. Kena imatai ni vakaitavi o lotu ena veika vakapolitiki. Dua tale na kena dau vakalaivi tu ga nodra itovo ca na matabete kei ira na lewenilotu. Cala tale ga eso na ka e vakavuvulitaka. Me kena ivakaraitaki, ni dau veivakararawataki na Kalou dauloloma ena gauna eda sa mate kina. Vaka kina kena cavuti wasoma na masu ni vakayagataki na rosario. *

Cava o cakava?

Au masulaka na veidusimaki salavata kei na noqu tagi. Au volia tale ga e dua na iVolatabu ni Katolika e vakatokai na Jerusalem Bible, se qai taba ga na kena vakaiTali, au tekivu wilika sara. Dua na mataka ni Sigatabu ni oti na Misa e koronivuli, niu se vakaliliga tiko ga noqu kote balavu rau sa basika e rua na turaga. Rau kaya ni rau iVakadinadina i Jiova. Rauta ni dua na aua neitou veitalanoataka tiko na iVolatabu kei na ka e tukuni kina me baleta na ivakatakilakila ni lotu dina.

 Cava nomu rai baleti rau?

Au qoroya nodrau vakabauta, rau kila vinaka na vakayagataka neimami iVolatabu na Katolika. Oti e tekivu sikovi au yani o Mario, e dua tale na iVakadinadina. E turaga dau vosovoso qai yalodina, veimataka ni Vakarauwai, ni tau na uca se cila na siga sa na tukituki tu e matanikatuba ena ciwa na kaloko.

Cava era nanuma na vo ni bete?

Au dau sureti ira ina vuli iVolatabu, sega ga nira kauai kina vakalevu. Ia au marautaka na vuli qori. Levu na ka vakatubuqoroqoro au vulica, me vaka nona vakatara tu na Kalou na veika ca kei na rarawa, na ka sara ga au dau lomatarotarotaka tu.

Ra saga nomu iliuliu mera tarova nomu vuli iVolatabu?

Au lako vakavica i Roma ena 1975 meu lai vakamacalataka kina noqu rai. Ra saga noqu iliuliu mera veisautaka noqu rai, kena leqa ga ni sega ni dua vei ira e vakayagataka na iVolatabu. Me yacova na ika9 ni Janueri 1976, au volavola i Roma meu vakaraitaka kina niu sa biuta na Lotu Katolika. Oti e rua na siga au sa biuta na koronivuli qo, au vodo sitimanivanua meu lai tiko ena imatai ni gauna ena nodra soqoni na iVakadinadina i Jiova, ia qori na nodra soqo ni tabacakacaka, e vica vata na ivavakoso era tiko kina. Ka kece e duidui niu vakatauvatana kei na ka au dau matau tu kina! Era yadua kece na iVolatabu na iVakadinadina, ra vakamuri koya tiko e vunau ena gauna e vakamacala kina ena dua na iulutaga.

Cava nodratou rai e vale?

Ratou sega ni veitokoni vakalevu. Ia au qai kila ni dua na taciqu a vuli tiko kei ira na iVakadinadina e Lombardy, dua na yasayasa ena vualiku kei Itali. Au lai raici koya sara, ra qai vukei au na iVakadinadina e kea me dua noqu cakacaka, kei na vanua meu tiko kina. Yabaki tiko ga qori au papitaiso meu iVakadinadina i Jiova.

O bau veivutuni?

Sega vakadua! Au sa qai volekata tu qo na Kalou, niu kilai koya ena ka au vulica ena iVolatabu, sega ni ivakavuvuli vuku ni matanitu se ivakarau sa dau muria tiko mai o lotu. Au rawa tale ga ni vakavulici ira eso tale ena dei ni noqu vakabauta kei na noqu lomadina.